ಬಿಬಿಎಂಪಿ ಕಸದ ಲಾರಿ ಹರಿದು ಮಹಿಳೆ ಸಾವು

ಬೆಂಗಳೂರು: ತುಮಕೂರು ರಸ್ತೆಯ ಸಿಎಂಟಿಐ ಜಂಕ್ಷನ್‌ ಬಳಿ ಶುಕ್ರವಾರ ಬಿಬಿಎಂಪಿ ಕಸದ ಲಾರಿ ಮೈ ಮೇಲೆ ಹರಿದ ಪರಿಣಾಮ ಮಹಿಳೆಯೊಬ್ಬರು ಸ್ಥಳದಲ್ಲಿಯೇ  ಮೃತಪಟ್ಟಿದ್ದಾರೆ. ಕುರುಬರಹಳ್ಳಿ ನಿವಾಸಿ ಭುವನೇಶ್ವರಿ (30) ಮೃತಪಟ್ಟವರು.

ಈ ಕುರಿತು ಪ್ರಕರಣ ದಾಖಲಿಸಿಕೊಂಡು ಬಿಬಿಎಂಪಿ ಕಸದ ಲಾರಿ ಚಾಲಕ ಜಡಿಯಪ್ಪ ಎಂಬಾತನನ್ನು ಬಂ ಧಿಸಿದ್ದು, ತನಿಖೆ ಮುಂದುವರಿಸಲಾಗಿದೆ ಎಂದು ಯಶವಂತಪುರ ಸಂಚಾರ ಠಾಣೆ ಪೊಲೀಸರು ತಿಳಿಸಿದ್ದಾರೆ. ತಮಿಳುನಾಡು ಮೂಲದ ಭುವನೇಶ್ವರಿ ಕೆಲ ವರ್ಷಗಳ ಹಿಂದೆ ನಗರಕ್ಕೆ ಆಗಮಿಸಿದ್ದು, ಪತಿ ಹಾಗೂ ಪುತ್ರಿಯ ಜತೆ ಕುರುಬರಹಳ್ಳಿಯಲ್ಲಿ ವಾಸವಾಗಿದ್ದರು. ಸಮೀಪದ ಮನೆಯೊಂದರಲ್ಲಿ ಅವರ ಸಹೋದರ ಅಣ್ಣಾಮಲೈ ಕುಟುಂಬ ವಸವಾಗಿದೆ.

ಭುವನೇಶ್ವರಿ ಅವರು ಶುಕ್ರವಾರ ಸಂಜೆ ಮಗಳ ಜತೆ ತಮಿಳುನಾಡಿಗೆ ಹೋಗಬೇಕಿತ್ತು. ಹೀಗಾಗಿ ಮಧ್ಯಾಹ್ನ 3.30ರ ಸುಮಾರಿಗೆ ಇಬ್ಬರನ್ನೂ ಯಶವಂತಪುರ ರೈಲು ನಿಲ್ದಾಣಕ್ಕೆ ಬಿಡುವ ಸಲುವಾಗಿ ಸಹೋದರ ಅಣ್ಣಾಮಲೈ ಬೈಕ್‌ನಲ್ಲಿ ಕರೆದೊಯ್ಯುತ್ತಿದ್ದರು. ಮಾರ್ಗಮಧ್ಯೆ ಸಿಎಂಟಿಐ ಜಂಕ್ಷನ್‌ ಬಳಿ ಹೋಗುವಾಗ ಅಣ್ಣಾಮಲೈ ಅವರ ಬೈಕ್‌ಗೆ ಬಿಬಿಎಂಪಿ ಕಸದ ಲಾರಿ ಡಿಕ್ಕಿ ಹೊಡೆದಿದೆ.

ಪರಿಣಾಮ ಕೆಳಗೆ ಬಿದ್ದ ಭುವನೇಶ್ವರಿ ಮೇಲೆ ಲಾರಿ ಚಕ್ರ ಹರಿದು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಮತ್ತೂಂದು ಬದಿಗೆ ಬಿದ್ದ ಅಣ್ಣಾಮಲೈ ಹಾಗೂ ಬಾಲಕಿ ಸಣ್ಣಪುಟ್ಟ ಗಾಯಗಳೊಂದಿಗೆ ಪ್ರಾಣಾಪಾಯದಿಂದ ಪಾರಾಗಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.