ಚೀನದ ಹೊಸ ತಲೆಮಾರಿನ ಬೃಹತ್‌ ನೌಕಾ ವಿನಾಶಕ ಸಮರ ನೌಕೆಗೆ ಚಾಲನೆ

ಬೀಜಿಂಗ್‌ : ಜಗತ್ತಿನ ಬೃಹತ್‌ ನೌಕಾಶಕ್ತಿಯಾಗುವ ಮಹತ್ವಾಕಾಂಕ್ಷೆಯೊಂದಿಗೆ ತನ್ನ ನೌಕಾಪಡೆಯ ವ್ಯಾಪಕ ವಿಸ್ತರಣೆಯನ್ನು ಕೈಗೊಂಡಿರುವ ಚೀನ ಈ ಯೋಜನೆಯ ಅಂಗವಾಗಿ ರೂಪಿಸಿರುವ 10,000 ಟನ್‌ ಸಾಮರ್ಥ್ಯದ ಹೊಸ ತಲೆಮಾರಿನ “ನೌಕಾ ವಿನಾಶಕ’ ಸಮರ ನೌಕೆಯನ್ನು ಇಂದು ಚಾಲನೆಗೊಳಿಸಿದೆ. 

ಚೀನದಲ್ಲಿ ದೇಶೀಯವಾಗಿ ವಿನ್ಯಾಸಗೊಳಿಸಿ ನಿರ್ಮಿಸಲಾಗಿರುವ ಈ ಅತ್ಯಾಧುನಿಕ ನೌಕಾ ವಿನಾಶಕ ಸಮರ ನೌಕೆಯನ್ನು ಶಾಂಘೈನಲ್ಲಿನ ಜಿಯಾಂಗ್‌ನನ್‌ ಹಡಗುಕಟ್ಟೆಯಲ್ಲಿ ಇಂದು ಚಾಲನೆಗೊಳಿಸಲಾಯಿತು. 

ಚೀನ ದೇಶೀಯವಾಗಿ ನಿರ್ಮಿಸಿರುವ ಮೊತ್ತ ಮೊದಲ ಹೊಸ ತಲೆಮಾರಿನ ನೌಕಾ ವಿನಾಶಕ ವಾಗಿರುವ ಈ ಸಮರ ನೌಕೆಯು ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆ, ಕ್ಷಿಪಣಿ ವಿರೋಧಿ ವ್ಯವಸ್ಥೆ ಹಾಗೂ ನೌಕೆ ಮತ್ತು ಜಲಾಂತರ್ಗಾಮಿಯನ್ನು ಹೊಡೆದು ಹಾಕುವ ವಿನಾಶಕ ವ್ಯವಸ್ಥೆಯನ್ನು ಹೊಂದಿದೆ ಎಂದು ಚೀನದ ಸರಕಾರದ ಒಡೆತನದ ಸುದ್ದಿ ಸಂಸ್ಥೆ ಕ್ಸಿನ್‌ ಹುವಾ ವರದಿ ಮಾಡಿದೆ. 

ಚೀನವು ಈ ಬೃಹತ್‌ ವಿನಾಶಕ ನೌಕೆಯನ್ನು ಹಿಂದೂ ಮಹಾಸಾಗರದಲ್ಲಿ ಅಮೆರಿಕ ಮತ್ತು ಭಾರತದ ನೌಕಾ ಶಕ್ತಿಗೆ ಸಡ್ಡು ಹೊಡೆಯಲು ನಿಯೋಜಿಸುವುದೆಂದು ತಿಳಿದು ಬಂದಿದೆ.