ಬೋಪಣ್ಣ, ಶರಣ್‌ ನಿರ್ಗಮನ

ಮೆಲ್ಬರ್ನ್: ಸೋಮವಾರದ 3ನೇ ಸುತ್ತಿನ ಮುಖಾಮುಖೀಯಲ್ಲಿ ರೋಹನ್‌ ಬೋಪಣ್ಣ ಮತ್ತು ದಿವಿಜ್‌ ಶರಣ್‌ ಪರಾಭವಗೊಳ್ಳುವುದರೊಂದಿಗೆ ಆಸ್ಟ್ರೇಲಿಯನ್‌ ಓಪನ್‌ ಪುರುಷರ ಡಬಲ್ಸ್‌ನಲ್ಲಿ ಭಾರತದ ಸವಾಲು ಅಂತ್ಯಗೊಂಡಿದೆ.

ರೋಜರ್‌ ಬೋಪಣ್ಣ-ಎಡ್ವರ್ಡ್‌ ರೋಜರ್‌ ವೆಸಲಿನ್‌ (ಫ್ರಾನ್ಸ್‌) ಅವರನ್ನು ಒಲಿವರ್‌ ಮರಾಕ್‌ (ಆಸ್ಟ್ರಿಯ)-ಮ್ಯಾಟೆ ಪಾವಿಕ್‌ (ಕ್ರೊವೇಶಿಯ) ಸೇರಿಕೊಂಡು 6-4, 7-6 (7-5), 6-3 ಅಂತರದಿಂದ ಹಿಮ್ಮೆಟ್ಟಿದರು. ತೀವ್ರ ಪೈಪೋಟಿಯಿಂದ ಕೂಡಿದ ಈ ಪಂದ್ಯ 2 ಗಂಟೆಗೂ ಹೆಚ್ಚು ಕಾಲ ಸಾಗಿತು. ಇದಕ್ಕೂ ಮೊದಲು ನಡೆದ 3ನೇ ಸುತ್ತಿನ ಇನ್ನೊಂದು ಪಂದ್ಯದಲ್ಲಿ ದಿವಿಜ್‌ ಶರಣ್‌-ಆ್ಯಂಡಿ ರಾಮ್‌ (ಅಮೆರಿಕ) ಕೂಡ ಉತ್ತಮ ಹೋರಾಟವೊಂದನ್ನು ನಡೆಸಿದ ಬಳಿಕ ಶರಣಾದರು. ಇವರನ್ನು ಲುಕಾಸ್‌ ಕುಬೋಟ್‌ (ಪೋಲೆಂಡ್‌)-ಮಾರ್ಸೆಲೊ ಮೆಲೊ (ಬ್ರಝಿಲ್‌) ಸೇರಿಕೊಂಡು 6-3, 7-6 (7-4), 6-4 ಅಂತರದಿಂದ ಪರಾಭವಗೊಳಿಸಿದರು. ಈ ಪಂದ್ಯ 2 ಗಂಟೆ, 12 ನಿಮಿಷಗಳ ತನಕ ನಡೆಯಿತು. ರವಿವಾರದ ಸೆಣಸಾಟದಲ್ಲಿ ಲಿಯಾಂಡರ್‌ ಪೇಸ್‌-ಪುರವ್‌ ರಾಜ ಜೋಡಿ ಸೋಲನುಭವಿಸಿತ್ತು.