“ಸ್ಥಳೀಯ ಮಟ್ಟದಲ್ಲೇ ರೇಬಿಸ್‌ ಲಸಿಕೆ ಖರೀದಿಸಿ’

ಬೆಂಗಳೂರು: ಆರೋಗ್ಯ ಇಲಾಖೆಯ ಆ್ಯಂಟಿ ರೇಬಿಸ್‌ ಲಸಿಕೆ ಟೆಂಡರ್‌ ಪ್ರಕ್ರಿಯೆ ಪೂರ್ಣಗೊಳ್ಳದ ಕಾರಣ ರಾಜ್ಯದೆಲ್ಲೆಡೆ ಲಸಿಕೆ ಕೊರತೆ ಉಂಟಾಗಿದೆ. ಈ ಹಿನ್ನೆಲೆಯಲ್ಲಿ ಸರ್ಕಾರಿ ಆಸ್ಪತ್ರೆಗಳೇ ಈ ಲಸಿಕೆಯನ್ನು ಸ್ಥಳೀಯವಾಗಿ ಖರೀದಿಸುವ ಮೂಲಕ ರೋಗಿಗಳಿಗೆ ಚಿಕಿತ್ಸೆ ನೀಡುವಂತೆ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಸುತ್ತೋಲೆ ಹೊರಡಿಸಿದೆ.

ಲಸಿಕೆ ಖರೀದಿಗಾಗಿ ಕಳೆದ ವರ್ಷವೇ ಅನುಮೋದನೆ ದೊರೆತಿತ್ತು. ಅಂತೆಯೇ ಕೆ.ಡಿ.ಎಲ್‌. ಡಬ್ಲೂ.ಎಸ್‌ ಸಂಸ್ಥೆಯು ಎರಡು ಬಾರಿ ಟೆಂಡರ್‌ ಕರೆಯಲಾಗಿತ್ತು. ಟೆಂಡರ್‌ಗೆ ಸೂಕ್ತ ಪ್ರತಿಕ್ರಿಯೆ ಬಂದಿಲ್ಲ. ಈಗ ಮರು ಟೆಂಡರ್‌ ಕರೆಯಲು ಆರೋಗ್ಯ ಇಲಾಖೆ ಮುಂದಾಗಿದೆ.

ಈ ಬಾರಿಯ ಟೆಂಡರ್‌ ಪ್ರಕ್ರಿಯೆ ಪೂರ್ಣವಾಗಿ ರೇಬಿಸ್‌ ಲಸಿಕೆಗಳು ಜಿಲ್ಲಾಮಟ್ಟದ ಉಗ್ರಾಣಗಳನ್ನು ಸೇರಲು ಕನಿಷ್ಠ ಮುರ್‍ನಾಲ್ಕು ತಿಂಗಳಾಗಲಿದೆ. ಹೀಗಾಗಿ, ಎಲ್ಲಾ ಹಂತದ ಸರ್ಕಾರಿ ಆಸ್ಪತ್ರೆಗಳು ತಮ್ಮ ಹಂತದಲ್ಲೇ ಲಭ್ಯವಿರುವ ಅನುದಾನದಲ್ಲಿ (ಇಂಜ್‌ ಆ್ಯಂಟಿ ರೇಬಿಸ್‌ ವ್ಯಾಕ್ಸಿನ್‌/ಇಂಜೆಕ್ಷನ್‌, 2.51ಯು 1 ಎಂಎಲ್‌ ಅನ್ನು) ಸ್ಥಳೀಯ ಮಟ್ಟದಲ್ಲಿಯೇ ಖರೀದಿಸಿ ರೋಗಿಗಳಿಗೆ ಲಸಿಕೆ ಕೊರತೆ ಆಗದಂತೆ ಚಿಕಿತ್ಸೆ ನೀಡಲು ಸೂಚಿಸಿದೆ.

ಖರೀದಿಯಲ್ಲಿ ಯಾವುದೇ ಲೋಪವಾಗದಂತೆ ಕ್ರಮ ವಹಿಸಬೇಕು. ತಪ್ಪಿದಲ್ಲಿ ಅಧಿಕಾರಿಗಳು ಮತ್ತು ಸಿಬ್ಬಂದಿ ವಿರುದ್ಧ ಶಿಸ್ತುಕ್ರಮ ಜರುಗಿಸಲಾಗುವುದು ಎಂದು ಸುತ್ತೋಲೆಯಲ್ಲಿ ತಿಳಿಸಲಾಗಿದೆ.