ಪದ್ಮಾವತಿಯನ್ನು ಆಹ್ವಾನಿಸಿದರೆ ಮಮತಾಗೆ ಶೂರ್ಪನಖೀ ಗತಿ: ಬಿಜೆಪಿ

ಹೊಸದಿಲ್ಲಿ : ಪದ್ಮಾವತಿಯನ್ನು ರಾಜ್ಯಕ್ಕೆ ಆಹ್ವಾನಿಸುವ ಮೂಲಕ ಪಶ್ಚಿಮ ಬಂಗಾಲ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ರಾಮಾಯಣದ ಶೂರ್ಪನಖೀಗೆ ಆದ ಗತಿಯನ್ನೇ ಕಾಣಲಿದ್ದಾರೆ ಎಂದು ಭಾರತೀಯ ಜನತಾ ಪಕ್ಷದ ನಾಯಕ ಸೂರಜ್‌ ಪಾಲ್‌ ಅಮು ಎಚ್ಚರಿಕೆ ನೀಡಿದ್ದಾರೆ.

“ರಾಮಾಯಣದ ಶೂರ್ಪನಖೀಯ ಹಾಗೆ ರಾಕ್ಷಸೀ ಪ್ರವೃತ್ತಿ ಇರುವ ಕೆಲವು ಮಹಿಳೆಯರಿದ್ದಾರೆ. ಶೂರ್ಪನಖೀಯ ಮೂಗನ್ನು ಕತ್ತರಿಸುವ ಮೂಲಕ ಲಕ್ಷ್ಮಣನು ಆಕೆಗೆ ಸರಿಯಾದ ಚಿಕಿತ್ಸೆಯನ್ನು ನೀಡಿದ. ಇದನ್ನು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಮರೆಯಬಾರದು’ ಎಂದು ಸೂರಜ್‌ ಹೇಳಿದರು.

ಮಮತಾ ಬ್ಯಾನರ್ಜಿ ಅವರು ನಿನ್ನೆ ಶುಕ್ರವಾರವಷ್ಟೇ ವಿವಾದಿತ ‘ಪದ್ಮಾವತಿ ಚಿತ್ರವನ್ನು ಅದರ ಚಿತ್ರ ತಂಡವನ್ನು ತಮ್ಮ ಸರಕಾರ ರಾಜ್ಯಕ್ಕೆ ಆಹ್ವಾನಿಸಲು ಸಿದ್ಧವಿದೆ; ಅವರಿಗಾಗಿ ನಾವು ಇಲ್ಲಿ ವಿಶೇಷ ವ್ಯವಸ್ಥೆಯನ್ನು ರೂಪಿಸಿಕೊಡುತ್ತೇವೆ’ ಎಂದು ಹೇಳಿದ್ದರು.  

ಚಿತ್ರ ನಿರ್ದೇಶಕ ಸಂಜಯ್‌ ಲೀಲಾ ಬನ್ಸಾಲಿ ಅವರ ವಿವಾದಿತ ಪದ್ಮಾವತಿ ಚಿತ್ರವನ್ನು ಶ್ರೀ ರಾಜಪೂತ ಕರಣಿ ಸೇನೆ ಮಾತ್ರವಲ್ಲದೆ ಅನೇಕ ರಾಜಕೀಯ ನಾಯಕರು ಮತ್ತು ಹಿಂದಿನ ರಾಜ ಕುಟುಂಬದ ಸದಸ್ಯರು ಖಂಡಿಸಿ ಅದರ ಬಿಡುಗಡೆಗೆ ನಿಷೇಧ ಹೇರುವಂತೆ ಆಗ್ರಹಿಸಿದ್ದರು.