Brand Value: ಬಾಲಿವುಡ್‌ ತಾರೆಯರನ್ನು ಮೀರಿಸಿದ ಕ್ರಿಕೆಟಿಗರ ಬ್ರ್ಯಾಂಡ್‌ ಮೌಲ್ಯ!

ಹೊಸದಿಲ್ಲಿ: ಬಾಲಿವುಡ್‌ ತಾರೆಯರಿಗಿಂತ ಕ್ರಿಕೆಟಿಗರ ಬ್ರ್ಯಾಂಡ್‌ ಮೌಲ್ಯ ಗಣನೀಯವಾಗಿ ಹೆಚ್ಚಳವಾಗಿದೆ ಎಂದು ಬ್ರ್ಯಾಂಡ್‌ ಎಂಡೋರ್ಸರ್‌ ಸಂಸ್ಥೆಯ ವರದಿ ಹೇಳಿದೆ.

ಮುಂಬಯಿ ಮೂಲದ, ಹಂಸ ಸಂಶೋಧನ ಸಂಸ್ಥೆಯ ಬ್ರ್ಯಾಂಡ್‌ ಎಂಡೋರ್ಸರ್‌ ವರದಿ-2024ರ ಪ್ರಕಾರ, ಭಾರತೀಯ ಕ್ರಿಕೆಟ್‌ ದಿಗ್ಗಜರಾದ ವಿರಾಟ್‌ ಕೊಹ್ಲಿ, ಎಂ.ಎಸ್‌. ಧೋನಿ ಮತ್ತು ಸಚಿನ್‌ ತೆಂಡುಲ್ಕರ್‌ ಅಗ್ರ 3 ಸ್ಥಾನಗಳಲ್ಲಿ ಕಾಣಿಸಿಕೊಂಡಿದ್ದು, ಬಾಲಿವುಡ್‌ ತಾರೆ ಶಾರುಖ್‌ ಖಾನ್‌ಗೆ 4ನೇ ಸ್ಥಾನ ಲಭಿಸಿದೆ.

ಜಾಗತಿಕ ಮಟ್ಟದಲ್ಲಿ ಭಾರತೀಯ ಕ್ರಿಕೆಟಿಗರ ಪ್ರದರ್ಶನ, ಕ್ರಿಕೆಟರ್‌ಗಳಿಗಿರುವ ಭಾರೀ ಸಂಖ್ಯೆಯ ಅಭಿಮಾನಿಗಳು, ಕ್ರಿಕೆಟಿಗರ ಮೇಲಿನ ವಿಶ್ವಾಸಾರ್ಹತೆ.. ಈ ಎಲ್ಲ ಕಾರಣದಿಂದಾಗಿ ಕ್ರಿಕೆಟರ್‌ಗಳ ಬ್ರ್ಯಾಂಡ್‌ ಮೌಲ್ಯ ಬಾಲಿವುಡ್‌ ತಾರೆಯರಿಗಿಂತ ಮೇಲೇರುತ್ತಿದೆ ಎಂದು ವರದಿ ಹೇಳಿದೆ. ವರದಿಯ ಅಗ್ರ 10 ಜನಪ್ರಿಯರ ಪಟ್ಟಿಯಲ್ಲಿ ಅಕ್ಷಯ್‌ ಕುಮಾರ್‌, ಅಮಿತಾಭ್‌ ಬಚ್ಚನ್‌, ಅಲ್ಲು ಅರ್ಜುನ್‌, ಸಲ್ಮಾನ್‌ ಖಾನ್‌, ಹೃತಿಕ್‌ ರೋಷನ್‌, ದೀಪಿಕಾ ಪಡುಕೋಣೆ ಕಾಣಿಸಿಕೊಂಡಿದ್ದಾರೆ.