Crime News: ರೌಡಿ ಗುಂಪಿನಿಂದ ಸ್ನೇಹಿತರಿಬ್ಬರ ಮೇಲೆ ಹಲ್ಲೆ: ಪ್ರಕರಣ ದಾಖಲು

ಬೆಂಗಳೂರು: ಮದ್ಯದ ಅಮಲಿನಲ್ಲಿ ರೌಡಿಗಳ ಗುಂಪೊಂದು ಇಬ್ಬರು ಸ್ನೇಹಿತರ ಮೇಲೆ ಹಲ್ಲೆ ಮಾಡಿರುವ ಘಟನೆ ಕಲಾಸಿಪಾಳ್ಯ ಮುಖ್ಯರಸ್ತೆಯ ಬಾರ್‌ವೊಂದರಲ್ಲಿ ನಡೆದಿದೆ.

ಘಟನೆಯಲ್ಲಿ ಮೋಹನ್‌ಕುಮಾರ್‌, ಸತೀಶ್‌ ಹಲ್ಲೆಗೆ ಒಳಗಾಗಿದ್ದಾರೆ. ಪಶ್ಚಿಮ ವಿಭಾಗದ ವಿವಿಧ ಠಾಣೆಗಳ ರೌಡಿಶೀಟರ್‌ ಚಂದನ್‌, ಆತನ ಸಹಚರರಾದ ಗಿರಿ, ದೀಪು, ಮಂಜುನಾಥ್‌ ಕೃತ್ಯ ಎಸಗಿದ್ದಾರೆ. ಈ ಸಂಬಂಧ ಮೋಹನ್‌ ಕುಮಾರ್‌ ದೂರು ನೀಡಿದ್ದು, ಆರೋಪಿಗಳಿಗಾಗಿ ಶೋಧ ನಡೆಯುತ್ತಿದೆ.

ಸೆ.30ರ ತಡರಾತ್ರಿ 1 ಗಂಟೆಗೆ ಶಮಂತ್‌ ಬಾರ್‌ನಲ್ಲಿ ರೌಡಿಗಳ ಗುಂಪು ಮದ್ಯ ಸೇವಿಸುತ್ತಿತ್ತು. ಈ ವೇಳೆ ಮೋಹನ್‌ಕುಮಾರ್‌, ಸತೀಶ್‌ ಸೇರಿ ಇತರರು ಅದೇ ಬಾರ್‌ನಲ್ಲಿ ಮದ್ಯ ಸೇವಿಸುತ್ತಿದ್ದರು. ಆಗ ಆರೋಪಿಗಳು ಮದ್ಯದ ಅಮಲಿನಲ್ಲಿ ಜೋರಾಗಿ ಮಾತನಾಡುತ್ತಿದ್ದರು.ಅದನ್ನು ಮೋಹನ್‌ ಪ್ರಶ್ನಿಸಿದ್ದಾನೆ. ಅದೇ ವಿಚಾರಕ್ಕೆ ಎರಡು ಗುಂಪುಗಳ ನಡುವೆ ವಾಗ್ವಾದ ನಡೆದಿದೆ. ಅದು ವಿಕೋಪಕ್ಕೆ ಹೋದಾಗ ಆರೋಪಿಗಳು ಕಾರಿನಲ್ಲಿದ್ದ ಮಾರಕಾಸ್ತ್ರ ತಂದು ಹಲ್ಲೆ ನಡೆಸಿದ್ದಾರೆ.

ಅದೇ ವೇಳೆ ಬಾರ್‌ ಕ್ಯಾಶಿಯಲ್‌ ಬಾರ್‌ನಲ್ಲಿದ್ದ ಎಲ್ಲ ಗ್ರಾಹಕರಿಗೆ ಹೊರಗೆ ಹೋಗುವಂತೆ ಸೂಚಿಸಿದ್ದಾರೆ. ಆಗ ಹೊರಗಡೆ ಹೋಗುತ್ತಿದ್ದ ಮೋಹನ್‌ ಕುಮಾರ್‌ನನ್ನು ಕಾರಿನಲ್ಲಿ ಅಪಹರಿಸಿ ಹಲ್ಲೆ ನಡೆಸಿದ್ದಾರೆ. ಬಳಿಕ ಆರೋಪಿಗಳಿಗೆ ಪ್ರತಿರೋಧವೊಡ್ಡಿ ಮೋಹನ್‌ ಕುಮಾರ್‌ ತಪ್ಪಿಸಿಕೊಂಡು ಬಂದು ದೂರು ನೀಡಿದ್ದಾರೆ. ಕಲಾಸಿಪಾಳ್ಯ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.