ಈಗಾಗಲೇ ತನ್ನ ಟೈಟಲ್‌ ಹಾಗೂ ಟೀಸರ್‌ ಮೂಲಕ ಸಿನಿಮಂದಿಯ ಗಮನ ಸೆಳೆದಿರುವ “ಶ್ರೀಬಾಲಾಜಿ ಫೋಟೋ ಸ್ಟುಡಿಯೋ’ ಜನವರಿ 06ರಂದು ತೆರೆಕಾಣುತ್ತಿದೆ. ಮೊದಲ ಹಂತವಾಗಿ ಚಿತ್ರದ ಟ್ರೇಲರ್‌ ಇತ್ತೀಚೆಗೆ ಬಿಡುಗಡೆಯಾಗಿದ್ದು, ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
“ಗಂಧದಗುಡಿ’ ನಿರ್ದೇಶಕ ಅಮೋಘ ವರ್ಷ, ನಟ ಶಿಶಿರ್‌ ಕಾರ್ಯಕ್ರಮದಲ್ಲಿ ಹಾಜರಿದ್ದು, ಶುಭಕೋರಿದರು. ಈ ಚಿತ್ರವನ್ನು ನಟ ರಾಜೇಶ್‌ ಧ್ರುವ ನಿರ್ದೇಶಿಸಿ, ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರವನ್ನು ಸೃಜನ್‌ ಪ್ರೊಡಕ್ಷನ್ಸ್‌ ನಡಿ ವೆಂಕಟೇಶ್ವರ ರಾವ್‌ ಬಳ್ಳಾರಿ ನಿರ್ಮಿಸಿದ್ದಾರೆ.
ಚಿತ್ರದ ಬಗ್ಗೆ ಮಾತನಾಡುವ ರಾಜೇಶ್‌ ಧ್ರುವ, “ಒಬ್ಬ ಫೋಟೋಗ್ರಾಫ‌ರ್‌ ಮತ್ತು ಸ್ಟುಡಿಯೋ ನಡುವೆ ನಡೆಯುವ ಎಮೋಶನ್‌ ಸ್ಟೋರಿ ಈ ಸಿನಿಮಾದ ಜೀವಾಳ. ಕಥೆಯಲ್ಲಿ ಒಬ್ಬ ಫೋಟೋಗ್ರಾಫ‌ರ್‌ನ ಜೀವನದ ಬೇರೆ ಬೇರೆ ಹಂತಗಳು, ವಿವಿಧ ಆಯಾಮಗಳಲ್ಲಿ ಟ್ವಿಸ್ಟ್‌ ಪಡೆದುಕೊಳ್ಳುತ್ತಾ ಸಾಗುತ್ತದೆ. ತೆರೆಮೇಲೆ ಪ್ರತಿ 15 ನಿಮಿಷಕ್ಕೊಮ್ಮೆ ಸಿನಿಮಾದ ಆಯಾಮ ಬದಲಾಗುತ್ತದೆ. ತುಂಬಾ ಗಂಭೀರವಾದ ಪ್ರಬುದ್ಧ ವಿಷಯವನ್ನು ಮನಮುಟ್ಟುವಂತೆ ಹೇಳಿದ್ದೇವೆ. ಇಂಡಿಯಾದಲ್ಲಿರುವ ಎಲ್ಲ ಸ್ಟಾರ್ ಪೋಟೋಗಳು ಈ ಸ್ಟುಡಿಯೋದಲ್ಲಿದೆ. ಅದು ಹೇಗೆ ಅನ್ನೋದನ್ನು ಸ್ಕ್ರೀನ್‌ ಮೇಲೆ ನೋಡಬೇಕು’ ಎಂಬುದು ರಾಜೇಶ್‌ ಧ್ರುವ ವಿವರಣೆ.
ಚಿತ್ರದಲ್ಲಿ ರಾಜೇಶ್‌ ಧ್ರುವ, ರವಿ ಸಾಲಿಯಾನ್‌, ರಾಧಿಕಾ ಅಚ್ಯುತರಾವ್‌, ಸಂಪತ್‌ ಜೆ. ರಾಮ್, ಶುಭಲಕ್ಷ್ಮೀ, ನಕುಲ್‌ ಶರ್ಮ, ರಕ್ಷಿತ್‌, ರವಿ ಮೂರೂರು, ಶಿಶಿರ್‌ ಶಾಸ್ತ್ರೀ ಮತ್ತು ಉತ್ತರ ಕನ್ನಡದ ಇತರ ಸ್ಥಳೀಯ ಪ್ರತಿಭೆಗಳು ಸಿನಿಮಾದ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.
“ಶ್ರೀಬಾಲಾಜಿ ಫೋಟೋ ಸ್ಟುಡಿಯೋ’ ಸಿನಿಮಾಕ್ಕೆ ಮನೋಜ್‌ ಸಿನಿ ಸ್ಟುಡಿಯೋ ಛಾಯಾಗ್ರಹಣ, ಗಣಪತಿ ಭಟ್‌ ಸಂಕಲನವಿದೆ. ಅಭಿಷೇಕ್‌ ಶಿರಸಿ ಕಥೆ – ಚಿತ್ರಕಥೆಗೆ ಹಾಗೂ ಪೃಥ್ವಿಕಾಂತ ಎಲ್‌, ಹಾಗೂ ಅಜಿತ್‌ ಬೊಪ್ಪನಳ್ಳಿ ಸಂಭಾಷಣೆ ಬರೆದಿದ್ದಾರೆ. ಚಿತ್ರದಲ್ಲಿ 3 ಹಾಡುಗಳಿಗೆ ಶ್ರೀರಾಮ್‌ ಗಂಧರ್ವ ಸಂಗೀತ ಸಂಯೋಜಿಸಿದ್ದಾರೆ. ಸ್ವಸ್ತಿಕ್‌ ಕಾರೆಕಾಡ್‌ ಹಿನ್ನೆಲೆ ಸಂಗೀತವಿದೆ.
