ಪವರ್‌ಗ್ರಿಡ್‌ ಹ್ಯಾಕ್‌ಗೆ ಚೀನ ಯತ್ನ!

ಹೊಸದಿಲ್ಲಿ: ಗಡಿಯಲ್ಲಿ ದುಸ್ಸಾಹಸ ಮೆರೆಯುತ್ತ ಪದೇ ಪದೆ ಭಾರತದ ತಂಟೆಗೆ ಬರುತ್ತಿರುವ ಚೀನ ವಾಮಮಾರ್ಗದ ಮೂಲಕವೂ ತೊಂದರೆ ಉಂಟುಮಾಡಲು ವಿಫ‌ಲ ಯತ್ನ ನಡೆಸಿತ್ತು ಎಂಬ ಮಾಹಿತಿ ಬಹಿರಂಗವಾಗಿದೆ.

ಚೀನ ಸರಕಾರಿ ಪ್ರಾಯೋಜಿತ ಹ್ಯಾಕರ್‌ಗಳು ಕಳೆದ 8  ತಿಂಗಳಿನಿಂದ ಲಡಾಖ್‌ ಸಮೀಪದಲ್ಲಿರುವ ಭಾರತದ ಏಳು ವಿದ್ಯುತ್ಛಕ್ತಿ ವಿತರಣ ಕೇಂದ್ರಗಳನ್ನು ಗುರಿ ಮಾಡಿದ್ದರು ಎಂದು ಅಮೆರಿಕ  ಮೂಲದ “ರೆಕಾರ್ಡೆಡ್‌ ಫ್ಯೂಚರ್‌’ ಎಂಬ ಖಾಸಗಿ ಗುಪ್ತಚರ ಸಂಸ್ಥೆ ಹೇಳಿದೆ. ಪೂರ್ವ ಲಡಾಖ್‌ನಲ್ಲಿ ಎರಡೂ ದೇಶಗಳ ಸೇನೆಯ ನಡುವೆ ಸಂಘರ್ಷ ಮುಂದುವರಿದಿರುವಂತೆಯೇ ಈ ಬೆಳವಣಿಗೆ ನಡೆದಿದೆ. ಗುಪ್ತಚರ ಸಂಸ್ಥೆಯ ಮಾಹಿತಿಯನ್ನು ಕೇಂದ್ರ  ಸರಕಾರವೂ ದೃಢಪಡಿಸಿದೆ.

ರೆಕಾರ್ಡೆಡ್‌ ಫ್ಯೂಚರ್‌ ಹೇಳಿದ್ದೇನು? :

ಕಳೆದ ವರ್ಷದ ಆಗಸ್ಟ್‌ನಲ್ಲಿ ಮತ್ತು ಮಾರ್ಚ್‌ನಲ್ಲಿ ಚೀನದ ಹ್ಯಾಕರ್‌ಗಳು ಉತ್ತರ ಭಾರತದಲ್ಲಿ ಇರುವ ಕನಿಷ್ಠ 7 ಇಂಡಿಯನ್‌ ಸ್ಟೇಟ್‌ ಲೋಡ್‌ ಡಿಸ್ಪ್ಯಾಚ್‌ ಸೆಂಟರ್‌ (ಎಸ್‌ಎಲ್‌ಡಿಸಿ)ಗಳ ಮೇಲೆ ಸೈಬರ್‌ ಬೇಹುಗಾರಿಕೆಗೆ ಯತ್ನಿಸಿದ್ದಾರೆ ಎಂದು ರೆಕಾರ್ಡೆಡ್‌ ಫ್ಯೂಚರ್‌ ಹೇಳಿದೆ.

ಚೀನದ ಉದ್ದೇಶವೇನು? :

1. ಭಾರತದ ವಿದ್ಯುತ್‌ ಮೂಲ ಸೌಕರ್ಯಗಳ ಮಾಹಿತಿ ಸಂಗ್ರಹಿಸಲು ಕಾರ್ಯಾಚರಣೆ
2. ಭವಿಷ್ಯದ ಕಾರ್ಯಾಚರಣೆಗಳಿಗೆ ಬೇಕಾದ ಮಾಹಿತಿ ಹಾಗೂ ದತ್ತಾಂಶಗಳ ಸಂಗ್ರಹ
3. ದೇಶದ ಸೂಕ್ಷ್ಮ ಮೂಲಸೌಕರ್ಯ ವ್ಯವಸ್ಥೆಗಳನ್ನು ದುರ್ಬಲಗೊಳಿಸುವುದು