Padubidri: ಮನೆಗೆ ಅಕ್ರಮ ಪ್ರವೇಶ… ಡಿವಿಆರ್‌ಗೆ ಹಾನಿ, 25000 ರೂ. ನಷ್ಟ

ಪಡುಬಿದ್ರಿ: ಹೆಜಮಾಡಿ ಕೋಡಿಯಲ್ಲಿ ರಜನಿ ಅವರು ತನ್ನ ತಂದೆಯವರದ್ದಾದ ಮೊಗವೀರ ಸಭಾಕ್ಕೆ ಸೇರಿದ ಜಾಗದಲ್ಲಿ ಹೆಜಮಾಡಿ ಗ್ರಾಮ ಮೊಗವೀರ ಸಭಾದಿಂದ ಮನೆ ಕಟ್ಟಲು ಒಪ್ಪಿಗೆ ಪತ್ರ, ಹೆಜಮಾಡಿ ಗ್ರಾಮ ಪಂಚಾಯತ್‌ನಿಂದ ಪರವಾನಿಗೆ ಪಡೆದು ಕಟ್ಟಿದ ಮನೆಗೆ ಅಕ್ರಮ ಪ್ರವೇಶ ಮಾಡಿರುವ ಆರೋಪಿ ಸಹೋದರಿಯರಾದ ರೇಖಾ, ಹೇಮಾ ಹಾಗೂ ಅವರ ಮಕ್ಕಳಾದ ಶ್ರೀಶಾ, ಧೀರಜ್‌ ಅವರು ಮನೆಗೆ ಅಳವಡಿಸಿದ್ದ ಸಿಸಿ ಟಿವಿ ಡಿವಿಆರ್‌ನ ಕೇಬಲ್‌ಗ‌ಳನ್ನು ಹಾನಿಗೊಳಿಸಿ 25000 ರೂ. ನಷ್ಟವುಂಟುಮಾಡಿರುವುದಾಗಿ ಪಡುಬಿದ್ರಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮನೆ ಕಟ್ಟುವಾಗ ಸಹೋದರ ಸಹೋದರಿಯರು ಸಹಕರಿಸಿರಲಿಲ್ಲ. ಆದರೂ ಮನೆ ಖಾಲಿ ಇರದಂತೆ ತಂಗಿ ಹೇಮಾ ಅವರಿಗೆ ಮನೆಯಲ್ಲಿ ವಾಸವಿರುವಂತೆ ಹೇಳಿದ್ದರು. ಆದರೆ ಕಳೆದ ಎಪ್ರಿಲ್‌ ತಿಂಗಳಲ್ಲಿ ಮನಸ್ತಾಪ ಬಂದು ಪರಸ್ಪರ ಹಲ್ಲೆ ಯತ್ನಗಳೂ ನಡೆದಿದ್ದು, ಪಡುಬಿದ್ರಿ ಠಾಣೆಗೂ ದೂರು ನೀಡಲಾಗಿತ್ತು. ಮೇ 22ರಂದು ಮನೆಗೆ ಸಿಸಿ ಟಿವಿ ಅಳವಡಿಸಿ ಬೀಗ ಹಾಕಿ ಮುಂಬಯಿಗೆ ರಜನಿ ಅವರು ಹೋಗಿದ್ದಾಗ ಅಕ್ರಮ ಪ್ರವೇಶ ಮಾಡಿ ಡಿವಿಆರ್‌ ಕೇಬಲ್‌ಗ‌ಳನ್ನು ಹಾನಿಗೊಳಿಸಲಾಗಿದೆ ಎಂದು ಪೊಲೀಸರಿಗಿತ್ತ ದೂರಲ್ಲಿ ತಿಳಿಸಲಾಗಿದೆ.