10, 12ನೇ ತರಗತಿ ಪರೀಕ್ಷೆ ವೇಳೆ ಹುಡುಗಿಯರಿಗೆ ವಿರಾಮ: ಕೇಂದ್ರ

ಹೊಸದಿಲ್ಲಿ: 10 ಮತ್ತು 12ನೇ ತರಗತಿ ಮಂಡಳಿ ಪರೀಕ್ಷೆ ವೇಳೆ ವಿದ್ಯಾರ್ಥಿನಿಯರಿಗೆ ರೆಸ್ಟ್‌ರೂಂ ವಿರಾಮ ನೀಡಬೇಕು ಮತ್ತು ಎಲ್ಲ ಪರೀಕ್ಷಾ ಕೇಂದ್ರಗಳಲ್ಲಿ ಉಚಿತ ಸ್ಯಾನಿಟರಿ ನ್ಯಾಪ್‌ಕಿನ್‌ಗಳು ಲಭ್ಯವಾಗಿರುವಂತೆ ನೋಡಿಕೊಳ್ಳಬೇಕು ಎಂದು ಕೇಂದ್ರ ಶಿಕ್ಷಣ ಸಚಿವಾಲಯವು ದೇಶದ ಎಲ್ಲ ಶಾಲೆಗಳಿಗೆ ಸೂಚಿಸಿದೆ.

ಈ ಕುರಿತು ಎಲ್ಲ ರಾಜ್ಯ ಮತ್ತು ಕೇಂದ್ರಾಡಳಿತ ಹಾಗೂ ಕೇಂದ್ರೀಯ, ನವೋದಯ ವಿದ್ಯಾಲಯಗಳಿಗೆ ಮಾರ್ಗದರ್ಶಿ ಬಿಡುಗಡೆ ಮಾಡಿದೆ. ಪರೀಕ್ಷೆ ಸಂದರ್ಭದಲ್ಲಿ ವಿದ್ಯಾರ್ಥಿನಿಯರ ಋತುಸ್ರಾವ ಅಗತ್ಯಗಳನ್ನು ಪೂರೈಸಲು ರೆಸ್ಟ್‌ರೂಂ ವಿರಾಮ ನೀಡಬೇಕು. ಇದರಿಂದ ಅವರಿಗೆ ಪರೀಕ್ಷೆಗಳ ಮೇಲೆ ಕೇಂದ್ರೀಕರಿಸಲು ಸಾಧ್ಯವಾಗಲಿದೆ ಎಂದು ಶಿಕ್ಷಣ ಇಲಾಖೆ ತಿಳಿಸಿದೆ.

ವಿದ್ಯಾರ್ಥಿಗಳು, ಬೋಧಕರು ಮತ್ತು ಇತರ ಸಿಬಂದಿಗಳಲ್ಲಿ ಋತುಸ್ರಾವ ನೈರ್ಮಲ್ಯ ಮತ್ತು ಸ್ವತ್ಛತೆಯ ಜಾಗೃತಿಯೊಂದಿಗೆ ಶೈಕ್ಷಣಿಕ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸಬೇಕು. ಈ ಮೂಲಕ ಶಾಲಾ ಪರಿಸರವನ್ನು ಹೆಚ್ಚು ತಿಳಿವಳಿಕೆಯ ಪರಿಸರವನ್ನಾಗಿ ರೂಪಿಸಬೇಕು. ಪರೀಕ್ಷೆ ವೇಳೆ ವಿದ್ಯಾರ್ಥಿನಿಯರ ಹೆಚ್ಚು ಕಾಳಜಿ ವಹಿಸಬೇಕೆಂದೂ ತಿಳಿಸಿದೆ.