ಬಸವಕಲ್ಯಾಣ: ತಾಲೂಕಿನ ಕೋಹಿನೂರ ಗ್ರಾಮದ ಮೊರಾರ್ಜಿ ದೇಸಾಯಿ ವಸತಿ ಶಾಲೆ ಕಟ್ಟಡ ನಿರ್ಮಾಣಕ್ಕೆ ಜಮೀನು ಮಂಜೂರಾಗಿ ಹಲವು ವರ್ಷಗಳಾದರೂ ಸಂಬಂಧಪಟ್ಟ ಇಲಾಖೆ ಗಮನ ಹರಿಸದೇ ಇರುವುದರಿಂದ ಖಾಸಗಿ ಕಟ್ಟಡದಲ್ಲೇ ಕಾರ್ಯ ನಿರ್ವಹಿಸುತ್ತಿದ್ದು, ಇದಕ್ಕಾಗಿ ಪ್ರತಿ ತಿಂಗಳು 58 ಸಾವಿರ ರೂಪಾಯಿ ಬಾಡಿಗೆ ಕೊಡುತ್ತಿದೆ.
Advertisement
ಸರ್ಕಾರ 2008ರಲ್ಲಿ ಇಲ್ಲಿ ಮೊರಾರ್ಜಿ ಶಾಲೆ ಆರಂಭಿಸಿದೆ. ಸರ್ಕಾರದ ಸ್ವಂತ ಕಟ್ಟಡ ಇಲ್ಲದ ಕಾರಣ ಇದುವರೆಗೂ ಖಾಸಗಿ ಕಟ್ಟದಲ್ಲೇ ಶಾಲೆ ನಡೆಸುತ್ತಿರುವುದು ಶೋಚನೀಯ ಸಂಗತಿ. ಇದುವರೆಗೂ ಸುಮಾರು ಅಂದಾಜು 30 ರಿಂದ 35 ಲಕ್ಷ ರೂ. ಬಾಡಿಗೆ ದರ ಪಾವತಿಸಿದೆ. ಒಂದು ವೇಳೆ 2008 ರಿಂದಲೇ ಸರ್ಕಾರದ ಈ ಹಣವನ್ನು ಸರ್ಕಾರ ಸ್ವಂತ ಕಟ್ಟಡದ ನಿರ್ಮಾಣಕ್ಕಾಗಿ ಬಳಸಿದ್ದರೆ ವಿದ್ಯಾರ್ಥಿಗಳಿಗೆ ಸ್ವಂತ ಸೂರು ಸಿಗುವುದಲ್ಲದೆ ಸರ್ಕಾರಿ ಕಟ್ಟಡದಲ್ಲಿ ವ್ಯಾಸಂಗ ಮಾಡುವ ಖುಷಿಯಾದರೂ ಸಿಗುತ್ತಿತ್ತು. ಶಾಲೆ ಕಟ್ಟಡ ನಿರ್ಮಾಣಕ್ಕಾಗಿ ಕೋಹಿನೂರ ಗ್ರಾಮದ ಸಮೀಪ 2013-14 ನೇ ಸಾಲಿನಲ್ಲಿ ಅಂದಾಜು 7 ಲಕ್ಷ ರೂ. ಗಳಲ್ಲಿ 7.20 ಎಕರೆ ಜಮೀನು ಖರೀದಿಸಲಾಗಿದೆ.