ನವದೆಹಲಿ: ಭಾರತದಲ್ಲಿ ಬಿಟ್ ಕಾಯಿನ್ (ಕ್ರಿಫ್ಟೋಕರೆನ್ಸಿ)ಗೆ ಪೂರ್ಣ ನಿಷೇಧ ಹೇರಲು ಕೇಂದ್ರ ಸರ್ಕಾರ ಸಿದ್ಧತೆ ನಡೆಸುತ್ತಿರುವ ನಡುವೆಯೇ ಬುಧವಾರ (ನವೆಂಬರ್ 24) ಕ್ರಿಫ್ಟೋಕರೆನ್ಸಿಗಳ ಮೌಲ್ಯದಲ್ಲಿ ಭಾರೀ ಕುಸಿತ ಕಂಡಿದ್ದು, ಕೋಟ್ಯಂತರ ರೂಪಾಯಿ ನಷ್ಟ ಅನುಭವಿಸಿದೆ.
ಇದನ್ನೂ ಓದಿ:ಆದಷ್ಟು ಬೇಗ ವಾಪಸ್ಸಾಗುತ್ತೇನೆ ಎಂದು ವಿಮಾನ ಹತ್ತಿದ ರಶ್ಮಿಕಾ
ನಾವೇ ಡಿಜಿಟಲ್ ಕರೆನ್ಸಿ ಜಾರಿಗೊಳಿಸಬೇಕು ಎಂಬ ಆರ್ ಬಿಐ ಮನವಿ ಬೆನ್ನಲ್ಲೇ ಎಲ್ಲಾ ಕ್ರಿಫ್ಟೋಕರೆನ್ಸಿಗಳು ಶೇ.15ರಷ್ಟು ಕುಸಿತ ಕಂಡಿದೆ. ಇವುಗಳಲ್ಲಿ ಬಿಟ್ ಕಾಯಿನ್ ಮೌಲ್ಯದಲ್ಲಿ ಶೇ.18.53, ಎಥೇರಿಯಂ ಶೇ.15.58 ಹಾಗೂ ಟೆದರ್ ಮೌಲ್ಯದಲ್ಲಿ ಶೇ.18.29ರಷ್ಟು ಕುಸಿತವಾಗಿದೆ.
ಬಿಟ್ ಕಾಯಿನ್ ನಿಷೇಧಕ್ಕೆ ಕೇಂದ್ರ ಸರ್ಕಾರ ಮುಂದಾಗಿದ್ದು, ಈ ಹಿನ್ನೆಲೆಯಲ್ಲಿ ನ.29ರಿಂದ ಆರಂಭವಾಗಲಿರುವ ಸಂಸತ್ ನ ಚಳಿಗಾಲದ ಅಧಿವೇಶನದಲ್ಲಿ ಕ್ರಿಫ್ಟೋ ಕರೆನ್ಸಿ ಮತ್ತು ಅಧಿಕೃತ ಡಿಜಿಟಲ್ ಕರೆನ್ಸಿ ವಿಧೇಯಕ 2021 ವಿಧೇಯಕ ಮಂಡನೆಗೆ ಸಿದ್ಧತೆ ನಡೆಸಿದೆ.
ಸದ್ಯ ಖಾಸಗಿಯಾಗಿ ಚಾಲ್ತಿಯಲ್ಲಿರುವ ಕ್ರಿಫ್ಟೋ ಕರೆನ್ಸಿಗಳಿಗೆ ನಿಷೇಧ ಹೇರಿ, ಈಗಾಗಲೇ ಚರ್ಚೆಯಲ್ಲಿರುವಂತೆ ಭಾರತೀಯ ರಿಸರ್ವ್ ಬ್ಯಾಂಕ್ ನಿಂದಲೇ ಡಿಜಿಟಲ್ ಕರೆನ್ಸಿ ಜಾರಿ ಮಾಡುವ ಬಗ್ಗೆಯೂ ವಿಧೇಯಕದಲ್ಲಿ ಉಲ್ಲೇಖಿಸಲಾಗಿದೆ.
ಭಾರತದಲ್ಲಿ ಅಂದಾಜಿನ ಪ್ರಕಾರ 15 ರಿಂದ 20 ಮಿಲಿಯನ್ ಕ್ರಿಫ್ಟೋ ಕರೆನ್ಸಿ ಹೂಡಿಕೆದಾರರಿದ್ದು, ಅಂದಾರು ಮೌಲ್ಯ 40,000 ಕೋಟಿ ಎಂದು ವರದಿ ಹೇಳಿದೆ. ಕ್ರಿಫ್ಟೋ ಕರೆನ್ಸಿ ಮೇಲೆ ಹೂಡಿಕೆ ಮಾಡುವುದರಿಂದ ಅಧಿಕ ಲಾಭವಿದೆ ಎಂಬ ಪ್ರಚಾರವೂ ಹೆಚ್ಚಳವಾಗುತ್ತಿದೆ.
