ದೀಪಾಗೆ ಕಾಡಿತು ಮಂಡಿ ನೋವು

ಜಕಾರ್ತಾ: ತರಬೇತಿ ಸಂದರ್ಭದಲ್ಲಿ ಭಾರತದ ಜಿಮ್ನಾಸ್ಟ್‌ ದೀಪಾ ಕರ್ಮಾಕರ್‌ ಅವರಿಗೆ ಮಂಡಿ ನೋವು ಕಾಣಿಸಿಕೊಂಡಿದ್ದು, ಇದರಿಂದ ಬುಧವಾರ ನಡೆದ ಏಶ್ಯಾಡ್‌ ಆರ್ಟಿಸ್ಟಿಕ್‌ ಟೀಮ್‌ ಫೈನಲ್‌ ಸ್ಪರ್ಧೆಯಿಂದ ಹೊರಗುಳಿದರು. ತೀವ್ರ ಗಾಯದ ಸಮಸ್ಯೆಯಿಂದಾಗಿ ದೀಪಾಗೆ ಉತ್ತಮ ಪ್ರದರ್ಶನ ನೀಡಲು ಸಾಧ್ಯವಾಗಲಿಲ್ಲ. “ಗುಂಪು ವಿಭಾಗದ ಸ್ಪರ್ಧೆಯಿಂದ ಆಕೆಗೆ ವಿಶ್ರಾಂತಿ ನೀಡಿದ್ದೇವೆ. ಆದರೆ ಆಕೆ ಬೀಮ್‌ ಫೈನಲ್‌ನಲ್ಲಿ ಖಂಡಿತವಾಗಿ ಉತ್ತಮ ಪ್ರದರ್ಶನ ನೀಡುತ್ತಾಳೆ’ ಎಂದು ದೀಪಾ ಅವರ ಕೋಚ್‌ ಬಿಶ್ವೇಶ್ವರ್‌ ನಂದಿ ತಿಳಿಸಿದ್ದಾರೆ. ಬ್ಯಾಲೆನ್ಸಿಂಗ್‌ ಬೀಮ್‌ನಲ್ಲಿ ಲ್ಯಾಂಡಿಂಗ್‌ ಕಠಿನವೇನಲ್ಲ. ಆಕೆಯ ಕಾಲಿಗೆ ಯಾವುದೇ ತೊಂದರೆ ಉಂಟುಮಾಡುವುದಿಲ್ಲ ಎಂದು ನಂದಿ ಹೇಳಿದ್ದಾರೆ. ಈ ನೋವಿನಿಂದಾಗಿ ಸಾಕಷ್ಟು ಕುಗ್ಗಿರುವ ದೀಪಾ ಕರ್ಮಾಕರ್‌ ಸರಿಯಾಗಿ ಆಹಾರ ಸೇವನೆ ಮಾಡು ತ್ತಿಲ್ಲವೆಂದು ಕೋಚ್‌ ನಂದಿ ದೂರಿದ್ದಾರೆ. 

2016ರ ರಿಯೋ ಒಲಿಂಪಿಕ್ಸ್‌ನಲ್ಲಿ ಪದಕ ಗೆಲ್ಲದಿದ್ದರೂ ಎಲ್ಲರ ಹೆಗ್ಗಳಿಕೆ ಪಾತ್ರವಾಗಿದ್ದ ದೀಪಾ ಕರ್ಮಾಕರ್‌ ಏಶ್ಯಾಡ್‌ನ‌ಲ್ಲಿ  ನೆಚ್ಚಿನ ಸ್ಪರ್ಧಿಯಾಗಿದ್ದರು. ಅವರು ವಾಲ್ಟ್ ಸ್ಪರ್ಧೆಯಲ್ಲಿ ಫೈನಲ್‌ ಪ್ರವೇಶಿಸಲು ವಿಫ‌ಲರಾಗಿದ್ದರೆ, ಬ್ಯಾಲೆನ್ಸ್‌ ಬೀಮ್‌ನ ಅರ್ಹತೆ ಸುತ್ತಿನಲ್ಲಿ 7ನೇ ಸ್ಥಾನ ಪಡೆದು ಫೈನಲ್‌ಗೇರಿದ್ದಾರೆ. ಈ ಸ್ಪರ್ಧೆ ಶುಕ್ರವಾರ ನಡೆಯಲಿದೆ.