“ಈ ಯಶಸ್ಸು ಅಭಿಮಾನಿಗಳಿಗೆ ಸೇರಿದ್ದು. ಕನ್ನಡದ ಜನತೆಗೆ ಸೇರಿದ್ದು. ನಾವು ಏನು ಅಂದುಕೊಂಡಿದ್ದೆವೊ, ಅದಕ್ಕಿಂತ ಅದ್ಭುತವಾಗಿ ಪ್ರೇಕ್ಷಕರು ಚಿತ್ರವನ್ನು ಸ್ವೀಕರಿಸಿದ್ದಾರೆ. ಇಂಥದ್ದೊಂದು ಯಶಸ್ಸಿಗೆ ಕಾರಣರಾದ ಎಲ್ಲರಿಗೂ ಧನ್ಯವಾದಗಳು’ ಹೀಗೆ ಹೇಳುತ್ತ ಮಾತಿಗಿಳಿದವರು ನಟ ರೋರಿಂಗ್‌ ಸ್ಟಾರ್‌ ಶ್ರೀಮುರಳಿ. ಕಳೆದ ವಾರವಷ್ಟೇ ಶ್ರೀಮುರಳಿ ಅಭಿನಯದ ಈ ವರ್ಷದ ಬಹುನಿರೀಕ್ಷಿತ “ಭರಾಟೆ’ ಚಿತ್ರ ಅದ್ದೂರಿಯಾಗಿ ತೆರೆಗೆ ಬಂದಿದೆ.
ಇನ್ನು ಚಿತ್ರ ಬಿಡುಗಡೆಯಾದ ಎಲ್ಲ ಕೇಂದ್ರಗಳಲ್ಲಿ ಹೌಸ್‌ಫ‌ುಲ್‌ ಪ್ರದರ್ಶನ ಕಾಣುತ್ತ, ಪ್ರೇಕ್ಷಕರಿಂದ ಭರ್ಜರಿ ರೆಸ್ಪಾನ್ಸ್‌ ಪಡೆದುಕೊಳ್ಳುತ್ತ ಮುನ್ನುಗ್ಗುತ್ತಿದೆ. ಇದೇ ವೇಳೆ “ಭರಾಟೆ’ಯ ಬಿಡುಗಡೆಯ ನಂತರದ ಬೆಳವಣಿಗೆಗಳ ಬಗ್ಗೆ ಮಾತನಾಡಲು ಮಾಧ್ಯಮಗಳ ಮುಂದೆ ಚಿತ್ರತಂಡ, ಕೆಲ ವಿಷಯಗಳನ್ನು ಹಂಚಿಕೊಂಡಿತು. ಚಿತ್ರದ ಬಗ್ಗೆ ಮೊದಲು ಮಾತನಾಡಿದ ಶ್ರೀಮುರಳಿ ಚಿತ್ರದ ಯಶಸ್ಸಿಗೆ ಕಾರಣರಾದ ಎಲ್ಲರನ್ನು ನೆನಪಿಸಿಕೊಂಡು ಧನ್ಯವಾದ ಹೇಳಿದರು.
“ಭರಾಟೆ’ ಯಶಸ್ಸು ಖುಷಿಕೊಟ್ಟಿದ್ದು, ಆದಷ್ಟು ಬೇಗ ಮತ್ತೊಂದು ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬರುತ್ತೇನೆ’ ಎಂದರು. ಇನ್ನು ನಟ ಸಾಯಿಕುಮಾರ್‌ ಅವರಿಗೆ “ಭರಾಟೆ’ ವಿಶೇಷ ಖುಷಿಯನ್ನು ಕೊಟ್ಟಿದೆಯಂತೆ. ಅದಕ್ಕೆ ಕಾರಣ ಈ ಚಿತ್ರದಲ್ಲಿ ಅವರಿಗೆ ತಮ್ಮ ಇಬ್ಬರೂ ಸಹೋದರರ ಜೊತೆ ಒಟ್ಟಾಗಿ ಸೇರಿ ಅಭಿನಯಿಸುವ ಅವಕಾಶ ಸಿಕ್ಕಿದ್ದು. ಈ ಬಗ್ಗೆ ಮಾತನಾಡಿದ ಸಾಯಿ ಕುಮಾರ್‌, “ನಾವು ಮೂರು ಜನ ಸೋದರರು ಈ ಚಿತ್ರದಲ್ಲಿ ಒಟ್ಟಿಗೆ ಮಾಡುತ್ತೇವೆ ಅಂದುಕೊಂಡಿರಲಿಲ್ಲ.
