ಉತ್ತಮ ಮುಂಗಾರು ಭವಿಷ್ಯ: ಮುಂಬಯಿ ಶೇರು 268 ಅಂಕ ಜಿಗಿತ

ಮುಂಬಯಿ : ಈ ಬಾರಿಯ ಮುಂಗಾರು ಮಳೆ ಚೆನ್ನಾಗಿರುವುದೆಂದು ಹವಾಮಾನ ಇಲಾಖೆ ಪ್ರಕಟಿಸಿರುವ ವರದಿಯಿಂದ ಗರಿಗೆದರಿದ ಮುಂಬಯಿ ಶೇರು ಪೇಟೆಯ ಸೆನ್ಸೆಕ್ಸ್‌ ಸೂಚ್ಯಂಕ ಇಂದು ಬುಧವಾರದ ಆರಂಭಿಕ ವಹಿವಾಟಿನಲ್ಲಿ 160 ಅಂಕಗಳ ನೆಗೆತವನ್ನು ದಾಖಲಿಸಿ 30,000 ಗಡಿಯನ್ನು ದಾಟಿ ವಿಜೃಂಭಿಸಿತು.

ಬೆಳಗ್ಗೆ 11 ಗಂಟೆಯ ಹೊತ್ತಿಗೆ ಮತ್ತಷ್ಟು ಉಜ್ವಲವಾಗಿ ಹೊಳೆದು ಕಾಣಿಸಿದ ಸೆನ್ಸೆಕ್ಸ್‌ 268.55 ಅಂಕಗಳ ಮುನ್ನಡೆಯೊಂದಿಗೆ 30,181 ಅಂಕಗಳ ಮಟ್ಟದಲ್ಲೂ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 67.80 ಅಂಕಗಳ ಮುನ್ನಡೆಯೊಂದಿಗೆ 9,384.65 ಅಂಕಗಳ ಮಟ್ಟದಲ್ಲೂ ವ್ಯವಹಾರ ನಿರತವಾಗಿತ್ತು.

ಇಂದಿನ ಆರಂಭಿಕ ವಹಿವಾಟಿನಲ್ಲಿ ಅತ್ಯಂತ ಕ್ರಿಯಾಶೀಲವಾಗಿದ್ದ ಶೇರುಗಳೆಂದರೆ ಭಾತಿ ಏರ್‌ಟೆಲ್‌, ರಿಲಯನ್ಸ್‌, ಎಚ್‌ಯುಎಲ್‌, ಅರಬಿಂದೋ ಫಾರ್ಮಾ ಮತ್ತು ಐಸಿಐಸಿಐ ಬ್ಯಾಂಕ್‌.

ಯುರೋಪ್‌ ಹಾಗೂ ಅಮೆರಿಕ ಶೇರು ಮಾರುಕಟ್ಟೆಗಳಲ್ಲಿ ತೇಜಿ ಕಂಡು ಬಂದ ಹಿನ್ನೆಲೆಯಲ್ಲಿ  ಏಶ್ಯನ್‌ ಶೇರು ಮಾರುಕಟ್ಟೆಗಳು ಇಂದು ತೃಪ್ತಿಕರ ಏರಿಕೆಯನ್ನು ಕಂಡವು. ಹಾಂಕಾಂಗ್‌ನ ಹ್ಯಾಂಗ್‌ಸೆಂಗ್‌ ಶೇ.0.64, ಜಪಾನಿನ ನಿಕ್ಕಿ ಶೇ.0.30 ಮತ್ತು ಶಾಂಘೈ ಕಾಂಪೋಸಿಟ್‌ ಇಂಡೆಕ್ಸ್‌ ಶೇ.0.18ರ ಏರಿಕೆಯನ್ನು ದಾಖಲಿಸಿದವು.