ನೀರಿನ ಬಿಲ್‌ ಪಾವತಿಸದಿದ್ದರೆ ನಳ್ಳಿ ಸಂಪರ್ಕ ಕಡಿತ

ಬಡಗನ್ನೂರು: ಕುಡಿಯುವ ನಳ್ಳಿ ನೀರಿನ ಬಿಲ್‌ ಪಾವತಿಸದೇ ಇರುವ ಫ‌ಲಾನುಭವಿಗಳಿಗೆ ನೀರಿನ ಸಂಪರ್ಕ ಕಡಿತಗೊಳಿಸುವ ಕುರಿತು ಬಡಗನ್ನೂರು ಗ್ರಾ.ಪಂ. ಸಾಮಾನ್ಯ ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಯಿತು. ಈ ವರ್ಷ ಬೇಸಗೆ ಹೊತ್ತಿಗೆ ನೀರಿನ ಅಭಾವ ಕಂಡಬರುವ ಸಾಧ್ಯತೆಯಿದ್ದು, ಮುಂಜಾಗ್ರತಾ ಕ್ರಮವಾಗಿ ನೀರನ್ನು ಮಿತವಾಗಿ ಬಳಸಿಕೊಳ್ಳುವಂತೆ ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿ ವಾಸೀಮ್‌ ಗಂಧದ ಮನವಿ ಮಾಡಿದರು. ಮೈಕೂಲಿ ಹಾಗೂ ದೊಡ್ಡಡ್ಕ ಭಾಗದಲ್ಲಿ ಕಲ್ಲಿನ ಕೋರೆಗೆ ಅಕ್ರಮವಾಗಿ ತೆಗೆದುಕೊಂಡ ನಳ್ಳಿ ನೀರನ್ನು ಕಡಿತಗೊಳಿಸುವ ಬಗ್ಗೆ ನಿರ್ಣಯ ಕೈಗೊಂಡಿತು.

ಬಾಣಪದವು ಪ್ರದೇಶದಲ್ಲಿ ನೀರಿನ ಸಮಸ್ಯೆಗೆ ಜಿ.ಪಂ.ನಿಂದ ಕೊಳವೆ ಬಾವಿ ಮಂಜೂರಾಗಿದೆ. ತತ್‌ಕ್ಷಣವೇ ಕೊಳವೆ ಬಾವಿ ತೆರೆದು ಸಮಸ್ಯೆ ಬಗೆಹರಿಸಲಾಗುವುದು ಎಂದು ಅಧ್ಯಕ್ಷ ಕೇಶವ ಗೌಡ ಕನ್ನಯ ತಿಳಿಸಿದರು. ಮೈಕೂಲಿ, ಕೆಲಂದೂರು ಹಾಗೂ ಮೀನಾವು ಪ್ರದೇಶದಲ್ಲಿ ನೀರಿನ ಸಮಸ್ಯೆ ಸಂಭವಿಸುವ ಸಾಧ್ಯತೆ ಇರುವ ಹಿನ್ನೆಲೆಯಲ್ಲಿ ಮುಂಜಾಗ್ರತಾ ದೃಷ್ಟಿಯಿಂದ ಗ್ರಾ.ಪಂ. ವತಿಯಿಂದ ಕೊಳವೆಬಾವಿ ಕೊರೆಯುವ ಬಗ್ಗೆ ನಿರ್ಣಯ ಕೈಗೊಳ್ಳಲಾಯಿತು. ಸಾಮಾನ್ಯ ಸಭೆಯ ಮೊದಲು ಬಡಗನ್ನೂರು ಹಾಗೂ ಪಡುವನ್ನೂರು ಗ್ರಾಮದ ವ್ಯಾಪ್ತಿಯ 8 ಸಮಿತಿಗಳ ಪಂಪ್‌ ಚಾಲಕರ ಸಭೆ ನಡೆಸಿ ಸಮಸ್ಯೆ ಮತ್ತು ಸಲಹೆ ಸೂಚನೆಗಳನ್ನು ಪಡೆಯಲಾಯಿತು. ವೇದಿಕೆಯಲ್ಲಿ ಕಾರ್ಯದರ್ಶಿ ಶಾರದಾ ಕೆ. ಉಪಸ್ಥಿತರಿದ್ದರು.

