ಮನೆ ಮುಂದೆ ಮಾಟ !:ಕೈ ನಾಯಕಿ ಲಕ್ಷ್ಮೀ ಹೆಬ್ಬಾಳ್ಕರ್‌ ಕಂಗಾಲು 

ಬೆಳಗಾವಿ : ಕೆಪಿಸಿಸಿ ಮಹಿಳಾ ಘಟಕದ ರಾಜ್ಯಾಧ್ಯಕ್ಷೆ ಲಕ್ಷ್ಮೀ ಹೆಬ್ಬಾಳ್ಕರ್‌ ಅವರ ನಿವಾಸದ ಎದುರು ಮಾಟ ಮಂತ್ರ ಮಾಡಿರುವುದು ಗುರುವಾರ ಬೆಳಗ್ಗೆ ಕಂಡು ಬಂದಿದೆ. 

ಕುವೆಂಪುನಗರದ ನಿವಾಸದ ಎದುರು ನಿಲ್ಲಿಸಿದ್ದ ಕಾರಿನ ಅಡಿಯಲ್ಲಿ ಮಾಟ ಮಂತ್ರಕ್ಕೆ ಬಳಸುವ ಲಿಂಬೆ  , ಮೊಟ್ಟೆ ,ಮೆಣಸಿನಕಾಯಿ ಬೂದು ಗುಂಬಳಕಾಯಿ ಅರಸಿನ ಕುಂಕುಮ ಇತ್ಯಾದಿ ವಸ್ತುಗಳು ಪತ್ತೆಯಾಗಿದೆ. 

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಲಕ್ಷ್ಮೀ ಹೆಬ್ಬಾಳ್ಕರ್‌ ‘ನಾನು ಮಾಟ,ಮಂತ್ರ ನಂಬುವುದಿಲ್ಲ. ರಾಜಕೀಯ ವಿರೋಧಿಗಳು ಇದನ್ನು ಮಾಡಿದ್ದಾರೆ. ಕಳೆದ ವಿಧಾನ ಸಭಾ ಚುನಾವಣೆ ನಡೆದ ಬಳಿಕ ಈ ರೀತಿ ಮಾಡುತ್ತಿದ್ದಾರೆ. ಯಾವ ಉದ್ದೇಶಕ್ಕಾಗಿ ಮಾಡುತ್ತಿದ್ದಾರೆ ಎಂದು ಪ್ರಶ್ನಿಸಿದ ಅವರು ನನ್ನ ತಮ್ಮನ ಕಾರು ಅಪಘಾತಕ್ಕೀಡಾಗಿದೆ. ಅದಾಗಿ 2 ದಿನಗಳಲ್ಲಿ ನನ್ನ ಇನ್ನೋವಾ ಕಾರು ಅಪಘಾತಕ್ಕೀಡಾಗಿ ಕೆಲವರಿಗೆ ಗಾಯವಾಗಿದೆ. ನನ್ನ ಮಗನೂ ಬಿದ್ದು ಗಾಯಗೊಂಡಿದ್ದಾನೆ. ಈ ಎಲ್ಲಾ ಘಟನೆಗಳಿಂದ ನಮ್ಮ ಮನೆಯವರಿಗೆಲ್ಲಾ ಸಂಶಯ ಮೂಡಿದೆ ಎಂದರು. 

ಪಿಎಸ್‌ಐಗೆ ಧಮ್ಕಿ, ನಿವಾಸದ ಮೇಲೆ ಐಟಿ ದಾಳಿ,ಉಪಚುನಾವಣೆ ವೇಳೆ ಮತದಾರರಿಗೆ ಹಣ ಹಂಚಿದ ಆರೋಪ ಹೀಗೆ ಸದಾ ಒಂದಿಲ್ಲ ಒಂದು ವಿಚಾರದಲ್ಲಿ ಹೆಬ್ಬಾಳ್ಕರ್‌ ಸುದ್ದಿಯಲ್ಲಿರುತ್ತಾರೆ.