Badminton: ಓರ್ಲೀನ್ಸ್‌ ಮಾಸ್ಟರ್ ಬ್ಯಾಡ್ಮಿಂಟನ್‌ ಪ್ರಶಸ್ತಿ ಗೆದ್ದ ಪ್ರಿಯಾಂಶು ರಾಜಾವತ್‌

ಓರ್ಲೀನ್ಸ್‌ (ಫ್ರಾನ್ಸ್‌): ಭಾರತದ ಭರವಸೆಯ ಬ್ಯಾಡ್ಮಿಂಟನ್‌ ಆಟಗಾರ ಪ್ರಿಯಾಂಶು ರಾಜಾವತ್‌ ಮೊದಲ “ಸೂಪರ್‌ 300” ಪ್ರಶಸ್ತಿಯೊಂದಿಗೆ ಸಂಭ್ರಮಿಸಿದ್ದಾರೆ. ಅವರು ಸ್ಪೇನ್‌ನಲ್ಲಿ ನಡೆದ 2,40,000 ಡಾಲರ್‌ ಬಹುಮಾನದ “ಓರ್ಲೀನ್ಸ್‌ ಮಾಸ್ಟರ್ ಸೂಪರ್‌ 300” ಬ್ಯಾಡ್ಮಿಂಟನ್‌ ಪಂದ್ಯಾವಳಿಯಲ್ಲಿ ಚಾಂಪಿಯನ್‌ ಆಗಿ ಮೂಡಿಬಂದರು.

ಭಾನುವಾರ ನಡೆದ ರೋಚಕ ಫೈನಲ್‌ ಹಣಾಹಣಿಯಲ್ಲಿ ಪ್ರಿಯಾಂಶು ರಾಜಾವತ್‌ ಡೆನ್ಮಾರ್ಕ್‌ನ ಮ್ಯಾಗ್ನಸ್‌ ಜೊನಾಸೆನ್‌ ಅವರನ್ನು 21-15, 19-21, 21-16 ಅಂತರದಿಂದ ಪರಾಭವಗೊಳಿಸಿದರು. ಇವರ ಹೋರಾಟ 68 ನಿಮಿಷಗಳ ತನಕ ಸಾಗಿತು.

ಫೈನಲ್‌ ಪ್ರವೇಶಿಸಿದ ಶಟ್ಲರ್‌ಗಳಿಬ್ಬರೂ ಅರ್ಹತಾ ಸುತ್ತಿನಲ್ಲಿ ಆಡಿ ಪ್ರಧಾನ ಸುತ್ತು ಪ್ರವೇಶಿಸಿದ್ದರು. ಇಬ್ಬರೂ 21 ವರ್ಷದ ಬ್ಯಾಡ್ಮಿಂಟನ್‌ ಪಟುಗಳಾಗಿದ್ದರು. ಇವರಿಬ್ಬರು ಫೈನಲ್‌ನಲ್ಲಿ ಎದುರಾದದ್ದೂ ಇದೇ ಮೊದಲು.

ಕಳೆದ ವರ್ಷವೂ ರಾಜಾವತ್‌ ಓರ್ಲೀನ್ಸ್‌ ಪಂದ್ಯಾವಳಿಯಲ್ಲಿ ಭಾಗವಹಿಸಿದ್ದರು. ಅಂದಿನದು “ಸೂಪರ್‌ 100” ಮುಖಾಮುಖೀ ಆಗಿತ್ತು. ರಾಜಾವತ್‌ ಬೇಗನೇ ನಿರ್ಗಮಿಸಿದ್ದರು. ಈ ಬಾರಿ ಚೊಚ್ಚಲ ಪ್ರಶಸ್ತಿಯೊಂದಿಗೆ ಮರಳಿದರು.