ಮಲ್ಯ ವಿರುದ್ಧ ಜಾಹೀರಾತು?

ಹೊಸದಿಲ್ಲಿ: “ಸರಕಾರಿ ಬ್ಯಾಂಕ್‌ಗಳಿಗೆ ವಂಚನೆ ಮಾಡಿದ ಆರೋಪಕ್ಕೆ ಗುರಿಯಾಗಿರುವ ಉದ್ಯಮಿ ವಿಜಯ ಮಲ್ಯ ಕುರಿತು ಮಾಹಿತಿ ಕೊಡಿ’. ಹೀಗೆಂದು ದೇಶದ ಪತ್ರಿಕೆಗಳಲ್ಲಿ ಶೀಘ್ರವೇ ಜಾಹೀರಾತು ಬಂದರೂ ಅಚ್ಚರಿ ಇಲ್ಲ. ಈ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳಲು ಜಾರಿ ನಿರ್ದೇಶನಾಲಯ (ಇ.ಡಿ)ಚಿಂತನೆ ನಡೆಸಿದೆ ಎಂದು ಹೇಳಲಾಗಿದೆ. ಅದಕ್ಕೆ ಪೂರಕವಾಗಿ ನವದಿಲ್ಲಿಯ ಕೋಟೋìಂದು ಉದ್ಯಮಿ ಮಲ್ಯರನ್ನು  ಘೋಷಿತ ಅಪರಾಧಿ (ಪ್ರೊಕ್ಲೈಮ್ಡ್ ಒಫೆಂಡರ್‌) ಎಂದು ಘೋಷಿಸಲು  ನಿರ್ಧರಿಸಿದೆ. ಜತೆಗೆ ಡಿ.18ರಂದು ವಿಚಾರಣೆಗೆ ಹಾಜರಾಗಬೇಕು ಎಂದು ಮಲ್ಯಗೆ ಆದೇಶ ನೀಡಿದೆ. ಇದು ಕೊನೆಯ ಅವಕಾಶ ಎಂದೂ ಕೋರ್ಟ್‌ ನೆನಪು ಮಾಡಿಕೊಟ್ಟಿದೆ. 

ಹೊಸದಿಲ್ಲಿಯ ಚೀಫ್ ಮೆಟ್ರೋಪಾಲಿಟನ್‌ ಮ್ಯಾಜಿಸ್ಟ್ರೇಟ್‌ ದೀಪಕ್‌ ಶೆರ್ಹಾವತ್‌ ಬುಧವಾರ ಜಾರಿ ನಿರ್ದೇಶನಾಲಯ (ಇ.ಡಿ)ಕ್ಕೆ ಸೂಚನೆ ನೀಡಿ, ಮಲ್ಯರನ್ನು ಘೋಷಿತ ಅಪರಾಧಿ ಎಂದು ಪ್ರಕಟಿಸಲು ಮತ್ತು ಮುಂದಿನ ಪ್ರಕ್ರಿಯೆಗಳ ಬಗ್ಗೆ ಕ್ರಮ ಕೈಗೊಳ್ಳುವಂತೆ ಆದೇಶ ನೀಡಿದ್ದಾರೆ. ಮಲ್ಯ ವಿರುದ್ಧ ಜಾರಿ ಮಾಡಲಾಗಿರುವ ಜಾಮೀನು ರಹಿತ ವಾರಂಟ್‌ಗೆ ಯಾವುದೇ ಪ್ರತಿಕ್ರಿಯೆ ನೀಡದೇ ಇರುವ ಹಿನ್ನೆಲೆಯಲ್ಲಿ ಕೋರ್ಟ್‌ ಈ ಕ್ರಮ  ಕೈಗೊಂಡಿದೆ.