ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಚಿತ್ರಗಳೆಂದರೆ, ಅದರ ಸಬ್ಜೆಕ್ಟ್, ಬಜೆಟ್‌, ಕಾಸ್ಟಿಂಗ್ಸ್‌, ಹೀರೋಯಿನ್ಸ್‌ ಹೀಗೆ ಪ್ರತಿಯೊಂದರ ಬಗ್ಗೆಯೂ ದೊಡ್ಡ ಮಟ್ಟದಲ್ಲೇ ಸುದ್ದಿಯಾಗುತ್ತಿರುತ್ತದೆ. ಇತ್ತೀಚೆಗಷ್ಟೇ “ಕುರುಕ್ಷೇತ್ರ’ ದ ಮೂಲಕ ಗೆಲುವಿನ ನಗೆ ಬೀರಿರುವ ದರ್ಶನ್‌, ಸದ್ಯ “ರಾಬರ್ಟ್‌’ ಚಿತ್ರದ ತೆರೆಮರೆಯ ಕೆಲಸಗಳಲ್ಲಿ ಬ್ಯುಝಿಯಾಗಿದ್ದಾರೆ.
ಇದರ ನಡುವೆಯೇ “ರಾಬರ್ಟ್‌’ ಚಿತ್ರತಂಡದ ಕಡೆಯಿಂದ ಹೊಸದೊಂದು ಸುದ್ದಿ ಹೊರಬಿದ್ದಿದ್ದು,
“ರಾಬರ್ಟ್‌’ ಗೆ ಅಪ್ಪಟ ಕನ್ನಡತಿ ಆಶಾ ಭಟ್‌ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಹೌದು, ಈಗಾಗಲೇ ಮೊದಲ ಹಂತದ ಚಿತ್ರೀಕರಣ ಮುಗಿದಿದ್ದರೂ, ಇಲ್ಲಿಯವರೆಗೆ “ರಾಬರ್ಟ್‌’ ಚಿತ್ರಕ್ಕೆ ನಾಯಕಿಯ ಆಯ್ಕೆ ಆಗಿರಲಿಲ್ಲ.
ಇದರ ನಡುವೆಯೇ ಐಶ್ವರ್ಯಾ ರೈ, ಅನುಷ್ಕಾ ಶೆಟ್ಟಿ, ರಾಕುಲ್‌ ಪ್ರೀತ್‌ ಸಿಂಗ್‌, ಕೀರ್ತಿ ಸುರೇಶ್‌, ಸಾಯಿ ಪಲ್ಲವಿ ಮೊದಲಾದ ಘಟಾನುಘಟಿ ನಟಿಮಣಿಯರ ಹೆಸರುಗಳು “ರಾಬರ್ಟ್‌’ ಜೊತೆ ಕೇಳಿಬಂದಿತ್ತಾದರೂ, ಚಿತ್ರತಂಡ ಮಾತ್ರ ಈ ಬಗ್ಗೆ ಎಲ್ಲಿಯೂ ತುಟಿ ಬಿಚ್ಚಿರಲಿಲ್ಲ. ಈಗ ಚಿ ತ್ರತಂಡ “ರಾಬರ್ಟ್‌’ ಜೊತೆ ಅಧಿಕೃತವಾಗಿ ಹೆಜ್ಜೆ ಹಾಕಲಿರುವ ನಾಯಕಿಯ ಹೆಸರನ್ನು ಬಹಿರಂಗಪಡಿಸಿದೆ.
ಅಂದಹಾಗೆ, ಈ ಬಾರಿ “ರಾಬರ್ಟ್‌’ ಗೆಪಟ್‌ನಲ್ಲಿ ತೆರೆಮೇಲೆ ಎಂಟ್ರಿಕೊಡಲು ರೆಡಿಯಾಗುತ್ತಿರುವ ನಾಯಕ ದರ್ಶನ್‌ ಅವರಿಗೆ ಆಶಾ ಭಟ್‌ ಹೀರೋಯಿನ್‌ ಆಗಿ ಜೋಡಿಯಾಗುತ್ತಿದ್ದಾರೆ.
ಮೂಲತಃ ಶಿವಮೊಗ್ಗ ಜಿಲ್ಲೆಯ ಭದ್ರಾವತಿಯವರಾದ ಆಶಾ ಭಟ್‌, 2014ರ ಮಿಸ್‌ ಸುಪ್ರಾ ನ್ಯಾಶನಲ್‌ ಪ್ರಶಸ್ತಿ ವಿಜೇತೆ. ಆರ್‌.ವಿ ಇಂಜಿನಿಯರಿಂಗ್‌ ಕಾಲೇಜ್‌ನಲ್ಲಿ ಬಿ.ಇ ಎಲೆಕ್ಟ್ರಾನಿಕ್ಸ್‌ ಪದವಿ ಪಡೆದುಕೊಂಡಿರುವ ಆಶಾ ಭಟ್‌, ಕಾಲೇಜು ದಿನಗಳಲ್ಲಿಯೇ ಮಾಡೆಲಿಂಗ್‌ನತ್ತ ಒಲವು ಬೆಳೆಸಿಕೊಂಡ ಹುಡುಗಿ. ಕಾಲೇಜು ಮತ್ತು ಮಾಡೆಲಿಂಗ್‌ ಅಂಥ ಒಟ್ಟಿಗೆ ಬಣ್ಣದ ಲೋಕಕ್ಕೆ ಕಾಲಿಟ್ಟ ಆಶಾ ಭಟ್‌, ಈಗಾಗಲೆ ಹಲವು ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಸೌಂದರ್ಯ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಸೈ ಎನಿಸಿಕೊಂಡಿರುವಾಕೆ.
ಈಗಾಗಲೇ ಹಿಂದಿಯಲ್ಲಿ “ಜಂಗ್ಲಿ ‘ ಎನ್ನುವ ಚಿತ್ರದಲ್ಲೂ ನಾಯಕಿಯಾಗಿ ಕಾಣಿಸಿಕೊಂಡಿರುವ ಆಶಾ ಭಟ್‌, ಈಗ ದರ್ಶನ್‌ “ರಾಬರ್ಟ್‌’ ಮೂಲಕ ಸ್ಯಾಂಡಲ್‌ವುಡ್‌ಗೆ ಬಿಗ್‌ ಎಂಟ್ರಿ ಕೊಟ್ಟು ಗಟ್ಟಿ ನೆಲೆ ಕಾಣುವ ನಿರೀಕ್ಷೆಯಲ್ಲಿದ್ದಾರೆ.
