ಪತ್ನಿಯ ಜತೆಗೆ ‘ಕಳೆದುಹೋದ’ಬೆಲ್ಚಪ್ಪ!

ಪತ್ನಿಯನ್ನು ಕಳೆದುಕೊಂಡ ಪತಿ ಅದೇ ಆಘಾತದಿಂದ ಹೊರಗೆ ಬಂದಿರುವುದಿಲ್ಲ. ಪತ್ನಿ ಸತ್ತರೂ ಆಕೆ ಇನ್ನೂ ಜತೆಗಿದ್ದಾಳೆ ಎಂದು ಹುಡುಕುವ ಆತ ಅದೇ ಗುಂಗಿನಲ್ಲಿ ದಿನಕಳೆಯುತ್ತಾನೆ!

ಇದೇ ಅಂಶವನ್ನು ಇಟ್ಟುಕೊಂಡು ಮಾಡಿದ ಸಿನೆಮಾ ಬೆಲ್ಚಪ್ಪ. ರಜನೀಶ್‌ ದೇವಾಡಿಗ ಅವರ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನೆಮಾದಲ್ಲಿ ಅರವಿಂದ ಬೋಳಾರ್‌ ಮುಖ್ಯಪಾತ್ರದಲ್ಲಿದ್ದಾರೆ. ಎಲ್ಲಾ ಕಲಾವಿದರು ತಮ್ಮ ಪಾತ್ರಗಳಿಗೆ ನ್ಯಾಯ ಒದಗಿಸಿದ್ದಾರೆ. ಆದರೆ, ಸಿನೆಮಾ ಬಗ್ಗೆ ಪ್ರೊಜೆಕ್ಟ್ ಮಾಡಿದ ರೀತಿ ಹಾಗೂ ತೆರೆಮೇಲೆ ಕಾಣುವುದಕ್ಕೂ ವ್ಯತ್ಯಾಸಗಳು ಕಾಣುತ್ತಿವೆ. ಸಣ್ಣ ಕಥೆಯ ಎಳೆಯನ್ನು ತುಂಬ ಎಳೆದು ವಿವಿಧ ರೀತಿಯಲ್ಲಿ ತಂದ ರೀತಿಯ ಬಗ್ಗೆಯೂ ಕೆಲವರಿಗೆ ಆಕ್ಷೇಪವಿದೆ. ಎಡಿಟಿಂಗ್‌ ಕೂಡ ತುಂಬ ಸುಧಾರಿಸಬೇಕಿತ್ತು. ಕಾಮಿಡಿ ಆ್ಯಕ್ಟರ್‌ಗಳೇ ಇದ್ದರೂ ನಗು ಉಕ್ಕಿಸುವ ಅಂಶಗಳು ಇಲ್ಲಿ ಸ್ವಲ್ಪ ಕಡಿಮೆನೆ ಇದೆ… ಹೀಗೆ ಹಲವು ಆಕ್ಷೇಪಗಳು ಸಿನೆಮಾ ಬಗ್ಗೆ ಕೇಳಿಬರುತ್ತದೆ. ಆದರೂ, ಬೋಳಾರ್‌, ದೀಪಕ್‌ ರೈ ಪಾಣಾಜೆ, ಉಮೇಶ್‌ ಮಿಜಾರ್‌ ತಮ್ಮ ಪಾತ್ರಗಳಲ್ಲಿ ಹೊಸತನವನ್ನು ಪ್ರದರ್ಶಿಸಿರುವುದು ಇಷ್ಟವಾಗುತ್ತದೆ.

ಸದ್ಯ ಥಿಯೇಟರ್‌ನಲ್ಲಿ ಸಿನೆಮಾಕ್ಕೆ ಒಳ್ಳೆಯ ಅಭಿಪ್ರಾಯ ಇದೆ. ಬೆಲ್ಚಪ್ಪ ಇನ್ನಷ್ಟು ಸುಧಾರಿಸಿಕೊಂಡು ಎಂಟ್ರಿ ಆಗುತ್ತಿದ್ದರೆ ಇನ್ನೂ ಉತ್ತಮವಾಗುತ್ತಿತ್ತು ಎಂಬ ಅಭಿಪ್ರಾಯವೂ ಕೋಸ್ಟಲ್ವುಡ್‌ ಗಲ್ಲಿಯಲ್ಲಿ ಕೇಳಿಬರುತ್ತಿದೆ.