ಒತ್ತಡದಲ್ಲಿವೆ ಚಿಲಿ ಆಸ್ಪತ್ರೆಗಳು : 70 ಸಾವಿರ ಮಂದಿ ಸೋಂಕು ಪೀಡಿತರು

ಸ್ಯಾಂಟಿಯಾಗೋ: ಕೋವಿಡ್‌ ಸೋಂಕು ಚಿಲಿಯ ಆರೋಗ್ಯ ವ್ಯವಸ್ಥೆಯನ್ನು ತೀವ್ರ ಒತ್ತಡಕ್ಕೆ ತಳ್ಳಿದೆ. ಗರಿಷ್ಠ ಮಿತಿಗೆ ತೀರ ಸಮೀಪದಲ್ಲಿದೆ ಎಂದು ಅಲ್ಲಿನ ಅಧ್ಯಕ್ಷ ಸೆಬಾಸ್ಟಿಯನ್‌ ಪಿನೆರಾ ಅವರೇ ಹೇಳಿಕೊಂಡಿದ್ದಾರೆ.

ಚಿಲಿಯಲ್ಲಿ ಈವರೆಗೆ ಸುಮಾರು 70 ಸಾವಿರ ಮಂದಿ ಸೋಂಕು ಪೀಡಿತರಾಗಿದ್ದು, 700 ಜನರು ಪ್ರಾಣತ್ಯಾಗ ಮಾಡಿದ್ದಾರೆ. ಚಿಲಿಯ ರಾಜಧಾನಿ ಸ್ಯಾಂಟಿಯಾಗೋ ಇನ್ನೂ ಕಠಿನ ಲಾಕ್‌ಡೌನ್‌ ನಿಯಮ ಅನುಸರಿಸುತ್ತಿದ್ದು, ಸೋಂಕಿನ ಕೇಂದ್ರ ಸ್ಥಾನವಾಗಿಯೂ ಗುರುತಿಸಿಕೊಂಡಿದೆ.

ಇತ್ತೀಚೆಗೆ ಅಲ್ಲಿ ಆಹಾರದ ಕೊರತೆ ಉಂಟಾಗಿ ಪೊಲೀಸರು ಹಾಗೂ ಪ್ರತಿಭಟನಕಾರರ ನಡುವೆ ಸಂಘರ್ಷವೂ ಏರ್ಪಟ್ಟಿತ್ತು.

ಕೋವಿಡ್‌ ಸೋಂಕಿತರ ಚಿಕಿತ್ಸೆಗಾಗಿ ರವಿವಾರ ಬಯಲು ಆಸ್ಪತ್ರೆಯನ್ನು ಉದ್ಘಾಟಿಸಿದ ಅವರು, ಐಸಿಯುಗಳು, ಹಾಸಿಗೆಗಳು ಹಾಗೂ ವೆಂಟಿಲೇಟರ್‌ಗಳಿಗೂ ಬೇಡಿಕೆ ತೀವ್ರವಾಗಿದೆ ಎಂದು ತಿಳಿಸಿದ್ದಾರೆ. ಈ ವಾರಾಂತ್ಯ, ಚಿಲಿಯಲ್ಲಿ ಆರ್ಥಿಕ ಸಂಕಷ್ಟ ಎದುರಿಸುತ್ತಿರುವ ಜನರಿಗಾಗಿ ಆರ್ಥಿಕ ಪ್ಯಾಕೇಜ್‌ ಘೋಷಿಸುವ ನಿರೀಕ್ಷೆಯೂ ಇದೆ. ಸುಮಾರು 18 ಲಕ್ಷ ಜನರಿಗೆ ಇದರಿಂದ ನೆರವು ಸಿಗಲಿದೆ. ಇನ್ನೂ 30 ಲಕ್ಷ ಜನರಿಗೆ ಜೂ. 10ರಂದು ಆರ್ಥಿಕ ಪ್ಯಾಕೇಜ್‌ ನೀಡುವುದಾಗಿ ಅಧ್ಯಕ್ಷರು ತಿಳಿಸಿದ್ದಾರೆ.