Tomato ಕಾಯಲು ಬೌನ್ಸರ್, ಸ್ಮಾರ್ಟ್‌ಫೋನ್‌ಗೆ ಟೊಮ್ಯಾಟೋ ಫ್ರೀ !

ಭೋಪಾಲ/ವಾರಾಣಸಿ: ದೇಶದ ಹಲವೆಡೆ ಟೊಮೆಟೋ ಬೆಲೆ ಗಗನಕ್ಕೇರಿದ್ದು, ಕಳ್ಳರ ಕಾಟದಿಂದ ಚಿನ್ನದಂತ ಟೊಮ್ಯಾಟೋ ಹಣ್ಣನ್ನು ರಕ್ಷಿಸಲೆಂದೇ ಉತ್ತರ ಪ್ರದೇಶದ ವಾರಾಣಸಿಯಲ್ಲಿ ವ್ಯಾಪಾರಿ ಅಜಯ್‌ ಫೌಜಿ ಕಾವಲಿಗೆ ಬೌನ್ಸರ್‌ ಒಬ್ಬರನ್ನು ನೇಮಿಸಿದ್ದಾರೆ! ವಿಚಿತ್ರವೆನಿಸಿದರೂ ಈ ಅಂಶ ಸತ್ಯ.

ಖರೀದಿಗಾಗಿ ಬರುವವರು ಜನರು ಟೊಮೆಟೋ ಕದ್ದುಬಿಡುತ್ತಾರೋ ಎಂಬ ಭೀತಿಗೆ ವಾರಾಣಸಿಯ ವ್ಯಾಪಾರಿ ಈ ರೀತಿ ಬೌನ್ಸರ್‌ ಅನ್ನು ನೇಮಿಸಿಕೊಂಡಿದ್ದಾರೆ. ಆತ ದೂರದಿಂದ ನಿಂತು ಖರೀದಿದಾರರ ಚಲನವಲನ ಗಮನಿಸುತ್ತಾರೆ. ಅಲ್ಲಿ ಈಗ ಪ್ರತಿ ಕೆಜಿ ಟೊಮೆಟೋಗೆ 160 ರೂ. ಇದೆ

ಮಧ್ಯಪ್ರದೇಶದ ಅಶೋಕ್‌ನಗರದಲ್ಲಿ ಮೊಬೈಲ್‌ ಶಾಪ್‌ ಮಾಲೀಕರೊಬ್ಬರು ತಮ್ಮ ಅಂಗಡಿಯಲ್ಲಿ ಸ್ಮಾರ್ಟ್‌ ಫೋನ್‌ ಖರೀದಿಸಿದವರಿಗೆ 2ಕೆಜಿ ಟೊಮ್ಯಾಟೋ ಹಣ್ಣು ಉಚಿತ ಎಂಬ ಆಫ‌ರ್‌ ಘೋಷಿಸಿದ್ದಾರೆ. ಈ ಮೂಲಕ ವ್ಯಾಪಾರ ಹೆಚ್ಚಿಸಿಕೊಳ್ಳುವ ತಂತ್ರ ಉಪಯೋಗಿಸಿದ್ದಾರೆ. ಈ ಆಫ‌ರ್‌ ನೀಡಿದ ಬಳಿಕ ಮೊಬೈಲ್‌ ಖರೀದಿಗೆ ಬರುವ ಗ್ರಾಹಕರ ಸಂಖ್ಯೆಯೂ ಹೆಚ್ಚಿದೆ ಎಂದು ಹೇಳಿದ್ದಾರೆ. ಒಟ್ಟಾರೆ ದುಬಾರಿ ಬೆಲೆಯ ಟೊಮ್ಯಾಟೋ ಚಿನ್ನದಷ್ಟೇ ಮಹತ್ವ ಪಡೆಯುವಂತಾಗಿದೆ.