ಆವರ್ಸೆ: ಖಾಸಗಿ ಬಸ್‌-ವ್ಯಾನ್‌ ಢಿಕ್ಕಿ; ಪ್ರಯಾಣಿಕರಿಗೆ ಗಾಯ

ಸಿದ್ದಾಪುರ: ಆವರ್ಸೆ ಗೋಳಿಯಂಗಡಿ ರಸ್ತೆಯ ಅಂಡಾರ್‌ಕಟ್ಟೆ ಎಂಬಲ್ಲಿ ರಸ್ತೆ ತಿರುವಿನಲ್ಲಿ ಖಾಸಗಿ ಬಸ್ಸು ಹಾಗೂ ಗೂಡ್ಸ್‌ ವ್ಯಾನ್‌ ನಡುವೆ ಬುಧವಾರ ಸಂಜೆ ಢಿಕ್ಕಿ ಸಂಭವಿಸಿದೆ. ಪರಿಣಾಮ ಬಸ್ಸಿನ ಚಾಲಕ ಸೇರಿದಂತೆ ಹಲವಾರು ಪ್ರಯಾಣಿಕರಿಗೆ ಗಾಯಗಳಾಗಿವೆ.

ಉಡುಪಿಯಿಂದ ಗೋಳಿಯಂಗಡಿ ಭಾಗಕ್ಕೆ ಸಂಚರಿಸುತ್ತಿದ್ದ ಖಾಸಗಿ ಬಸ್ಸು ಮತ್ತು ಗೋಳಿಯಂಗಡಿ ಭಾಗದಿಂದ ಕುಂಜಾಲಿಗೆ ಗೇರು ಬೀಜ ಸಾಗಿಸುತ್ತಿದ್ದ ಗೂಡ್ಸ್‌ ವ್ಯಾನ್‌ ನಡುವೆ ಅಪಘಾತ ಸಂಭವಿಸಿದೆ. ಗೂಡ್ಸ್‌ ವಾಹನದ ಮುಂದಿನ ಭಾಗಕ್ಕೆ ಬಸ್ಸು ಢಿಕ್ಕಿಯಾಗಿದೆ. ಬಸ್ಸಿನ ಚಾಲಕನ ಬಲ ಕಾಲು ಹಾಗೂ ಮುಖದ ಭಾಗಕ್ಕೆ ತೀವ್ರ ಸರೂಪದ ಗಾಯಗಳಾಗಿವೆ. ಬಸ್ಸಿನಲ್ಲಿ ಪ್ರಯಾಣಿಸುತ್ತಿದ್ದ ಇಬ್ಬರು ಮಹಿಳೆಯರ ಕಾಲುಗಳಿಗೆ ಗಾಯಗಳಾಗಿದ್ದರೆ, ಹಲವಾರು ಪ್ರಯಾ ಣಿಕರಿಗೆ ಸಣ್ಣಪುಟ್ಟ ಗಾಯವಾಗಿದೆ.
ಪೊಲೀಸರ ಪರಿಶೀಲನೆ

ಕೋಟ ಪೊಲೀಸ್‌ ಠಾಣಾಧಿಕಾರಿ ಶಂಭುಲಿಂಗಯ್ಯ ಎಂ.ಇ. ಘಟನ ಸ್ಥಳಕ್ಕೆ ಭೇಟಿ ನೀಡಿ, ಪರಿಶೀಲನೆ ನಡೆಸಿದರು. ಕೋಟ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.