ಮುಂಬಯಿ ಶೇರು ಪೇಟೆಗೆ ಕಾಡಿದ ಟ್ರಂಪ್‌ ಗ್ರಹಣ: 274 ಅಂಕ ನಷ್ಟ

ಮುಂಬಯಿ : ಅಮೆರಿಕ ನಿಯೋಜಿತ ಅಧ್ಯಕ್ಷ ಡೊನಲ್ಡ್‌ ಟ್ರಂಪ್‌ ಅವರಿಂದು ಅಧ್ಯಕ್ಷ ಪದ ಸ್ವೀಕಾರಾರ್ಥವಾಗಿ ಪ್ರಮಾಣ ವಚನ ಸ್ವೀಕರಿಸಿ ಮಾಡಲಿರುವ ತಮ್ಮ ನೀತಿ – ನಿರ್ಧಾರಗಳನ್ನು ಒಳಗೊಂಡ ಭಾಷಣವನ್ನು ತೀವ್ರ ಕುತೂಹಲ, ಕಾತರ ಹಾಗೂ ಆತಂಕದಿಂದ ಎದುರು ನೋಡುತ್ತಿರುವ ಮುಂಬಯಿ ಶೇರು ಪೇಟೆ ಇಂದು ಶುಕ್ರವಾರದ ವಾರಾಂತ್ಯದ ವಹಿವಾಟನ್ನು 274.10 ಅಂಕಗಳ ನಷ್ಟದೊಂದಿಗೆ 27,034.50 ಅಂಕಗಳ ಮಟ್ಟದಲ್ಲಿ  ನಿರಾಶಾದಾಯಕವಾಗಿ ಕೊನೆಗೊಳಿಸಿದೆ.

ಇದೇ ರೀತಿ ರಾಷ್ಟ್ರೀಯ ಶೇರು ಮಾರುಕಟ್ಟೆಯ ನಿಫ್ಟಿ ಸೂಚ್ಯಂಕ 85.75 ಅಂಕಗಳ ನಷ್ಟದೊಂದಿಗೆ 8,349.35 ಅಂಕಗಳ ಮಟ್ಟದಲ್ಲಿ  ವಾರಾಂತ್ಯ ದಿನದ ವಹಿವಾಟನ್ನು ಕೊನೆಗೊಳಿಸಿದೆ.

ಇಂದಿನ ವಹಿವಾಟಿಗೆ ಒಳಪಟ್ಟ ಶೇರುಗಳ ಪೈಕಿ 1,874 ಶೇರುಗಳು ಹಿನ್ನಡೆಗೆ ಗುರಿಯಾದವು; ಕೇವಲ 815 ಶೇರುಗಳು ಮುನ್ನಡೆ ಸಾಧಿಸಿದವು. 172 ಶೇರುಗಳು ಯಾವುದೇ ಬದಲಾವಣೆ ಕಾಣಲಿಲ್ಲ.

ಸೆನ್ಸೆಕ್ಸ್‌ ಹಾಗೂ ನಿಫ್ಟಿ ಇಂದು ವಾರದ ಕನಿಷ್ಠ ಮಟ್ಟವನ್ನು ದಾಖಲಿಸಿದವು. ಬಿಎಸ್‌ಇ ಮಿಡ್‌ ಕ್ಯಾಪ್‌ ಶೇ.1.25ರ ಕುಸಿತವನ್ನು ಕಂಡರೆ ಬಿಎಸ್‌ಇ ಸ್ಮಾಲ್‌ ಕ್ಯಾಪ್‌ ಶೇ.1.01ರ ಕುಸಿತಕ್ಕೆ ಗುರಿಯಾಯಿತು.