ಬಿಜೆಪಿ ಹಣಿಯಲು ಹಾವು, ಮುಂಗೂಸಿ,ಬೆಕ್ಕು,ನಾಯಿಗಳ ವಿಪಕ್ಷ ಕೂಟ: ಶಾ

ಮುಂಬಯಿ : ‘ಬಿಜೆಪಿ ಎಂದೂ ಮೀಸಲಾತಿ ನೀತಿಯನ್ನು ರದ್ದು ಮಾಡುವುದಿಲ್ಲ ಮತ್ತು ಹಾಗೆ ಮಾಡಲು ಯಾರನ್ನೂ ಬಿಡುವುದಿಲ್ಲ’ ಎಂದು ಬಿಜೆಪಿ ಅಧ್ಯಕ್ಷ ಅಮಿತ್‌ ಶಾ ಅವರು ಇಂದಿಲ್ಲಿ ರಾಲಿಯೊಂದನ್ನು ಉದ್ದೇಶಿಸಿ ಮಾತನಾಡುತ್ತಾ ಹೇಳಿದರು.

ಎಸ್‌ಸಿ/ಎಸ್‌ಟಿ ಕಾಯಿದೆಯನ್ನು ದುರ್ಬಲಗೊಳಿಸಿರುವ ಸುಪ್ರೀಂ ಕೋರ್ಟ್‌ ಆದೇಶದ ವಿರುದ್ಧ 10 ಬಲಿ ಪಡೆದ ಭಾರತ್‌ ಬಂದ್‌ ಮೂಲಕ ದೇಶಾದ್ಯಂತ ವ್ಯಕ್ತವಾದ ಹಿಂಸಾತ್ಮಕ ಪ್ರತಿಭಟನೆಯ ಹಿನ್ನೆಲೆಯಲ್ಲಿ ಅಮಿತ್‌ ಶಾ ಈ ಮಾತುಗಳನ್ನು ಆಡಿದರು. 

ಮುಂದಿನ ವರ್ಷ ಲೋಕಸಭಾ ಚುನಾವಣೆಯಲ್ಲಿ  ಬಿಜೆಪಿಯನ್ನು ಹಣಿಯಲು ವಿರೋಧ ಪಕ್ಷಗಳು ನಡೆಸುತ್ತಿರುವ ಮೈತ್ರಿಕೂಟ ರಚನೆಯ ಯತ್ನವನ್ನು ಟೀಕಿಸಿದ ಅಮಿತ್‌ ಶಾ, ”ಅಂತಹದ್ದೊಂದು ಕೂಟವು ಪರಸ್ಪರ ಬದ್ಧ ವೈರಿಗಳಾಗಿರುವ ಹಾವು, ಮುಂಗೂಸಿ, ನಾಯಿ ಮತ್ತು ಬೆಕ್ಕುಗಳನ್ನು ಒಳಗೊಂಡಿರುತ್ತದೆ” ಎಂದು ಹೇಳಿದರು.