By Election: ಮಾತಿನ ಭರದಲ್ಲಿ ವಿಜಯೇಂದ್ರಗೂ ಪಾಲು ಎಂದ ಶ್ರೀರಾಮುಲು!

ಬಳ್ಳಾರಿ: ಬಿಜೆಪಿ ಯುವ ಸಮಾವೇಶದಲ್ಲಿ ಭಾಷಣದ ವೇಳೆ ವಾಲ್ಮೀಕಿ ನಿಗಮದ ಹಗರಣದಲ್ಲಿ ನಾಗೇಂದ್ರ ನೂರಾರು ಕೋಟಿ ತಿಂದಿದ್ದಾರೆ ಎಂದ ಮಾಜಿ ಸಚಿವ ಬಿ. ಶ್ರೀರಾಮುಲು ಮಾತಿನ ಭರದಲ್ಲಿ ಸಂಸದ ಈ. ತುಕಾರಾಂಗೂ ಪಾಲು ಹೋಗಿದೆ ಎನ್ನುವ ಬದಲಿಗೆ ವಿಜಯೇಂದ್ರರಿಗೂ ಪಾಲು ಹೋಗಿದೆ ಎಂದರು.

ಇದರಿಂದ ವೇದಿಕೆಯಲ್ಲಿದ್ದ ಎಲ್ಲರೂ ಈ. ತುಕಾರಾಂ ಎಂದ ಬಳಿಕ ಪುನಃ ತುಕಾರಾಂ ಎಂದು ಮಾತು ಆರಂಭಿಸಿದರು. ಶ್ರೀರಾಮುಲು ಮಾತನ್ನು ಕೇಳಿದ ವಿಜಯೇಂದ್ರ, ಶ್ರೀರಾಮುಲುರತ್ತ ನೋಡಿ ನಗೆ ಬೀರಿದ ಪ್ರಸಂಗ ನಡೆಯಿತು.

ಹಿಂದಿನ ಜನ್ಮದ ಕರ್ಮ ಈಗ ಅನುಭವಿಸುತ್ತಿದ್ದೇನೆ: ರೆಡ್ಡಿ
ಬಳ್ಳಾರಿ: ಈ ಜನ್ಮದಲ್ಲಿ ತಪ್ಪು ಮಾಡದಿದ್ದರೂ ಹಿಂದಿನ ಜನ್ಮದ ಕರ್ಮವನ್ನು ಈ ಜನ್ಮದಲ್ಲಿ ಅನುಭವಿಸುತ್ತಿದ್ದೇನೆ. ನನಗೆ ತೊಂದರೆ ಕೊಟ್ಟವರಿಗೂ ಈಗ ಅದೇ ಕರ್ಮ ಅನುಭವಿಸುವ ದಿನಗಳು ಹತ್ತಿರವಾಗುತ್ತಿವೆ ಎಂದು ಶಾಸಕ ಜಿ. ಜನಾರ್ದನ ರೆಡ್ಡಿ ಹೇಳಿದರು.

ಸಂಡೂರು ಕ್ಷೇತ್ರದ ಚೋರನೂರು ಗ್ರಾಮದಲ್ಲಿ ಬಿಜೆಪಿ ಯುವ ಸಮಾವೇಶ ಉದ್ಘಾಟಿಸಿ ಮಾತನಾಡಿದ ಅವರು, ಸಂಡೂರು ಕ್ಷೇತ್ರದಲ್ಲಿ ಈವರೆಗೆ ಒಮ್ಮೆಯೂ ಬಿಜೆಪಿ ಗೆದ್ದಿಲ್ಲ. ಈ ಉಪಚುನಾವಣೆಯಲ್ಲಿ ಬಿಜೆಪಿ ಗೆಲ್ಲಿಸುವ ಮೂಲಕ ಮುಂಬರುವ 2028ರ ಚುನಾವಣೆಯಲ್ಲಿ 150 ಸ್ಥಾನ ಗೆಲ್ಲಲು ಇಲ್ಲಿಂದಲೇ ಭದ್ರ ಬುನಾದಿಯಾಗಲಿದೆ ಎಂದರು.