ಬಿಲ್ಗಾರಿಕೆ: ಉಕ್ರೇನ್‌ ಎದುರು ಭಾರತಕ್ಕೆ 3-5 ಸೋಲು

ಅಂತಾಲ್ಯ (ಟರ್ಕಿ): ಒಲಿಂಪಿಕ್ಸ್‌ ಅರ್ಹತಾ ಬಿಲ್ಗಾರಿಕೆ ಕೂಟದ ಪ್ರೀ ಕ್ವಾರ್ಟರ್‌ ಫೈನಲ್‌ನಲ್ಲಿ ಭಾರತದ ಮಹಿಳಾ ರೀಕರ್ವ್‌ ತಂಡ ಪರಾಭವಗೊಂಡಿದೆ. ಇದರಿಂದ ಪ್ಯಾರಿಸ್‌ ಹಾದಿ ಕಠಿನಗೊಂಡಿದೆ.

ಈ ಕೂಟದಲ್ಲಿ ಭಾರತ ಸೆಮಿಫೈನಲ್‌ ಪ್ರವೇಶಿಸಿದ್ದರೆ ಸುಲಭವಾಗಿ ಒಲಿಂಪಿಕ್ಸ್‌ ಅರ್ಹತೆ ಪಡೆಯುತ್ತಿತ್ತು. ಇನ್ನೀಗ ಬಿಲ್ಗಾರಿಕೆ ವಿಶ್ವ ರ್‍ಯಾಂಕಿಂಗ್‌ ಆಧಾರದಲ್ಲಿ ಅರ್ಹತೆ ಪಡೆಯಬೇಕಿದೆ. ಆದರೆ ಇದು ಹೇಳಿಕೊಳ್ಳುವಷ್ಟು ಸುಲಭವಲ್ಲ.

ಬೈ ಪಡೆದು ನೇರವಾಗಿ ಪ್ರೀ ಕ್ವಾರ್ಟರ್‌ನಲ್ಲಿ ಸ್ಪರ್ಧಿಸಿದ ದೀಪಿಕಾ ಕುಮಾರಿ, ಭಜನ್‌ ಕೌರ್‌, ಅಂಕಿತಾ ಭಕತ್‌ ಅವರನ್ನೊಳಗೊಂಡ ಭಾರತ ತಂಡ ತನಗಿಂತ ಕಡಿಮೆ ರ್‍ಯಾಂಕ್‌ ಹೊಂದಿರುವ ಉಕ್ರೇನ್‌ ಎದುರು 3-5 ಅಂತರದ ಸೋಲನುಭವಿಸಿತು. ಆರಂಭದಲ್ಲಿ ಭಾರತ 3-1 ಮುನ್ನಡೆ ಸಾಧಿಸಿತ್ತು. ಇದ್ದಕ್ಕಿದ್ದಂತೆ ಕುಸಿತ ಅನುಭವಿಸಿ 3-5ರಿಂದ ಸೋತು ಹೋಯಿತು.