Football ಆಟಗಾರ್ತಿಯರ ಮೇಲೆ ಹಲ್ಲೆ: ದೀಪಕ್‌ ಶರ್ಮ ಅಮಾನತು

ಪಣಜಿ: ಫುಟ್‌ಬಾಲ್‌ ಆಟಗಾರ್ತಿಯರ ಮೇಲೆ ಹಲ್ಲೆ ನಡೆಸಿದ ಆರೋಪದಲ್ಲಿ ಬಂಧನಕ್ಕೊಳಗಾಗಿ ಬಳಿಕ ಜಾಮೀನಿನ ಮೂಲಕ ಹೊರಬಂದಿದ್ದ, ಅಖಿಲ ಭಾರತ ಫುಟ್‌ಬಾಲ್‌ ಕಾರ್ಯಕಾರಿ ಸಮಿತಿ (ಎಐಎಫ್ಎಫ್) ಸದಸ್ಯ ದೀಪಕ್‌ ಶರ್ಮ ಅಮಾನತುಗೊಂಡಿದ್ದಾರೆ. ಮುಂದಿನ ಆದೇಶದ ವರೆಗೆ ಶರ್ಮ ಅವರನ್ನು ಅಮಾನತುಗೊಳಿಸಿರುವುದಾಗಿ ಭಾರತೀಯ ಫುಟ್‌ಬಾಲ್‌ ಫೆಡರೇಶನ್‌ ಮಂಗಳವಾರ ಪ್ರಕಟಿಸಿದೆ.

ಇಂಡಿಯನ್‌ ವುಮೆನ್ಸ್‌ ಫುಟ್‌ಬಾಲ್‌ ಲೀಗ್‌ನಲ್ಲಿ (ಐಡಬ್ಲ್ಯುಎಲ್‌) ಆಡುತ್ತಿರುವ ಹಿಮಾಚಲ ಪ್ರದೇಶ ಮೂಲದ ಖಾದ್‌ ಫುಟ್ಬಾಲ್‌ ಕ್ಲಬ್‌ನ ಇಬ್ಬರು ಆಟಗಾರ್ತಿಯರ ಮೇಲೆ, ದೀಪಕ್‌ ಶರ್ಮ ಹಲ್ಲೆ ನಡೆಸಿದ್ದಾಗಿ ಆರೋಪ ಕೇಳಿಬಂದಿತ್ತು. ಕ್ಲಬ್‌ನ ಮಾಲಕನಾಗಿರುವ ಶರ್ಮ, ಮಾರ್ಚ್‌ 28ರಂದು ತಮ್ಮ ಮೇಲೆ ಹಲ್ಲೆ ನಡೆಸಿದ್ದಾಗಿ ಆಟಗಾರ್ತಿಯರು ದೂರು ನೀಡಿದ್ದರು.

ದೂರಿನ ಬೆನ್ನಲ್ಲೇ ದೀಪಕ್‌ ಅವರನ್ನು ಗೋವಾ ಪೊಲೀಸರು ಬಂಧಿಸಿದ್ದರು. ಬಳಿಕ ಜಾಮೀನು ಮೂಲಕ ಅವರನ್ನು ಬಿಡುಗಡೆ ಮಾಡಲಾಗಿತ್ತು.