ಅಸ್ಸಾಂನ ವ್ಯಕ್ತಿಯೊಬ್ಬ ಚಿಲ್ಲರೆ ಹಣದಿಂದಲೇ ಸ್ಕೂಟಿ ಖರೀದಿಸಿದ

ಗುವಾಹಟಿ: ಹನಿ ಹನಿ ಸೇರಿದರೆ ಹಳ್ಳ ಎನ್ನುವ ಮಾತಿದೆ. ಅದೇ ರೀತಿ ಅಸ್ಸಾಂನ ವ್ಯಕ್ತಿಯೊಬ್ಬ ಚಿಲ್ಲರೆ ಹಣವನ್ನು ಕೂಡಿಟ್ಟು, ಇದೀಗ ಅದೇ ಚಿಲ್ಲರೆ ಹಣದಿಂದ ಸ್ಕೂಟಿ ಖರೀದಿಸಿದ್ದಾನೆ.

ಹೌದು! ಚಿಲ್ಲರೆ ಹಣದಿಂದಲೇ ಸ್ಕೂಟಿ ಖರೀದಿಸಿದವನ ವಿಡಿಯೋವನ್ನು ಹಿರಾಕ್‌ ಜೆ ದಾಸ್‌ ಹೆಸರಿನ ಯೂಟ್ಯೂಬರ್‌ ಹಂಚಿಕೊಂಡಿದ್ದಾರೆ. ಚೀಲದಲ್ಲಿ ತುಂಬಿಸಿಟ್ಟಿದ್ದ ಹಣವನ್ನು ಪ್ಲಾಸ್ಟಿಕ್‌ ಬುಟ್ಟಿಗಳಿಗೆ ಸುರಿಯಲಾಗುತ್ತದೆ. ಅದನ್ನು 2-3 ಮಂದಿ ಕುಳಿತು ಲೆಕ್ಕ ಹಾಕುತ್ತಾರೆ. ಸ್ಕೂಟರ್‌ಗೆ ಬೇಕಾದ ಮೌಲ್ಯವನ್ನು ತಲುಪಿದ ನಂತರ ಶೋ ರೂಂನ ಮಾಲೀಕ ಸಂತಸದಿಂದ ಸ್ಕೂಟಿಯನ್ನು ಆ ವ್ಯಕ್ತಿಯ ಹೆಸರಿಗೆ ಬರೆದು, ಸಹಿ ಮಾಡಿಕೊಡುತ್ತಾನೆ.

ಸುಮಾರು ಒಂದು ವರ್ಷದಿಂದ ಸ್ಕೂಟರ್‌ ಖರೀದಿಸಬೇಕೆಂದು ಕನಸು ಕಂಡಿದ್ದ ಆ ವ್ಯಕ್ತಿ 7-8 ತಿಂಗಳುಗಳಿಂದ ತನ್ನ ಅಂಗಡಿಯಲ್ಲಿ ಸಂಗ್ರಹವಾದ ಚಿಲ್ಲರೆಯನ್ನೆಲ್ಲ ಒಟ್ಟು ಹಾಕಿದ್ದನಂತೆ. ಅದೇ ಹಣದಿಂದ ಇಂದು ನನ್ನ ಕನಸು ನನಸಾಗಿದೆ ಎಂದು ಆತ ವಿಡಿಯೋದಲ್ಲಿ ತಿಳಿಸಿದ್ದಾನೆ.