ಅನ್ನಛತ್ರ ಕಾರ್ಯ ಶ್ಲಾಘನೀಯ: ಪ್ರತಾಪಸಿಂಗ್‌

ಸೊಲ್ಲಾಪುರ: ಅಕ್ಕಲಕೋಟ ಪಟ್ಟಣದ ಶ್ರೀ ಸಮರ್ಥ ಅನ್ನಛತ್ರ ಮಂಡಳದ ಸಂಸ್ಥಾಪಕ ಅಧ್ಯಕ್ಷ ಜನಮೇಜಯರಾಜೆ ಭೋಸಲೆ ಮತ್ತು ಪ್ರಮುಖ ಕಾರ್ಯಕಾರಿ ವಿಶ್ವಸ್ತ ಅಮೋಲರಾಜೆ ಭೋಸಲೆ ಮಾರ್ಗದರ್ಶನದಲ್ಲಿ ಕಳೆದ 32 ವರ್ಷಗಳಿಂದ ಧಾರ್ಮಿಕ, ಸಾಮಾಜಿಕ ಮತ್ತು ಶೈಕ್ಷಣಿಕ ಕ್ಷೇತ್ರಗಳಲ್ಲಿ ಮಾಡಿದ ಕಾರ್ಯ ಗಮನಾರ್ಹವಾಗಿವೆ ಎಂದು ಸಾತಾರ ಜಿಲ್ಲೆಯ ಭಾರತ ಫೋರ್ಸ್‌ ಕಂಪನಿಯ ಪ್ಲಾಂಟ್‌ ಮುಖ್ಯಸ್ಥ ಪ್ರತಾಪಸಿಂಗ್‌ ಬಂಡುಸಿಂಗ್‌ ರಜಪೂತ ಹೇಳಿದರು.

ಅಕ್ಕಲಕೋಟ ತಾಲೂಕಿನ ದೇಶಮುಖ ಬೋರಗಾಂವದ ಸುಪುತ್ರ ಸದ್ಯ ಸಾತಾರಾದಲ್ಲಿ ಇರುವ ಭಾರತ್‌ ಫೋರ್ಸ್‌ ಕಂಪನಿಯ ಪ್ಲಾಂಟ್‌ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸುತ್ತಿರುವ ಅವರು ಕುಟುಂಬ ಸಮೇತರಾಗಿ ಶ್ರೀ ಕ್ಷೇತ್ರ ಅಕ್ಕಲಕೋಟಕ್ಕೆ ಬಂದು ಸ್ವಾಮಿ ಸಮರ್ಥರ ದರ್ಶನ ಪಡೆದು, ಅನ್ನಛತ್ರ ಮಂಡಳಿ ವತಿಯಿಂದ ಸನ್ಮಾನ ಸ್ವೀಕರಿಸಿ ಮಾತನಾಡಿದರು.

ಸ್ವಾಮಿ ಸಮರ್ಥ ಟ್ರಸ್ಟ್‌ ಯಾವಾ ಗಲೂ ಸಾಮಾಜಿಕ ಬದ್ಧತೆ ನಿರ್ವಹಿಸುತ್ತ ಬಂದಿದೆ. ನನಗೆ ಹಾಗೂ ನನ್ನ ಕುಟುಂಬಕ್ಕೆ ಸ್ವಾಮಿ ಸಮರ್ಥರ ಆಶೀರ್ವಾದವೇ ಪ್ರಸಾದವಾಗಿದ್ದು, ಭವಿಷ್ಯದಲ್ಲಿ ಸ್ಫೂರ್ತಿಯಾಗಿದೆ ಎಂದು ಹೇಳಿದರು.

ಪ್ರಕಾಶ ಸುರವಸೆ, ಶಂಕರ ವ್ಹನಮಾನೆ, ವಾಲ್ಚಂದ ನಗರದ ಸ್ವಾಮಿ ಸಮರ್ಥ ಸೇವಾ ಮಂಡಳದ ಕಾರ್ಯದರ್ಶಿ ಅಮೋಲ ರಜಪೂತ, ರೇಖಾ ರಜಪೂತ, ಅಭಿಷೇಕ್‌ ರಜಪೂತ, ರಾಧಿಕಾ ರಜಪೂತ ಹಾಗೂ ಭಕ್ತರು ಇದ್ದರು.