ಚಂದರ್‌ಪಾಲ್‌ ಟಿ20 ದ್ವಿಶತಕ!

ಸಿಂಟ್‌ ಮಾರ್ಟೆನ್‌: ಬಿಸಿರಕ್ತದ ಹುಡುಗರ ಕ್ರಿಕೆಟ್‌ ಆಗಿರುವ ಟಿ20ಯಲ್ಲಿ 44ರ ಹರೆಯದ ಶಿವನಾರಾಯಣ್‌ ಚಂದರ್‌ಪಾಲ್‌ ದ್ವಿಶತಕ ಬಾರಿಸಿ ಸುದ್ದಿಯಾಗಿದ್ದಾರೆ. “ಆ್ಯಡಂ ಸ್ಯಾನ್‌ಫೋರ್ಡ್‌ ಕ್ರಿಕೆಟ್‌4ಲೈಫ್ ಟಿ20 ಟೂರ್ನಿ’ಯಲ್ಲಿ ಅವರು ಈ ಅಮೋಘ ಸಾಧನೆಗೈದರು.

ಅಮೆರಿಕ ಮೂಲದ ಮ್ಯಾಡ್‌ ಡಾಗ್ಸ್‌ ತಂಡದ ವಿರುದ್ಧ ಸ್ಫೋಟಕ ಬ್ಯಾಟಿಂಗ್‌ ಪ್ರದರ್ಶಿಸಿದ ಚಂದರ್‌ಪಾಲ್‌ ಕೇವಲ 76 ಎಸೆತಗಳಿಂದ 210 ರನ್‌ ಬಾರಿಸಿದರು. ಈ ಬ್ಯಾಟಿಂಗ್‌ ಅಬ್ಬರದ ವೇಳೆ 25 ಬೌಂಡರಿ, 13 ಸಿಕ್ಸರ್‌ ಸಿಡಿಸಿದರು.

ಚಂದರ್‌ಪಾಲ್‌ ಸಾಹಸದಿಂದ ಅವರ ತಂಡ 303 ರನ್‌ ಪೇರಿಸಿ 192 ರನ್‌ ಅಂತರದ ಭರ್ಜರಿ ಗೆಲುವು ಸಾಧಿಸಿತು. ಚಂದರ್‌ಪಾಲ್‌ 2008ರ ಐಪಿಎಲ್‌ನಲ್ಲಿ ಆರ್‌ಸಿಬಿ ಪರ 3 ಪಂದ್ಯಗಳನ್ನಾಡಿದ್ದನ್ನು ಇಲ್ಲಿ ನೆನಪಿಸಿಕೊಳ್ಳಬಹುದು.