ಮನೆ ಬಾಗಿಲಿಗೆ ಕೆನರಾ ಬ್ಯಾಂಕ್‌ ಸೇವೆ

ರವೀಂದ್ರ ಮುಕ್ತೇದಾರ
ಔರಾದ: ‘ಮನೆ ಬಾಗಿಲಿಗೆ ಕೆನರಾ ಬ್ಯಾಂಕ್‌ ಸೇವೆ’ಯಿಂದ ಕೆನರಾ ಬ್ಯಾಂಕ್‌ ಗ್ರಾಹಕರಿಗೆ ಇನ್ನಷ್ಟು ಹತ್ತಿರವಾಗುತ್ತಿದೆ.

ರಾಜ್ಯದ ಎಲ್ಲ ಕೆನರಾ ಬ್ಯಾಂಕ್‌ಗಳಲ್ಲಿ 2012ರಿಂದ ಆರಂಭಿಸಲಾಗಿದೆ. ಈ ಸೇವೆಯ ಮೂಲಕ ದಿನದ 24 ಗಂಟೆಗಳ ಕಾಲವೂ ಸೇವೆ ನೀಡಲಾಗುತ್ತಿದೆ. ಈ ಹಿಂದೆ 50 ರೂ.ನಿಂದ 10 ಸಾವಿರ ರೂ. ತನಕ ಹಣ ಜಮೆ ಹಾಗೂ ಹಣ ವರ್ಗಾವಣೆ ಮಾಡಲಾಗುತ್ತಿತ್ತು.

ಇದೀಗ ಗ್ರಾಹಕರ ಮನೆಗೇ ಬಂದು ಬ್ಯಾಂಕ್‌ ಖಾತೆಯನ್ನೂ ಕೂಡ ಕೆಲವೇ ನಿಮಿಷಗಳಲ್ಲಿ ತೆರೆಯುವ ಸೇವೆ ನೀಡುತ್ತಿದೆ. ಬ್ಯಾಂಕ್‌ ಮುಂದೆ ಗ್ರಾಹಕರು ಕ್ಯೂ ನಿಲ್ಲುವ ಕಷ್ಟ ಇನ್ನಿಲ್ಲವಾಗಿದೆ. ಅಟಲ್ ಪೆನ್ಷನ್‌, ಪ್ರಧಾನಮಂತ್ರಿ ಬಿಮಾ ಯೋಜನೆ, ಪ್ರಧಾನಮಂತ್ರಿ ಜೀವನ ಜ್ಯೋತಿ ಯೋಜನೆ ವಿಮೆಗಳನ್ನು ಕೂಡ ಕೆಲವೇ ನಿಮಿಷಗಳಲ್ಲೇ ಆರಂಭಿಸಲಾಗುತ್ತದೆ.

ಕರೆ ಮಾಡಿದರೆ ಸಾಕು ಮನೆಗೇ: ಕರೆ ಮಾಡಿದರೆ ಸಾಕು ಮನೆ ಬಾಗಿಲಿಗೆ ಬ್ಯಾಂಕ್‌ ಸೇವೆ ನೀಡುತ್ತಿದೆ. ತಕ್ಷಣ ಖಾತೆ ಆರಂಭಿಸುವ, ಹಣ ಜಮೆ ಹಾಗೂ ಹಣ ವರ್ಗಾವಣೆ ಮಾಡುವ ಪ್ರಕ್ರಿಯೆ ಆರಂಭಿಸಿದೆ.

ಹೀಗಾಗಿ ಬ್ಯಾಂಕ್‌ ವ್ಯಾಪ್ತಿಯ ಗ್ರಾಹಕರು ಸಂತೋಷದಿಂದ ವ್ಯವಹಾರ ಮಾಡುತ್ತಾರೆ. ಆಧಾರ್‌ ಕಾರ್ಡ್‌, ಪ್ಯಾನ್‌ ಕಾರ್ಡ್‌ ಮತ್ತು ಮೂರು ಭಾವಚಿತ್ರಗಳುಇದ್ದರೆ ಸಾಕು ಸ್ಥಳದಲ್ಲೇ ಖಾತೆ ತೆರೆಯಲಾಗುತ್ತಿದೆ. ಬ್ಯಾಂಕ್‌ನ ವ್ಯವಹಾರ ಪ್ರತಿನಿಧಿ ಒಂದೇ ತಿಂಗಳಲ್ಲಿ 200 ಖಾತೆ ಆರಂಭಿಸಿರುವುದು ಅತ್ಯುತ್ತಮ ಸೇವೆಗೆ ಸಾಕ್ಷಿಯಾಗಿದೆ.

