ಕೋವಿಡ್ ಕಂಟಕ : ಬೆನೋಯಿಟ್‌ ಪೇರ್‌ ಯುಎಸ್‌ ಓಪನ್‌ನಿಂದ ಹೊರಕ್ಕೆ

ನ್ಯೂಯಾರ್ಕ್‌: ಯುಎಸ್‌ ಓಪನ್‌ ಪಂದ್ಯಾವಳಿ ಆರಂಭಗೊಳ್ಳುವ ಮೊದಲೇ ಕೋವಿಡ್‌ ಕಂಟಕ ಎದುರಾಗಿದೆ. ಫ್ರಾನ್ಸ್‌ನ ಬೆನೋಯಿಟ್‌ ಪೇರ್‌ ಅವರಿಗೆ ಕೋವಿಡ್ ಪಾಸಿಟಿವ್‌ ದೃಢಪಟ್ಟಿದ್ದು, ಕೂಟದಿಂದ ಹೊರಗುಳಿಯಲಿದ್ದಾರೆ.

17ನೇ ಶ್ರೇಯಾಂಕಿತ ಪೇರ್‌ ಮಂಗಳವಾರದ ಮೊದಲ ಸುತ್ತಿನ ಪಂದ್ಯದಲ್ಲಿ ಪೋಲೆಂಡಿನ ಕಾಮಿಲ್‌ ಮಾಶ್ರಕ್‌ ಅವರನ್ನು ಎದುರಿಸಬೇಕಿತ್ತು. ಪೇರ್‌ ಗೈರಲ್ಲಿ ಮಾಶ್ರಕ್‌ ಎದುರಾಳಿಯಾಗಿ ಸ್ಪೇನಿನ ಮಾರ್ಸೆಲ್‌ ಗ್ರಾನೋಲರ್ ಕಣಕ್ಕಿಳಿಯಲಿದ್ದಾರೆ.

ಬೆನೋಯಿಟ್‌ ಪೇರ್‌ “ವೆಸ್ಟರ್ನ್ ಆ್ಯಂಡ್‌ ಸದರ್ನ್’ ಟೆನಿಸ್‌ ಪಂದ್ಯಾವಳಿಯಲ್ಲಿ ಪಾಲ್ಗೊಳ್ಳಲು ಕಳೆದ ವಾರ ನ್ಯೂಯಾರ್ಕ್‌ಗೆ ಆಗಮಿಸಿದ್ದರು. ಆದರೆ ಬೋರ್ನ ಕೊರಿಕ್‌ ಎದುರಿನ ಮೊದಲ ಪಂದ್ಯದ ವೇಳೆಯೇ ಅಸೌಖ್ಯಗೊಂಡು ಹಿಂದೆ ಸರಿದಿದ್ದರು.

ಬೆನೋಯಿಟ್‌ ಪೇರ್‌ ಅವರಲ್ಲಿ ಕೋವಿಡ್ ಪಾಸಿಟಿವ್‌ ಕಂಡುಬಂದ ಬಳಿಕ ಫ್ರಾನ್ಸ್‌ನ ಇತರ ಟೆನಿಸಿಗರಾದ ರಿಚರ್ಡ್‌ ಗ್ಯಾಸ್ಕೆಟ್‌, ಅಡ್ರಿಯನ್‌ ಮನ್ನಾರಿನೊ, ಗ್ರೆಗೊರಿ ಬ್ಯಾರೆರ್‌, ಎಡ್ವರ್ಡ್‌ ರೋಜರ್‌ ವಸೆಲಿನ್‌ ಮೊದಲಾದವರೆಲ್ಲ ಹೊಟೇಲ್‌ ಕೊಠಡಿಯಲ್ಲಿ ಸೆಲ್ಫ್ ಐಸೊಲೇಶನ್‌ಗೆ ಒಳಗಾಗಿದ್ದಾರೆ.