ಮರೆಯುವ ಮುನ್ನ ಒಂದಾದ ಗಣೇಶ್‌-ಪ್ರೀತಂ

ಪ್ರೀತಂ ಗುಬ್ಬಿ ಜೊತೆಗೊಂದು ಹೊಸ ಸಿನಿಮಾ ಮಾಡುತ್ತಿರುವುದಾಗಿ ನಟ ಗಣೇಶ್‌ ಕೆಲ ದಿನಗಳ ಹಿಂದಷ್ಟೇ ಹೇಳಿದ್ದರು. ಆದರೆ, ಆ ಚಿತ್ರಕ್ಕೆ ಟೈಟಲ್‌ ಆಗಿರಲಿಲ್ಲ. ಈಗ ಚಿತ್ರದ ಶೀರ್ಷಿಕೆ ಅಂತಿಮವಾಗಿದೆ. ಚಿತ್ರಕ್ಕೆ “ಮರೆಯುವ ಮುನ್ನ’ ಎಂದು ಟೈಟಲ್‌ ಇಡಲಾಗಿದೆ.

ಈ ಮೂಲಕ ಗಣೇಶ್‌ ಹಾಗೂ ಪ್ರೀತಂ ಗುಬ್ಬಿ ಮತ್ತೆ ಒಂದಾಗಿದ್ದಾರೆ. ನಿಮಗೆ ಗೊತ್ತಿರುವಂತೆ ಇವರಿಬ್ಬರ ಕಾಂಬಿನೇಶನ್‌ನಲ್ಲಿ ಬರುತ್ತಿರುವ ಮೂರನೇ ಸಿನಿಮಾ ಇದಾಗಿದೆ. ಈಗಾಗಲೇ “ಮಳೆಯಲಿ ಜೊತೆಯಲಿ’ ಹಾಗೂ “ದಿಲ್‌ ರಂಗೀಲಾ’ ಸಿನಿಮಾದಲ್ಲಿ ಈ ಜೋಡಿ ಜೊತೆಯಾಗಿ ಕೆಲಸ ಮಾಡಿತ್ತು.

ಈಗ “ಮರೆಯುವ ಮುನ್ನ’ ಚಿತ್ರದ ಮೂಲಕ ಮೂರನೇ ಸಿನಿಮಾಕ್ಕೆ ಅಣಿಯಾಗಿದೆ. ಸದ್ಯಕ್ಕೆ ಗಣೇಶ್‌ ಹಾಗೂ ಪ್ರೀತಂ ಗುಬ್ಬಿ ಬಿಟ್ಟರೆ ಮಿಕ್ಕಂತೆ ಯಾವುದೂ ಫೈನಲ್‌ ಆಗಿಲ್ಲ. ಈಗಷ್ಟೇ ಸ್ಕ್ರಿಪ್ಟ್ ಕೆಲಸದಲ್ಲಿ ತೊಡಗಿದ್ದಾರೆ ಪ್ರೀತಂ ಗುಬ್ಬಿ.

ಗಣೇಶ್‌ “ಗೀತಾ’ ಸಿನಿಮಾ ಮುಗಿಸಿಕೊಂಡು “ಮರೆಯುವ ಮುನ್ನ’ ತಂಡ ಸೇರಿಕೊಳ್ಳಲಿದ್ದಾರೆ. ಸದ್ಯ ಗಣೇಶ್‌ ಅವರ “ಆರೆಂಜ್‌’ ಹಾಗೂ “ಗಿಮಿಕ್‌’ ಚಿತ್ರೀಕರಣ ನಡೆಯುತ್ತಿದೆ. ಅವೆರಡು ಮುಗಿದ ನಂತರ “ಗೀತಾ’ ಆರಂಭವಾಗಲಿದ್ದು, ಈ ಚಿತ್ರದ ನಿರ್ಮಾಣದಲ್ಲಿ ಗಣೇಶ್‌ ಕೂಡಾ ಕೈ ಜೋಡಿಸಿದ್ದಾರೆ.