ಪಿಒಕೆ ಕುಟುಂಬಗಳಿಗೆ ಕೇಂದ್ರ ಸರಕಾರ ನೆರವು

ಹೊಸದಿಲ್ಲಿ: ಮಹತ್ವದ ಬೆಳವಣಿಗೆ ಯಲ್ಲಿ ಪಾಕ್‌ ಆಕ್ರಮಿತ ಕಾಶ್ಮೀರದಿಂದ ಭಾರತಕ್ಕೆ ಆಗಮಿಸಿದ 5300 ಕುಟುಂಬಗಳಿಗೆ ತಲಾ 5.5 ಲಕ್ಷ ರೂ. ಪರಿಹಾರವನ್ನು ಒದಗಿಸಲು ಕೇಂದ್ರ ಸಚಿವ ಸಂಪುಟ ಅನುಮೋದನೆ ನೀಡಿದೆ.

ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದಲ್ಲಿ ಬುಧವಾರ ಸಭೆ ನಡೆದಿತ್ತು.
1947ರಲ್ಲಿ ದೇಶ ವಿಭಜನೆಯ ವೇಳೆ ಪಾಕ್‌ ಆಕ್ರಮಿತ ಕಾಶ್ಮೀರದಿಂದ ಭಾರತಕ್ಕೆ ಆಗಮಿಸಿ ಜಮ್ಮುವಿನಲ್ಲಿ ನೆಲೆ ಕಂಡುಕೊಂಡ ಕುಟುಂಬಗಳಿಗೆ ಈ ಹಿಂದೆ 2016ರಲ್ಲಿ ಕೇಂದ್ರ ಸರಕಾರವು ಪರಿಹಾರ ನೀಡಿತ್ತು. ಆದರೆ ದೇಶದ ಇತರ ಭಾಗಗಳಲ್ಲಿ ನೆಲೆ ಕಂಡುಕೊಂಡವರಿಗೆ ಈ ಪರಿಹಾರ ಲಭ್ಯವಾಗಿರಲಿಲ್ಲ. ಜಮ್ಮುವಿನಲ್ಲಿ ಸುಮಾರು 26,319 ಕುಟುಂಬಗಳಿದ್ದರೆ, ದೇಶದ ಇತರ ಭಾಗಗಳಲ್ಲಿ ಒಟ್ಟು 5300 ಕುಟುಂಬಗಳಿವೆ. ಇದೆ ರೀತಿ 1965 ಮತ್ತು 1971ರ ಯುದ್ಧದ ಸಮಯದಲ್ಲೂ 10 ಸಾವಿರ ಕುಟುಂಬಗಳು ನಿರಾಶ್ರಿತವಾಗಿದ್ದವು.
ಅವಧಿ ವಿಸ್ತರಣೆ: ಪ್ರಧಾನ ಮಂತ್ರಿ ಕಿಸಾನ್‌ ಸಮ್ಮಾನ್‌ ನಿಧಿ ಯೋಜನೆ ಅಡಿಯಲ್ಲಿ ರೈತರು ವಾರ್ಷಿಕ 6 ಸಾವಿರ ರೂ. ಸಹಾಯಧನ ಪಡೆಯುವುದಕ್ಕಾಗಿ ಆಧಾರ್‌ ಜೋಡಣೆ ಮಾಡಲು ನ.30ರ ವರೆಗೆ ಕಾಲಾವಕಾಶವನ್ನು ಸರಕಾರ ನೀಡಿದೆ. ಈ ಯೋಜನೆ ಅಡಿಯಲ್ಲಿ ಆಗಸ್ಟ್‌ 1 ರಿಂದಲೇ ಆಧಾರ್‌ ಜೋಡಣೆ ಕಡ್ಡಾಯ ವಾಗಿತ್ತು. ಆದರೆ ಈ ಅವಧಿಯನ್ನು ನವೆಂಬರ್‌ 30ರ ವರೆಗೆ ಕೇಂದ್ರ ಸರಕಾರ ಮುಂದೂಡಿದೆ. ಈಗಾಗಲೇ ಈ ಯೋಜನೆ ಅಡಿಯಲ್ಲಿ 7 ಕೋಟಿ ರೈತರಿಗೆ ಸಹಾಯ ಧನ ಲಭ್ಯವಾಗಿದೆ.