ಕ್ಯೂಬಾದಲ್ಲಿ ಚೀನಾ ಗುಪ್ತಚರ ಕೇಂದ್ರ!: ಅಮೆರಿಕದ ಅನಾಮಿಕ ಅಧಿಕಾರಿ ಆರೋಪ

ನವದೆಹಲಿ: ಚೀನೀ ಆಡಳಿತ, ಆರ್ಥಿಕ ದುಸ್ಥಿತಿಗೆ ಸಿಲುಕಿರುವ ಕ್ಯೂಬಾದಲ್ಲಿ ಗುಪ್ತಚರ ನೆಲೆ ಹೊಂದಿದೆ. ಹೀಗೆಂದು ಅಮೆರಿಕದ ಸರ್ಕಾರದ ಪ್ರಮುಖ ಅಧಿಕಾರಿಯೊಬ್ಬರು ಚೀನಾದ ಮೇಲೆ ಬಲವಾದ ಆರೋಪ ಮಾಡಿದ್ದಾರೆ. 2019ರಲ್ಲಿ ಈ ಸೌಲಭ್ಯವನ್ನು ಮೇಲ್ದರ್ಜೆಗೇರಿಸಿದೆ ಎಂದು ಅವರು ಪ್ರತಿಪಾದಿಸಿದ್ದಾರೆ.

ಈ ಆರೋಪಗಳನ್ನು ಚೀನಾ ಮತ್ತು ಕ್ಯೂಬಾ ಸರ್ಕಾರಗಳು ಬಲವಾಗಿ ತಿರಸ್ಕರಿಸಿವೆ. ವಿಶೇಷವೆಂದರೆ ಅಮೆರಿಕದ ರಾಷ್ಟ್ರೀಯ ಭದ್ರತಾ ಸಮಿತಿ ವಕ್ತಾರ ಜಾನ್‌ ಕಿರ್ಬಿ ಕೂಡ ಇದು ಅಧಿಕೃತ ವರದಿಯಲ್ಲ ಎಂದಿದ್ದಾರೆ. ಚೀನಾ ಅಂತೂ, ಅಮೆರಿಕ ಈ ರೀತಿಯ ವದಂತಿ ಹಬ್ಬಿಸುವುದು ಮಾಮೂಲಿ. ಅದು ಕ್ಯೂಬಾದ ಆಂತರಿಕ ಸಂಗತಿಯಲ್ಲಿ ಮೂಗು ತೂರಿಸುತ್ತಿದೆ ಎಂದು ಆರೋಪಿಸಿದೆ.

ಅಧಿಕಾರಿ ಹೇಳಿದ್ದೇನು?: ಇತ್ತೀಚೆಗೆ ವಾಷಿಂಗ್ಟನ್‌ ಪೋಸ್ಟ್‌ನಲ್ಲಿ ಒಂದು ವರದಿ ಪ್ರಕಟವಾಗಿತ್ತು. ಅದರಲ್ಲಿ ಕ್ಯೂಬಾ ಮತ್ತು ಚೀನಾ ನಡುವೆ ವಿದ್ಯುನ್ಮಾನ ಕದ್ದಾಲಿಕೆ ಕೇಂದ್ರ ಸ್ಥಾಪಿಸಲು ಒಪ್ಪಂದವಾಗಿದೆ. ಆರ್ಥಿಕ ದುಸ್ಥಿತಿಗೆ ಸಿಲುಕಿರುವ ಕ್ಯೂಬಾಗೆ ಸಾವಿರಾರು ಕೋಟಿ ರೂ. ನೆರವು ನೀಡುವ ಆಮಿಷವನ್ನು ಚೀನಾ ಒಡ್ಡಿದೆ ಎಂದು ಹೇಳಲಾಗಿತ್ತು. ಈ ಬಗ್ಗೆ ಪ್ರತಿಕ್ರಿಯಿಸಿದ್ದ ಹೆಸರು ಹೇಳಲಿಚ್ಛಿಸದ ಬೈಡೆನ್‌ ಸರ್ಕಾರದ ಅಧಿಕಾರಿ, ಮೊದಲಿಂದಲೂ ನಾವಿದನ್ನು ಹೇಳಿಕೊಂಡೇ ಬರುತ್ತಿದ್ದೇವೆ ಎಂದಿದ್ದಾರೆ.