ಸ್ವಾರಸ್ಯ; ಅವೆರಡೂ ಬೇರೆ ಬೇರೆ ಡಿಪಾರ್ಟ್ಮೆಂಟ್ ಕಣ್ರೀ…ಡಿವಿಜಿ ಕೈಲಿತ್ತು ಜಿಲೇಬಿ!

ಡಿವಿಜಿಯವರಿಗೆ ಸಿಹಿತಿಂಡಿಯೆಂದರೆ ಪ್ರಾಣ. ಊಟ ತಿಂಡಿಯ ವಿಷಯದಲ್ಲಿ ಶಿಸ್ತು ಪಾಲಿಸಬೇಕು ನಿಜ, ಹಾಗಂತ ನಾಲಿಗೆಗೆ ಮೋಸ ಮಾಡಬಾರದು ಎಂದು ಅವರು ವಿನೋದವಾಗಿ ಹೇಳುತ್ತಿದ್ದರು. ಅದೊಂದು ಸಂದರ್ಭದಲ್ಲಿ ಅವರಿಗೆ ಶುಗರ್‌ ಹೆಚ್ಚಾಗಿ, ಆಸ್ಪತ್ರೆಯಲ್ಲಿದ್ದರು. ಈ ವಿಷಯ ಗೊತ್ತಾಗುದ್ದಂತೆ, ಅವರನ್ನು ನೋಡಲೆಂದು, ಸಾಹಿತಿ ಡಾ. ಹಾ.ಮಾ. ನಾಯಕ ಅವರು ಆಸ್ಪತ್ರೆಗೆ ಧಾವಿಸಿ ಬಂದರು. ಅಷ್ಟು ಹೊತ್ತಿಗೆ ಶುಗರ್‌ ತಹಬಂದಿಗೆ ಬಂದಿದ್ದರಿಂದ, ಡಿವಿಜಿಯವರನ್ನು ಆಸ್ಪತ್ರೆಯಿಂದ ಡಿಸ್ಚಾರ್ಜ್‌ ಮಾಡಲಾಗಿತ್ತು. ಅವರು ಮನೆ ಸೇರಿದ್ದರು.

ಹೇಗಿದ್ದರೂ ಅವರನ್ನು ನೋಡಲೆಂದು ಬಂದಿದ್ದಾಗಿದೆ. ಸೀದಾ ಮನೆಗೇ ಹೋಗಿ ಮಾತಾಡಿಸಿಕೊಂಡು, ಆ ಹಿರಿಯರ ಆಶೀರ್ವಾದ ಪಡೆದು ಹೋಗುವುದೆಂದು ನಿಶ್ಚಯಿಸಿದ ಹಾಮಾನಾ, ಡಿವಿಜಿಯವರ ಮನೆಗೆ ಬಂದರು. ಅಲ್ಲಿ ಅವರು ಕಂಡದ್ದೇನು? ಡಿವಿಜಿ ಲಕ್ಷಣವಾಗಿ ಚಕ್ಲಮಕ್ಲ ಹಾಕಿಕೊಂಡು ಜಿಲೇಬಿ ತಿನ್ನುತ್ತಿದ್ದಾರೆ!

ಶುಗರ್‌ ಹೆಚ್ಚಾಗಿತ್ತು ಎಂಬ ಕಾರಣಕ್ಕೆ ಆಸ್ಪತ್ರೆ ಸೇರಿದ್ದ ಡಿವಿಜಿ, ಅಲ್ಲಿಂದ ಬಂದ ತಕ್ಷಣ ಮತ್ತೆ ಸಿಹಿ ತಿನ್ನುತ್ತಾ ಕೂತಿರುವುದನ್ನು ಕಂಡು ಹಾಮಾನಾಗೆ ಅಚ್ಚರಿ. “ಏನ್ಸಾರ್‌ ಇದೂ..?’ ಎಂದು ಅವರು ಕೇಳಿದ್ದಕ್ಕೆ, ಅವರಿಗೂ ಒಂದು ಜಿಲೇಬಿ ಕೊಟ್ಟು ಡಿವಿಜಿ ಹೇಳಿದರಂತೆ: “ನೋಡ್ರಿ, ಇದನ್ನು ತಿನ್ನೋದು, ಆನಂದಪಡೋದು ಒಂದು ಡಿಪಾರ್ಟ್ಮೆಂಟ್ ರೋಗ ಅಂತ ನರಳ್ಳೋದು ಇನ್ನೊಂದು ಡಿಪಾರ್ಟ್‌ಮೆಂಟ್! ಒಂದು ಇನ್ನೊಂದರಲ್ಲಿ ತಲೆಹಾಕದ್ದಲ್ಲ’!