Bengaluru ಲೈಂಗಿಕ ಕಿರುಕುಳ; ಬೈಕ್ ಟ್ಯಾಕ್ಸಿಯಿಂದ ಜಿಗಿದ ಯುವತಿ !

ಬೆಂಗಳೂರು : ನಗರದಲ್ಲಿ ಯುವತಿಯೊಬ್ಬಳು ಬೈಕ್ ಟ್ಯಾಕ್ಸಿ ಚಲಿಸುತ್ತಿದ್ದಾಗ ಚಾಲಕ ತನ್ನನ್ನು ಬೇರೆ ಸ್ಥಳಕ್ಕೆ ಕರೆದೊಯ್ಯಲು ಯತ್ನಿಸಿದ ಹಿನ್ನೆಲೆಯಲ್ಲಿ ಬೈಕ್‌ನಿಂದ ಜಿಗಿದ ಘಟನೆ ವರದಿಯಾಗಿದೆ.

ಪೊಲೀಸರ ಪ್ರಕಾರ, ಈ ಘಟನೆಯು ಎಪ್ರಿಲ್ 21 ರಂದು ಸಂಭವಿಸಿದೆ, ಮಹಿಳೆಯು ಸರಿಸುಮಾರು ರಾತ್ರಿ 11 ಗಂಟೆಗೆ Rapido ಅಪ್ಲಿಕೇಶನ್ ಮೂಲಕ ರೈಡ್ ಬುಕ್ ಮಾಡಿದ್ದು, ಚಾಲಕ ಯುವತಿಯ ಫೋನ್ ಅನ್ನು ಕಸಿದುಕೊಂಡು ತಾನು ಒಟಿಪಿ ಪರಿಶೀಲಿಸಬೇಕೆಂದು ಹೇಳಿಕೊಂಡಿದ್ದಾನೆ, ಆದರೆ ನಂತರ ವಿರುದ್ಧ ದಿಕ್ಕಿನಲ್ಲಿ ಚಾಲನೆ ಮಾಡಲು ಪ್ರಾರಂಭಿಸಿ ಫೋನ್ ಹಿಂತಿರುಗಿಸಲಿಲ್ಲ. ವಾಹನ ಚಲಿಸುತ್ತಿರುವಾಗಲೇ ಚಾಲಕ ತನಗೆ ಕಿರುಕುಳ ನೀಡಲು ಯತ್ನಿಸಿದ ಎಂದು ಹೇಳಿದ್ದಾರೆ.

ನಂತರ ಯಲಹಂಕದ ಅಬ್ರಾರ್ ಬಿಎಂಎಸ್ ಕಾಲೇಜು ಬಳಿ ವೇಗವಾಗಿ ಹೋಗುತ್ತಿದ್ದ ವೇಳೆ ಬೈಕ್‌ನಿಂದ ಆಕೆ ಜಿಗಿದಿದ್ದು, ಕಾಲೇಜಿನ ಸಿಬಂದಿ ಆಕೆಯ ಸಹಾಯಕ್ಕೆ ಬಂದಿದ್ದಾರೆ. ಸವಾರ ಸ್ಥಳದಿಂದ ಪರಾರಿಯಾಗಿದ್ದಾನೆ, ಆದರೆ ಪೊಲೀಸರು ಆರೋಪಿಯನ್ನು ಆಂಧ್ರಪ್ರದೇಶದ 27 ವರ್ಷದ ದೀಪಕ್ ರಾವ್ ಎಂಬಾತನನ್ನು ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ.