ಬೆಳ್ತಂಗಡಿ: ಕಡಿರುದ್ಯಾವರದಲ್ಲಿ ಮತ್ತೆ ಆನೆ ದಾಳಿ

ಬೆಳ್ತಂಗಡಿ: ಕಡಿರುದ್ಯಾವರ ಗ್ರಾಮದ ಭಂಡಾಜೆ ಕಿನ್ಯಡ್ಕ ಶಶಿಧರ ಪರಾಂಜಪೆ ಅವರ ತೋಟಕ್ಕೆ ಶುಕ್ರವಾರ ರಾತ್ರಿ ಒಂಟಿ ಸಲಗ ದಾಳಿ ನಡೆಸಿದ್ದು ಅಡಿಕೆ, ತೆಂಗು ಹಾಗೂ ಬಾಳೆ ಕೃಷಿಗೆ ಹಾನಿ ಉಂಟು ಮಾಡಿದೆ.

ಆನೆ ದಾಳಿ ನಡೆಸಿರುವುದು ಮನೆಯವರ ಗಮನಕ್ಕೆ ಬಂದಿದ್ದು, ಆನೆಯನ್ನು ಓಡಿಸಿದ ಕಾರಣ ಹೆಚ್ಚಿನ ಹಾನಿಯಾಗುವುದು ತಪ್ಪಿದೆ. ಪರಿಸರದ ಮನೆ ಸಮೀಪ ಸಂಚರಿಸಿರುವ ಕಾಡಾನೆ ಬಳಿಕ ತೋಟಕ್ಕೆ ಪ್ರವೇಶಿಸಿದ್ದು ಇಲ್ಲಿಂದ ಹಳ್ಳದ ಮೂಲಕ ವಳಂಬ್ರದ ಕಡೆ ತೆರಳಿದೆ.

ಚಿಬಿದ್ರೆ, ತೋಟತ್ತಾಡಿ ಪ್ರದೇಶದಲ್ಲಿ ಕಳೆದ ಒಂದು ವಾರದಿಂದ ಕಾಡಾನೆಯನ್ನು ಕಾಡಿಗೆ ಅಟ್ಟುವ ಕಾರ್ಯಾಚರಣೆ ನಡೆಯುತ್ತಿದ್ದು ಈ ವೇಳೆ ಅಲ್ಲಿ ಒಂಟಿ ಸಲಗ ತಂಡಕ್ಕೆ ಎದುರಾಗಿತ್ತು. ರಾಷ್ಟ್ರೀಯ ಹೆದ್ದಾರಿ, ಮೃತ್ಯುಂಜಯ ನದಿ ದಾಟಿ ನಳೀಲು ಕಡೆ ಹೋಗಿರುವ ಕುರುಹು ಪತ್ತೆಯಾಗಿತ್ತು. ಶುಕ್ರವಾರ ಹಾಗೂ ಶನಿವಾರ ಸಂಜೆ ತನಕ ಕಾರ್ಯಚರಣೆ ತಂಡಕ್ಕೆ ಒಂಟಿ ಸಲಗ ಕಂಡು ಬಂದಿಲ್ಲ. ಮಲವಂತಿಗೆ ಪ್ರದೇಶದ ಮಲ್ಲ ಭಾಗದಲ್ಲಿ ಕಾಡಾನೆಗಳ ಹಿಂಡು ಇರುವ ಸಾಧ್ಯತೆ ಕಂಡುಬಂದಿದೆ.