ಸಂತ್ರಸ್ತರಿಗೆ ನೆರವಾಗುತ್ತಿದ್ದ ಐವರನ್ನು ಹತ್ಯೆಗೈದ ಉಗ್ರರು

ಅಬುಜಾ: ಕೋವಿಡ್ 19 ಸಂತ್ರಸ್ತರಿಗೆ ಆಹಾರ, ನೀರು, ಔಷಧ ಪೂರೈಸಲು ಹೋಗಿದ್ದ ಐವರನ್ನು ನೈಜೀರಿಯಾದ ಬೊಕೊ ಹರಾಂ ಉಗ್ರರು ನಿರ್ದಯವಾಗಿ ಗುಂಡಿಕ್ಕಿ ಕೊಂದಿದ್ದಾರೆ.

ತುರ್ತು ಪರಿಸ್ಥಿತಿ ನಿರ್ವಹಣಾ ಸಂಸ್ಥೆಯ ಐವರು ಸಿಬಂದಿ ಜೂನ್‌ನಲ್ಲಿ ಈಶಾನ್ಯ ನೈಜೀರಿಯಾದ ಕುಗ್ರಾಮಕ್ಕೆ ಅಗತ್ಯ ಸಾಮಗ್ರಿ ಹೊತ್ತು ಸಾಗಿದ್ದರು.

ಈ ವೇಳೆ ಅವರನ್ನು ಜಿಹಾದಿ ಉಗ್ರಪಡೆ ಬೊಕೊ ಹರಾಂ ಅಪಹರಿಸಿ, ಒಂದು ತಿಂಗಳು ಬಂಧನದಲ್ಲಿಟ್ಟಿತ್ತು.

ಭಯಾನಕ ವಿಡಿಯೊ: ಉಗ್ರರು ಬುಧವಾರ ಸಾಮಾಜಿಕ ಜಾಲ ತಾಣಗಳಲ್ಲಿ ಹರಿಬಿಟ್ಟ ವಿಡಿಯೊ, ಐವರು ಸಿಬಂದಿಯ ಬದುಕಿನ ಕೊನೇ ಕ್ಷಣಗಳನ್ನು ತೆರೆದಿಟ್ಟಿದೆ.

35 ಸೆಕೆಂಡಿನ ವಿಡಿಯೊದಲ್ಲಿ ಐವ ರನ್ನು ಸಾಲಾಗಿ ಮಂಡಿಯೂರಿಸಿ ಉಗ್ರರು ಗುಂಡಿಕ್ಕಿದ ದೃಶ್ಯ ನೈಜೀರಿಯಾವನ್ನೇ ಬೆಚ್ಚಿಬೀಳಿಸಿದೆ.

ಉಗ್ರ ಸಂದೇಶ: ಗುಂಡಿಕ್ಕುವ ವೇಳೆ ಉಗ್ರ ಕಮಾಂಡರ್‌ ‘ನಿಮ್ಮ ಹತ್ಯೆ ಮೂಲಕ ನಾಸ್ತಿಕರಿಗೆ ನಾವು ಸ್ಪಷ್ಟ ಸಂದೇಶ ರವಾನಿಸುತ್ತಿದ್ದೇವೆ. ನಿಮ್ಮ ಉದ್ಯೋಗದಾತ ನಾಸ್ತಿಕರು ತಮ್ಮ ಗುರಿಗಳನ್ನು ಸಾಧಿಸಲು ನಿಮ್ಮನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ.

ಈ ತಪ್ಪಿಗಾಗಿ ನೀವು ಪಶ್ಚಾತ್ತಾಪಪಟ್ಟು ದೇವರ ಕಡೆಗೆ ನಡೆಯಬೇಕು, ಇಲ್ಲದಿದ್ದರೆ ನಿಮ್ಮ ಮಾರ್ಗಗಳಲ್ಲಿ ಸಾಗುವ ಎಲ್ಲರನ್ನೂ ಅಪಹರಿಸಿ ಗುಂಡಿಕ್ಕುತ್ತೇವೆ’ ಎಂದು ಎಚ್ಚರಿಸಿದ್ದಾರೆ.