ಆಸ್ಟ್ರೇಲಿಯನ್‌ ಓಪನ್‌: ಇನ್ನು ಕ್ವಾರ್ಟರ್‌ ಫೈನಲ್‌ ಕದನ

ಮೆಲ್ಬರ್ನ್: ಆಸ್ಟ್ರೇಲಿಯನ್‌ ಓಪನ್‌ ಗ್ರ್ಯಾನ್‌ಸ್ಲಾಮ್‌ ಪಂದ್ಯಾವಳಿ ಕ್ವಾರ್ಟರ್‌ ಫೈನಲ್‌ ಕದನಕ್ಕೆ ಅಣಿಯಾಗಿದೆ. ಹಾಲಿ ಚಾಂಪಿಯನ್‌ ನೊವಾಕ್‌ ಜೊಕೋವಿಕ್‌ ಗಾಯದ ನಡುವೆಯೂ ಸೆಣಸಾಡಿ ಗೆದ್ದು ಬಂದು ಬಂದಿದ್ದಾರೆ. ಜತೆಗೆ ಅಲೆಕ್ಸಾಂಡರ್‌ ಜ್ವೆರೇವ್‌, ಅಸ್ಲಾನ್‌ ಕರತ್ಸೇವ್‌, ಸೆರೆನಾ, ನವೋಮಿ ಒಸಾಕಾ, ಸಿಮೋನಾ ಹಾಲೆಪ್‌ ಅಂತಿಮ ಎಂಟರ ಸುತ್ತಿನ ಕಣದಲ್ಲಿದ್ದಾರೆ.

ಆದರೆ ಯುಎಸ್‌ ಓಪನ್‌ ಚಾಂಪಿಯನ್‌ ಖ್ಯಾತಿಯ ಡೊಮಿನಿಕ್‌ ಥೀಮ್‌, ಕಳೆದ ಸಲದ ಫೈನಲಿಸ್ಟ್‌ ಗಾರ್ಬಿನ್‌ ಮುಗುರುಜಾ ಸೋತು ಹೊರಬಿದ್ದಿದ್ದಾರೆ.

ಜೊಕೋವಿಕ್‌ ಸಾಹಸ :

ಸ್ನಾಯು ಸೆಳೆದಿಂದ ಆಡುವುದೇ ಅನುಮಾನ ಎಂಬ ಸ್ಥಿತಿಯಲ್ಲಿದ್ದ ಹಾಲಿ ಚಾಂಪಿಯನ್‌ ಜೊಕೋವಿಕ್‌ ಕೆನಡಾದ ಮಿಲೋಸ್‌ ರಾನಿಕ್‌ ವಿರುದ್ಧ ಮೊದಲೆರಡು ಸೆಟ್‌ಗಳಲ್ಲಿ ಲಯ ಕಳೆದುಕೊಂಡರೂ ಬಳಿಕ ನೈಜ ಆಟಕ್ಕೆ ಕುದುರಿಕೊಂಡರು. ಗೆಲುವಿನ ಅಂತರ 7-6 (7-4), 4-6, 6-1, 6-4.

ಮಂಗಳವಾರದ ಕ್ವಾ. ಫೈನಲ್‌ನಲ್ಲಿ ಜೊಕೋವಿಕ್‌ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೇವ್‌ ಸವಾಲನ್ನು ಎದುರಿಸಲಿದ್ದಾರೆ. ಜ್ವೆರೇವ್‌ 6-4, 7-6 (7-5), 6-3 ಅಂತರದಿಂದ ಸರ್ಬಿಯಾದ ಡುಸಾನ್‌ ಲಾಜೋವಿಕ್‌ ಅವರನ್ನು ಹಿಮ್ಮೆಟ್ಟಿಸಿದರು.

ಕಳೆದ ಸಲದ ಫೈನಲ್‌ನಲ್ಲಿ ಎಡವಿದ ಥೀಮ್‌ ಈ ಬಾರಿ 4ನೇ ಸುತ್ತಿನಲ್ಲೇ ಆಟ ಮುಗಿಸಿದರು. ಬಲ್ಗೇರಿಯಾದ ಗ್ರಿಗರ್‌ ಡಿಮಿಟ್ರೋವ್‌ 6-4, 6-4, 6-0 ಅಂತರದಿಂದ ಥೀಮ್‌ ಆಟವನ್ನು ಕೊನೆಗೊಳಿಸಿದರು. ಡಿಮಿಟ್ರೋವ್‌ ಅವರ ಮುಂದಿನ ಎದುರಾಳಿ ರಶ್ಯದ ಅಸ್ಲಾನ್‌ ಕರತ್ಸೇವ್‌. ಮೊದಲ ಗ್ರ್ಯಾನ್‌ಸ್ಲಾಮ್‌ ಆಡುತ್ತಿರುವ ಕರತ್ಸೇವ್‌ 5 ಸೆಟ್‌ಗಳ ಸೆಣಸಾಟದ ಬಳಿಕ ಕೆನಡಾದ ಫೆಲಿಕ್ಸ್‌ ಔಗರ್‌ ಅಲಿಯಾಸಿಮ್‌ ಅವರನ್ನು ಮಣಿಸಿದರು. ಅಂತರ 3-6, 1-6, 6-3, 6-3, 6-4.

ಸೆರೆನಾ ವರ್ಸಸ್‌ ಹಾಲೆಪ್‌ :

ಸೆರೆನಾ ವಿಲಿಯಮ್ಸ್‌ 7ನೇ ಶ್ರೇಯಾಂಕದ ಬೆಲರೂಸಿಯನ್‌ ಆಟಗಾರ್ತಿ ಅರಿನಾ ಸಬಲೆಂಕಾ ಅವರನ್ನು 6-4, 2-6, 6-4ರಿಂದ ಹಿಮ್ಮೆಟ್ಟಿಸಿದರು. ಕ್ವಾರ್ಟರ್‌ ಫೈನಲ್‌ನಲ್ಲಿ ಸೆರೆನಾ ಎದುರಾಳಿ ಸಿಮೋನಾ ಹಾಲೆಪ್‌. ರೊಮೇನಿಯದ ಹಾಲೆಪ್‌ ಪೋಲೆಂಡ್‌ನ‌ ಐಗಾ ಸ್ವಿಯಾಟೆಕ್‌ ಅವರಿಗೆ 3-6, 6-1, 6-4 ಅಂತರದ ಸೋಲುಣಿಸಿದರು.

ನವೋಮಿ ಒಸಾಕಾ ಸ್ಪೇನಿನ ಮುಗುರುಜಾ ವಿರುದ್ಧ 4-6, 6-4, 7-5 ಅಂತರದ ರೋಚಕ ಜಯ ಸಾಧಿಸಿದರು. ಒಸಾಕಾ ಅವರ ಕ್ವಾ.ಫೈನಲ್‌ ಎದುರಾಳಿ ತೈವಾನ್‌ನ ಶೀ ಸು ವೀ. ಇವರಿಗೆ ಶರಣಾದವರು ಜೆಕ್‌ನ ಮಾರ್ಕೆಟಾ ವೊಂಡ್ರೂಸೋವಾ.