ಸಭೆಯಲ್ಲಿ ಸದಸ್ಯರಾದ ರವಿರಾಜ ರೈ ಸಜಂಕಾಡಿ, ರಘನಾಥ ರೈ ಕುತ್ಯಾಳ, ಉದಯ ಕುಮಾರ್‌ ಶರವು, ದೇವಕಿ ಕನ್ನಡ್ಕ, ಗೋಪಾಲಕೃಷ್ಣ ಸುಳ್ಯಪದವು, ಗುರುಪ್ರಸಾದ್‌ ರೈ ಕುದಾRಡಿ, ದಾಮೋಧರ ಆಚಾರ್ಯ ನೆಕ್ಕರೆ, ಹೇಮಲತಾ ಗೌಡ ಸಂಪಿಗೆಮಜಲು, ಸುಶೀಲಾ ಪಕೊÂಡ್‌, ಸವಿತಾ ಮಂಡ್ಯಲಮೂಲೆ ವಿಜಯಲಕ್ಷ್ಮೀ ಮೇಗಿನಮನೆ, ಬಾಲಕೃಷ್ಣ ನಾಯ್ಕ ಮೂಂಡೋಲೆ, ದಮಯಂತಿ ನೆಕ್ಕರೆ ಹಾಗೂ ಆಶಾ ಕಾರ್ಯಕರ್ತೆಯರು ಮತ್ತು ಪಂಪು ಚಾಲಕರು ಉಪಸ್ಥಿತರಿದ್ದರು. ಗ್ರಾ.ಪಂ. ಅಭಿವೃದ್ಧಿ ಅಧಿಕಾರಿ ವಸೀಮ ಗಂಧದ ಸ್ವಾಗತಿಸಿದರು. ಗುಮಾಸ್ತ ಜಯಾಪ್ರಸಾದ್‌ ವರದಿ ವಾಚಿಸಿದರು. ಕಾರ್ಯದರ್ಶಿ ಶಾರದಾ ಕೆ. ವಂದಿಸಿದರು. ಸಿಬಂದಿ ಅಬ್ದುಲ್‌ ರಹಿಮಾನ್‌, ಸುಕನ್ಯಾ, ಶಾರದಾ, ಹೇಮಾವತಿ ಸಹಕರಿಸಿದರು.

ಮೀಟರ್‌ ಕಡ್ಡಾಯ
ಕುಡಿಯುವ ನೀರಿನ ಫ‌ಲಾನುಭವಿಗಳು ಕಡ್ಡಾಯವಾಗಿ ಮೀಟರ್‌ ಅಳವಡಿಸಿಕೊಳ್ಳಬೇಕು. ನೀರನ್ನು ಆವಶ್ಯಕತೆಗೆ ತಕ್ಕಂತೆ ಮಿತವಾಗಿ ಬಳಸುವಂತೆ ತಿಳಿಸಲಾಯಿತು.

ಸಮಿತಿ ಅಧ್ಯಕ್ಷರು ಕ್ರಮ ಕೈಗೊಳ್ಳಬೇಕು
ನೀರು ಪೂರೈಕೆಯ ಎಂಟು ಸಮಿತಿಗಳಿಂದ ಸುಮಾರು 2 ಲಕ್ಷ ರೂ. ನೀರಿನ ಬಿಲ್‌ ಬಾಕಿ ಇದೆ. ಪಂಪ್‌ ಚಾಲಕರ ವೇತನ, ದುರಸ್ತಿ, ವಿದ್ಯುತ್‌ ಬಿಲ್‌ ಕಟ್ಟಲು ಪಂಚಾಯತಿ ಅನುದಾನವನ್ನು ವಿನಿಯೋಗ ಮಾಡಿದಲ್ಲಿ ಅಭಿವೃದ್ಧಿ ಕುಂಠಿತಗೊಳ್ಳುತ್ತದೆ. ಈ ಬಗ್ಗೆ ಸಮಿತಿ ಅಧ್ಯಕ್ಷರು ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುವಂತೆ ಪಿಡಿಒ ವಸೀಮ್‌ ಗಂಧದ ಆದೇಶಿಸಿದರು.