ಅಪರೂಪದ ಅವಕಾಶ ಈ ಚಿತ್ರದಲ್ಲಿ ಸಿಕ್ಕಿದೆ. ಚಿತ್ರದ ಕ್ಲೈಮ್ಯಾಕ್ಸ್‌ ಚೆನ್ನಾಗಿ ಬಂದಿದ್ದು, ಎಲ್ಲರೂ ಅದರ ಬಗ್ಗೆ ಮಾತನಾಡುತ್ತಿದ್ದಾರೆ. ಚಿತ್ರಕ್ಕೆ ವಿಮರ್ಶಕರು, ಪ್ರೇಕ್ಷಕರಿಂದ ಒಳ್ಳೆಯ ರೆಸ್ಪಾನ್ಸ್‌ ಸಿಗುತ್ತಿದೆ’ ಎಂದು ತಮ್ಮ ಖುಷಿಯನ್ನು ಹಂಚಿಕೊಂಡರು. ನಿರ್ದೇಶಕ ಚೇತನ್‌ ಕುಮಾರ್‌ಗೂ “ಭರಾಟೆ’ ಭರ್ಜರಿ ಖುಷಿಯನ್ನು ತಂದುಕೊಟ್ಟಿದೆ. “ಚಿತ್ರ ಬಿಡುಗಡೆಯಾದ ಎಲ್ಲ ಕೇಂದ್ರಗಳಲ್ಲಿ ಉತ್ತಮ ಪ್ರದರ್ಶನ ಕಾಣುತ್ತಿದೆ.
ಪ್ರೇಕ್ಷಕರು ಚಿತ್ರವನ್ನು ತುಂಬ ಎಂಜಾಯ್‌ ಮಾಡುತ್ತಿದ್ದಾರೆ. ಚಿತ್ರದ ಗಳಿಕೆಯೂ ಚೆನ್ನಾಗಿ ಆಗುತ್ತಿದೆ. ಎಲ್ಲರ ಸಹಕಾರದಿಂದ ಇಂಥದ್ದೊಂದು ಚಿತ್ರ ಮಾಡೋದಕ್ಕೆ ಸಾಧ್ಯವಾಯ್ತು. ಇದೇ ನವೆಂಬರ್‌ನಿಂದ “ಜೇಮ್ಸ್‌’ ಚಿತ್ರ ಶುರುವಾಗಲಿದೆ’ ಎಂದು ಮಾಹಿತಿ ನೀಡಿದರು. “ಕರ್ನಾಟಕದ ಹಲವೆಡೆ ಅತಿಯಾದ ಮಳೆ ಮತ್ತು ಪ್ರವಾಹವಿದ್ದರೂ ಚಿತ್ರದ ಗಳಿಕೆಯ ಮೇಲೆ ಯಾವುದೇ ವ್ಯತಿರಿಕ್ತ ಪರಿಣಾಮ ಬೀರಿಲ್ಲ.
ಸದ್ಯ ಚಿತ್ರ ರಾಜ್ಯಾದ್ಯಂತ ಸುಮಾತು 250ಕ್ಕೂ ಹೆಚ್ಚು ಕೆಂದ್ರಗಳಲ್ಲಿ ಪ್ರದರ್ಶನವಾಗುತ್ತಿದೆ. ಗಳಿಕೆಯೂ ಚೆನ್ನಾಗಿ ಬರುತ್ತಿದೆ’ ಎಂಬ ಮಾಹಿತಿ ತೆರೆದಿಟ್ಟರು ನಿರ್ಮಾಪಕ ಸುಪ್ರೀತ್‌. ವೇದಿಕೆಯಲ್ಲಿ ಹಾಜರಿದ್ದ ನಾಯಕಿ ಶ್ರೀಲೀಲಾ, ನಟಿ ತಾರಾಅನುರಾಧ, ನಟರಾದ ಅಮಿತ್‌, ಮನ ಮೋಹನ್‌ ಚಿತ್ರದ ಬಿಡುಗಡೆಯ ನಂತರ ಸಿಗುತ್ತಿರುವ ಪ್ರತಿಕ್ರಿಯೆಗಳ ಬಗ್ಗೆ ಮಾತನಾಡಿದರು.
