Aranthodu: ಪ್ರಯಾಣಿಕ ತಂಗುದಾಣದ ದಾರಿ ಮಾಯ!

ಅರಂತೋಡು: ಸಾರ್ವಜನಿಕರಿಗೆ ಅನುಕೂಲವಾಗಲಿ ಎಂದು ಕೊಡುಗೆಯಾಗಿ ನೀಡಿದ ಪ್ರಯಾ ಣಿಕರ ತಂಗುದಾಣದ ವ್ಯವಸ್ಥೆಯೊಂದು ಸ್ಥಳೀಯಾಡಳಿತದಿಂದ ಸರಿಯಾಗಿ ನಿರ್ವಹಣೆ ಆಗದೆ ಜನರಿಂದ ದೂರ ಉಳಿಯುವಂತಾಗಿದೆ.

ಆಲೆಟ್ಟಿ ಗ್ರಾಮ ಪಂಚಾಯತ್‌ ವ್ಯಾಪ್ತಿಯ ಪರಿವಾರ ಕಾನದಲ್ಲಿ ಜನರು ವಾಹನಕ್ಕಾಗಿ ಬಿಸಿಲು-ಮಳೆಯಲ್ಲಿ ನಿಲ್ಲುವ ಸ್ಥಿತಿ ಇದ್ದಾಗ ಖಾಸಗಿ ವ್ಯವಸ್ಥೆಯು ಒಂದು ತಂಗುದಾಣವನ್ನು ನಿರ್ಮಿಸಿ ಜನಹಿತ ಕಾರ್ಯವನ್ನು ಮಾಡಿತ್ತು. ಅಲ್ಲಿಂದೀಚೆಗೆ ಜನರು ಇದನ್ನು ಉಪಯೋಗಿಸುತ್ತಾ ಬಂದಿದ್ದರೂ ಇತ್ತೀಚೆಗೆ ಅದರ ಪರಿಸರದ ನಿರ್ವಹಣೆ ಸರಿ ಆಗದೆ ಅದರ ಸುತ್ತಲು ಪೊದೆಗಳು ಬೆಳೆದು ತಂಗುದಾಣಕ್ಕೆ ಹೋಗಲು ದಾರಿ ಸರಿಯಾಗಿ ಕಾಣದಾಗಿದೆ. ಪೊದೆಗಳು ಸುತ್ತುವರಿದಿರುವುದರಿಂದ ಆ ಕಡೆ ತೆರಳಲು ಹಾವುಗಳ ಭಯವೂ ಜನರನ್ನು ಕಾಡುತ್ತಿದೆ. ಇಲ್ಲಿನ ಅವ್ಯವಸ್ಥೆಯಿಂದಾಗಿ ಜನ ಅದರತ್ತ ಹೋಗುವುದು ಕಡಿಮೆ ಆಗುತ್ತಿದ್ದಂತೆ ಅಲ್ಲಿ ಬೀದಿ ನಾಯಿಗಳು ಸೇರಿಕೊಳ್ಳಲಾರಂಭಿಸಿವೆ. ಇದರಿಂದಾಗಿ ಜನರು ಮತ್ತೆ ರಸ್ತೆ ಬದಿಯಲ್ಲೇ ವಾಹಕ್ಕೆ ಕಾದು ನಿಲ್ಲುವ ಸ್ಥಿತಿ ನಿರ್ಮಾಣವಾಗಿದೆ.

ಇನ್ನಾದರೂ ಸ್ಥಳೀಯಾಡಳಿತ ಇತ್ತ ಗಮನ ಹರಿಸಿ ಇಲ್ಲಿ ಸದ್ಯ ಆಗಿರುವ ಸಮಸ್ಯೆಯನ್ನು ಸರಿಪಡಿಸಿ ತಂಗುದಾಣ ಜನರ ಉಪಯೋಗಕ್ಕೆ ದೊರೆಯುವಂತೆ ಮಾಡಬೇಕು ಎಂದು ನಿತ್ಯ ಪ್ರಯಾಣಿಕರು ಆಗ್ರಹಿಸಿದ್ದಾರೆ.

ಇದರ ಪಕ್ಕದಲ್ಲೇ ವಿದ್ಯುತ್‌ ಕಂಬವೂ ಇದ್ದು ಅದರ ಸುತ್ತಲೂ ಪೊದೆ ಬೆಳೆದಿದೆ. ಕಾಡು ಬಳ್ಳಿ ಕಂಬ ಹತ್ತಲು ಆರಂಭವಾಗಿದೆ. ಅಪಾಯಕ್ಕೆ ಆಹ್ವಾನ ಸಂಭವಿಸುವ ಮೊದಲೇ ಮೆಸ್ಕಾಂ ಇದನ್ನು ಸರಿ ಪಡಿಸಬೇಕು ಎಂಬ ಆಗ್ರಹವೂ ವ್ಯಕ್ತವಾಗಿದೆ.