ಪಾಕ್‌ ಉಗ್ರ ಅಜರ್‌ ಮಸೂದ್‌: ಭಾರತಕ್ಕೆ ಅಡ್ಡಗಾಲು ಸಮರ್ಥಿಸಿಕೊಂಡ ಚೀನ

ವಾಷಿಂಗ್ಟನ್‌ : ಪಾಕಿಸ್ಥಾನದ ಜೈಶ್‌ ಎ ಮೊಹಮ್ಮದ್‌ ಉಗ್ರ ಸಂಘಟನೆಯ ಮುಖ್ಯಸ್ಥನಾಗಿರುವ ಅಜರ್‌ ಮಸೂದ್‌ನನ್ನು ಜಾಗತಿಕ ಉಗ್ರನೆಂದು ವಿಶ್ವಸಂಸ್ಥೆಯು ಘೋಷಿಸುವ ಭಾರತದ ನಿರಂತರ ಯತ್ನಕ್ಕೆ ತಾನು ಒಡ್ಡಿರುವ ತಡೆಯನ್ನು ಚೀನ ಸಮರ್ಥಿಸಿಕೊಂಡಿದೆ. 

“ಅಜರ್‌ ಮಸೂದ್‌ ನನ್ನು ಜಾಗತಿಕ ಉಗ್ರನೆಂದು ಘೋಷಿಸುವ ದಿಶೆಯಲ್ಲಿ ವಿಶ್ವ ಸಂಸ್ಥೆಯ ಭದ್ರತಾ ಮಂಡಳಿಯ ಸದಸ್ಯರಲ್ಲಿ ಒಮ್ಮತವಿಲ್ಲ; ಮೇಲಾಗಿ ಈತನ ವಿಷಯದಲ್ಲಿ ನೇರ ಕಕ್ಷಿದಾರರಾಗಿರುವ ಭಾರತ ಮತ್ತು ಪಾಕಿಸ್ಥಾನದಲ್ಲೂ  ಈ ಬಗ್ಗೆ  ಒಮ್ಮತವಿಲ್ಲ’ ಎಂದು ಹೇಳುವ ಮೂಲಕ ಚೀನದ ವಿದೇಶ ಸಚಿವ ವಾಂಗ್‌ ಯೀ ಅವರು ಚೀನದ ಕ್ರಮವನ್ನು ಸಮರ್ಥಿಸಿಕೊಂಡಿದ್ದಾರೆ. 

2016ರಲ್ಲಿ  17 ಭದ್ರತಾ ಸಿಬಂದಿಗಳನ್ನು ಬಲಿ ಪಡೆದ ಕಾಶ್ಮೀರದಲ್ಲಿನ ಉರಿ ಸೇನಾ ನೆಲೆಯ ಮೇಲಿನ ದಾಳಿಯ ಸಹಿತ  ಭಾರತದಲ್ಲಿ ಹಲವು ಉಗ್ರ ದಾಳಿಗಳನ್ನು ನಡೆಸಿದ ಆರೋಪ ಜೆಇಎಂ ವಿರುದ್ಧ ಇದೆ. 

ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ವಿಟೋ ಅಸ್ತ್ರ ಪ್ರಯೋಗಿಸುವ ಖಾಯಂ ಸದಸ್ಯ ಚೀನ, ಭಾರತದ ಯತ್ನಕ್ಕೆ ತಡೆ ಒಡ್ಡುವಲ್ಲಿ ಅಮೆರಿಕ, ಬ್ರಿಟನ್‌ ಮತ್ತು ಫ್ರಾನ್ಸ್‌ ನ ಬೆಂಬಲ ಪಡೆದಿದೆ. ಅಲ್‌ ಕಾಯಿದಾ ನಿಷೇಧ ಸಮಿತಿಯಡಿ ಮಸೂದ್‌ ಅಜರ್‌ನನ್ನು ವಿಶ್ವಸಂಸ್ಥೆಯು  ಜಾಗತಿಕ ಉಗ್ರನೆಂದು ಘೋಷಿಸುವಂತೆ  ಮಾಡುವ ಭಾರತದ ಪ್ರಯತ್ನ ಚೀನದ ನಿರಂತರ ತಡೆಯಿಂದಾಗಿ ಈ ತನಕವೂ ಸಫ‌ಲವಾಗಿಲ್ಲ.