ಅಧಿಕಾರ ವಹಿಸಿಕೊಂಡ ಸಚಿವ ಅರುಣ್‌ ಜೇಟ್ಲಿ

ಹೊಸದಿಲ್ಲಿ: ವೈದ್ಯಕೀಯ ಚಿಕಿತ್ಸೆಗಾಗಿ ಅಮೆರಿಕಕ್ಕೆ ಒಂದು ತಿಂಗಳ ಕಾಲ ತೆರಳಿದ್ದ ಸಚಿವ ಅರುಣ್‌ ಜೇಟ್ಲಿ ಹಣಕಾಸು ಖಾತೆಯನ್ನು ಶುಕ್ರವಾರ ಮತ್ತೆ ವಹಿಸಿಕೊಂಡಿದ್ದಾರೆ. ಜೇಟ್ಲಿ ವಿದೇಶದಲ್ಲಿದ್ದಾಗ ಹಂಗಾಮಿಯಾಗಿ ಪೀಯೂಷ್‌ ಗೋಯಲ್‌ ಹಣಕಾಸು ಖಾತೆಯನ್ನು ನಿರ್ವಹಿಸಿದ್ದರು. ಬಜೆಟ್‌ ಮಂಡನೆಯನ್ನು ಕೂಡಾ ಪಿಯೂಷ್‌ ಮಾಡಿದ್ದರು.

ಕಳೆದ ವಾರವಷ್ಟೇ ಜೇಟ್ಲಿ ಅಮೆರಿಕದಿಂದ ವಾಪಸಾಗಿದ್ದರು. ಎಡಗಾಲಿನ ಮೃದು ಅಂಗಾಂಶ ಕ್ಯಾನ್ಸರ್‌ನಿಂದ ಬಳಲುತ್ತಿರುವ ಜೇಟ್ಲಿ ಜ. 22ರಂದು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಜೇಟ್ಲಿ ಚೇತರಿಸಿಕೊಳ್ಳುತ್ತಿದ್ದು, ನಿಲ್ಲಲು ಅಥವಾ ಕುಳಿತುಕೊಳ್ಳಲು ಸಹಾಯ ಬೇಕಾಗುತ್ತದೆ. ಸ್ವಲ್ಪ ದೂರದವರೆಗೆ ಮಾತ್ರ ನಡೆಯಲು ಸಾಧ್ಯವಾಗುತ್ತಿದೆ ಎಂದು ಮೂಲಗಳು ತಿಳಿಸಿವೆ. ಪುಲ್ವಾಮಾ ದಾಳಿ ಹಿನ್ನೆಲೆಯಲ್ಲಿ ಶುಕ್ರವಾರ ಬೆಳಗ್ಗೆ ಪ್ರಧಾನಿ ನೇತೃತ್ವದಲ್ಲಿ ನಡೆದ ಭದ್ರತಾ ಸಂಪುಟ ಸಮಿತಿ ಸಭೆಗೆ ಹಾಜರಾಗಿದ್ದರು. ಅನಂತರ ಅವರು ಅಧಿಕಾರ ಸ್ವೀಕರಿಸಿದರು.