ಸಾರ್ವಜನಿಕರೊಂದಿಗೆ ಉತ್ತಮ ಸಂಪರ್ಕ ಹಾಗೂ ವ್ಯವಹಾರದಿಂದ ಬ್ಯಾಂಕ್‌ ವ್ಯವಸ್ಥಾಪಕರು ಹರ್ಷಗೊಂಡಿದ್ದಾರೆ.

‘ಮನೆ ಬಾಗಿಲಿಗೆ ಕೆನರಾ ಬ್ಯಾಂಕ್‌ ಸೇವೆ’ ಎಂಬ ಕಾರ್ಯಕ್ರಮ ಮೂಲಕ ಬ್ಯಾಂಕ್‌ ವ್ಯಾಪ್ತಿಯ ಸಾರ್ವಜನಿಕರಿಗೆ ಉತ್ತಮ ಸೇವೆ ನೀಡಲಾಗಿದೆ. ನಮ್ಮ ವ್ಯವಹಾರ ಪ್ರತಿನಿಧಿ ಕೂಡ ಜನರೊಂದಿಗೆ ಬೆರೆತು ಉತ್ತಮ ಸೇವೆ ನೀಡುತ್ತಿದ್ದಾರೆ.
•ಚಂದ್ರಶೇಖರ,
 ಕೆನರಾ ಬ್ಯಾಂಕ್‌ ವ್ಯವಸ್ಥಾಪಕರು, ಔರಾದ.

ಬ್ಯಾಂಕ್‌ ಅಧಿಕಾರಿಗಳು ಸೇರಿ ನಮಗೆ ಸೇವೆ ಮಾಡಲು ಅವಕಾಶ ಮಾಡಿದ್ದು, ಬ್ಯಾಂಕ್‌ ವ್ಯಾಪ್ತಿಯ ಪ್ರತಿಯೊಬ್ಬರಿಗೂ ನಮ್ಮ ಶಾಖೆಯಿಂದ ಉತ್ತಮ ಆಡಳಿತ ನೀಡಬೇಕು ಎನ್ನುವುದೇ ನಮ್ಮ ಬಯಕೆಯಾಗಿದೆ.
•ಶಿವಾಜಿ ಪಾಡುರಂಗ,
ವ್ಯವಹಾರ ಪ್ರತಿನಿಧಿ, ಕೆನರಾ ಬ್ಯಾಂಕ್‌, ಔರಾದ.

ಕೆನರಾ ಬ್ಯಾಂಕ್‌ ಪ್ರತಿನಿಧಿಗೆ ಕರೆ ಮಾಡಿದರೆ ಸಾಕು ನಮ್ಮ ಮನೆಗೆ ಬಂದು ಹಣ ವರ್ಗಾಯಿಸುವುದು, ಬ್ಯಾಂಕ್‌ ಖಾತೆಯನ್ನು ಅಲ್ಪ ಕಾಲದಲ್ಲೇ ತೆರೆದು ಕೊಟ್ಟಿದ್ದಾರೆ. ಇದರಿಂದ ಬ್ಯಾಂಕ್‌ಗೆ ಹೋಗಿ ಗಂಟೆಗಟ್ಟಲೆ ನಿಲ್ಲುವುದು, ಸಮಯ ವ್ಯರ್ಥವಾಗುವುದು ನಿಂತಿದೆ.
•ಸಂತೋಷ ಮಾನೆ,
ಬ್ಯಾಂಕ್‌ ಗ್ರಾಹಕ.