Bharatpol: ಅಂತಾರಾಷ್ಟ್ರೀಯ ಪೊಲೀಸ್‌ ಸಹಕಾರಕ್ಕೆ “ಭಾರತ್‌ಪೋಲ್‌’

ನವದೆಹಲಿ: ವಿದೇಶಗಳಲ್ಲಿ ತಲೆ ಮರೆಸಿಕೊಂಡಿರುವ ಭಾರತಕ್ಕೆ ಬೇಕಾದ ಅಪರಾಧಿಗಳನ್ನು ಹುಡುಕಲು ಅನುಕೂಲವಾಗುವಂತಹ ಪೋರ್ಟಲ್‌ವೊಂದಕ್ಕೆ ಕೇಂದ್ರ ಸರ್ಕಾರ ಚಾಲನೆ ನೀಡಿದೆ. ಇದಕ್ಕೆ “ಭಾರತ್‌ ಪೋಲ್‌’ ಎಂದು ಹೆಸರಿಟ್ಟಿದ್ದು, ಇಂಟರ್‌ಪೋಲ್‌ ಸೇರಿದಂತೆ ಜಾಗತಿಕ ಸಂಸ್ಥೆಗಳ ಜತೆ ಭಾರತದ ಸಂಸ್ಥೆಗಳು ಸಂವಹನ ನಡೆಸಲು ಇದು ಸಹಾಯ ಮಾಡುತ್ತದೆ ಎಂದು ತಿಳಿಸಿದೆ.

“ಭಾರತ್‌ ಪೋಲ್‌’ ಪೋರ್ಟಲ್‌ಗೆ ಕೇಂದ್ರ ಗೃಹ ಸಚಿವ ಅಮಿತ್‌ ಶಾ ಮಂಗಳವಾರ ಚಾಲನೆ ನೀಡಿದ್ದು, ಅಪರಾಧಿಗಳಿಗೆ ಸಂಬಂಧಿಸಿದಂತೆ ಜಾಗತಿಕವಾಗಿ ಸಹಾಯ ಪಡೆದುಕೊಳ್ಳಲು ಭಾರತದ ಕಾನೂನು ಜಾರಿ ಸಂಸ್ಥೆಗಳಿಗೆ ಈ ಪೋರ್ಟಲ್‌ ನೆರವು ನೀಡುತ್ತದೆ ಎಂದು ಹೇಳಿದರು. ಅಲ್ಲದೇ ತಲೆಮರೆಸಿಕೊಂಡಿರುವ ಅಪರಾಧಿಗಳ ಪತ್ತೆಗೆ ಕೆಂಪು, ಹಳದಿ ಕೋಡ್‌ಗಳ ಬಾವುಟಗಳನ್ನು ತೆರೆಯಲು ಕೋರಿಕೆ ಸಲ್ಲಿಸಲು ಈ ಪೋರ್ಟಲ್‌ ನೆರವಾಗಲಿದೆ ಎನ್ನಲಾಗಿದೆ.

ಈ ಮೊದಲು ಇಂಟರ್‌ಪೋಲ್‌, ಭಾರತದ ಸಿಬಿಐ ಸಂಸ್ಥೆಯನ್ನು ಮಾತ್ರ ಜಾಗತಿಕವಾಗಿ ಗುರುತಿಸಿತ್ತು. ಆದರೆ ಹೊಸ ಪೋರ್ಟಲ್‌ ಉಳಿದ ತನಿಖಾ ಸಂಸ್ಥೆಗಳು ಮತ್ತು ಎಲ್ಲಾ ರಾಜ್ಯಗಳ ಪೊಲೀಸರಿಗೆ ಇಂಟರ್‌ಪೋಲ್‌ ಜತೆ ಸಂಪರ್ಕ ಗಳಿಸಿಕೊಳ್ಳಲು ನೆರವು ನೀಡುತ್ತದೆ ಎಂದು ಅವರು ಹೇಳಿದರು.