ಬ್ಲೂವೇಲ್‌: ನ್ಯಾಯಾಂಗ ಹೋರಾಟ ಆರಂಭ

ಹೊಸದಿಲ್ಲಿ: ದೇಶದಲ್ಲಿ ಐವರನ್ನು ಆಪೋಷನ ತೆಗೆದು ಕೊಂಡ ಬ್ಲೂವೇಲ್‌ ಚಾಲೆಂಜ್‌ ಗೇಮ್‌ ಮೇಲೆ ನಿಷೇಧ ಹೇರಬೇಕೆಂದು ಕೋರಿ ಸುಪ್ರೀಂ ಕೋರ್ಟ್‌ ಮತ್ತು ಪಂಜಾಬ್‌ ಹೈಕೋರ್ಟ್‌ನಲ್ಲಿ ನ್ಯಾಯಾಂಗ ಹೋರಾಟ ಶುರುವಾಗಿದೆ. ತಮಿಳುನಾಡಿನ ಮಧುರೆಯ 73 ವರ್ಷದ ಸಿ.ಆರ್‌.ಜಯ ಸುಕಿನ್‌ ಎಂಬವರು ಮಾರಕ ಗೇಮ್‌ ವಿರುದ್ಧ ನ್ಯಾಯಾಂಗ ಹೋರಾಟಕ್ಕೆ ಇಳಿದಿದ್ದಾರೆ.

ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಪೀಠ ಅರ್ಜಿಯನ್ನು ಸ್ವೀಕರಿಸಿದ್ದು, 15ರಂದು ಆದ್ಯತೆಯಲ್ಲಿ ವಿಚಾರಣೆ ನಡೆಸುವುದಾಗಿ ಹೇಳಿದೆ.  ಫೇಸ್‌ಬುಕ್‌, ಗೂಗಲ್‌ ಮತ್ತು ಯಾಹೂಗಳಿಂದ ಗೇಮ್‌ನ ಲಿಂಕ್‌ ತೆಗೆದು ಹಾಕುವ ಬಗ್ಗೆ ಆ.22ರಂದು ದೆಹಲಿ ಹೈಕೋರ್ಟ್‌ ನಿರ್ದೇಶಿಸಿತ್ತು.

ಕೇಂದ್ರಕ್ಕೆ ನೋಟಿಸ್‌: ಇದೇ ವೇಳೆ ಗೇಮ್‌ ಬಗ್ಗೆ  ಪಂಜಾಬ್‌ ಮತ್ತು ಹರ್ಯಾಣ ಹೈಕೋರ್ಟ್‌ ಕೇಂದ್ರ, ಪಂಜಾಬ್‌, ಹರ್ಯಾಣ ಸರಕಾರಗಳು ಮತ್ತು ಕೇಂದ್ರಾಡಳಿತ ಪ್ರದೇಶ ಚಂಡೀಗಢಕ್ಕೆ ನೋಟಿಸ್‌ ನೀಡಿದೆ. ಬ್ಲೂವೇಲ್‌ ನಿಷೇಧಿಸು ವಂತೆ ಸಲ್ಲಿಕೆಯಾಗಿದ್ದ ಅರ್ಜಿ ಪರಿಶೀಲಿಸಿ ಕ್ರಮ ಕೈಗೊಂಡಿದೆ. 20ರೊಳಗೆ ವರದಿ ನೀಡುವಂತೆ ಸೂಚಿಸಲಾಗಿದೆ.