ಗುಟ್ಕಾ, ಪಾನ್‌ ನಿಷೇಧ : ಅಸ್ಸಾಂ ಇನ್ನು ತಂಬಾಕು ಮುಕ್ತ ರಾಜ್ಯ

ಗುವಾಹಟಿ: ಅಸ್ಸಾಂ ಅನ್ನು ತಂಬಾಕು ಮುಕ್ತ ರಾಜ್ಯವನ್ನಾಗಿಸುವ ನಿಟ್ಟಿನಲ್ಲಿ ಅಲ್ಲಿಯ ಸರಕಾರ ಬುಧವಾರ ತಂಬಾಕು ವಸ್ತುಗಳ ಮಾರಾಟ, ತಯಾರಿಕೆ, ಸಂಗ್ರಹ, ವಿತರಣೆ, ತಂಬಾಕು ಹಾಗೂ ನಿಕೋಟಿನ್‌ ಹೊಂದಿರುವ ಗುಟ್ಕಾ, ಪಾನ್‌ ಮಸಾಲಾಗಳ ಜಾಹೀರಾತುಗಳ ಮೇಲೆ ಸಂಪೂರ್ಣವಾಗಿ ನಿಷೇಧ ಹೇರಿದೆ.

2011ರ ಆಹಾರ ಸುರಕ್ಷತೆ ಮತ್ತು ಭದ್ರತೆ(ಮಾರಾಟದ ತಡೆ ಮತ್ತು ನಿರ್ಬಂಧ) ಕಾಯ್ದೆ ಅನ್ವಯ ಈ ನಿಷೇಧ ಹೇರಲಾಗಿದೆ. ಈ ಕುರಿತು ಅಸ್ಸಾಂ ಸರಕಾರದ ಆಹಾರ ಸುರಕ್ಷತೆ ಆಯುಕ್ತರು ನ.22ರಂದು ಅಧಿಕೃತ ಪ್ರಕಟಣೆ ಹೊರಡಿಸಿದ್ದಾರೆ. ತಂಬಾಕು ಸೇವನೆಯಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಜನರು ಪ್ರಾಣ ಕಳೆದುಕೊಳ್ಳುತ್ತಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಹೇಳಿದ್ದಾರೆ.