IPL: ಬಟ್ಲರ್‌ ಗೈರು, ಸ್ಯಾಮ್ಸನ್‌ ವೈಫ‌ಲ್ಯ ರಾಜಸ್ಥಾನ್‌ ಸೋಲಿಗೆ ಕಾರಣ

ಚೆನ್ನೈ: 16 ವರ್ಷಗಳ ಬಳಿಕ 2ನೇ ಐಪಿಎಲ್‌ ಟ್ರೋಫಿ ಗೆಲ್ಲಲು ಇದ್ದ ಅವಕಾಶವೊಂದನ್ನು ರಾಜಸ್ಥಾನ್‌ ರಾಯಲ್ಸ್‌ ಕಳೆದುಕೊಂಡಿದೆ. ಇಂಗ್ಲೆಂಡ್‌ ಪ್ರಮುಖ ಆರಂಭಿಕ ಬ್ಯಾಟರ್‌ ಜೋಸ್‌ ಬಟ್ಲರ್‌ ಅನುಪಸ್ಥಿತಿ ಮತ್ತು ನಾಯಕ ಸಂಜು ಸ್ಯಾಮ್ಸನ್‌ ಅಸ್ಥಿರ ಬ್ಯಾಟಿಂಗ್‌ ರಾಜಸ್ಥಾನ್‌ ಸೋಲಿಗೆ ಕಾರಣ ಎಂದು ವಿಶ್ಲೇಷಿಸಲಾಗಿದೆ. ಶುಕ್ರವಾರ ನಡೆದ ಕ್ವಾಲಿಫೈಯರ್‌-2ರಲ್ಲಿ ಎಲ್ಲರ ನಿರೀಕ್ಷೆಗಳನ್ನು ಹುಸಿಮಾಡಿ, ಹೈದ್ರಾಬಾದ್‌ ವಿರುದ್ಧ ಸಂಜು ಸ್ಯಾಮ್ಸನ್‌ ಪಡೆ 36 ರನ್‌ಗಳಿಂದ ಸೋತುಹೋಯಿತು.

ಟಾಸ್‌ ವೇಳೆ ಎಡವಟ್ಟು: ಶುಕ್ರವಾರದ ಪಂದ್ಯದಲ್ಲಿ ರಾಜಸ್ಥಾನ್‌ ಟಾಸ್‌ ವೇಳೆಯೇ ಎಡವಿತು ಎನ್ನಬಹುದು. ಯಾಕೆಂದರೆ, ಚೆನ್ನೈ ಪಿಚ್‌ನಲ್ಲಿ 2ನೇ ಇನಿಂಗ್ಸ್‌ ವೇಳೆ ಇಬ್ಬನಿ ಬೀಳುವ ಸಾಧ್ಯತೆಯಿಲ್ಲ. ಹೀಗಾಗಿ ಮೊದಲು ಬ್ಯಾಟಿಂಗ್‌ ಆಯ್ದುಕೊಳ್ಳುವುದೇ ಉತ್ತಮ ಎಂದು ವರದಿಗಳು ಹೇಳುತ್ತಿದ್ದರೂ ಕೂಡ ಟಾಸ್‌ ಗೆದ್ದ ಬಳಿಕ ಸ್ಯಾಮ್ಸನ್‌ ಬೌಲಿಂಗ್‌ ಆಯ್ದುಕೊಂಡು, ಸೋಲನ್ನು ಬರಮಾಡಿಕೊಂಡರು.

ಬಲವಾಗಿ ನಿಲ್ಲದ ಬ್ಯಾಟರ್‌ಗಳು: ಮೊದಲು ಬ್ಯಾಟಿಂಗ್‌ ಮಾಡಿದ ಹೈದ್ರಾಬಾದ್‌ 175 ರನ್‌ ಸಾಮಾನ್ಯ ಮೊತ್ತ ಗಳಿಸಿತ್ತು. ರನ್‌ ಬೆನ್ನತ್ತಲು ರಾಜಸ್ಥಾನ್‌ ಪೂರ್ಣ ವೈಫ‌ಲ್ಯ ಕಂಡು 139 ರನ್‌ ಮಾತ್ರ ಗಳಿಸಿತು. ತಂಡದ ಬ್ಯಾಟರ್‌ಗಳು ಪೂರ್ಣವಾಗಿ ಕೈಕೊಟ್ಟರು.